¹ Nige gaya zawagari niya awiya, na nige eno taung baina nibaung dedu nona, ago dubu Laodesiya napo baina ra mitowa aungne, nupe dubu baina ena beraung nana oko gao aeno taung dedu nona ara. ² Na buro ayero nona ami moko agera dong doti nasani, ago taiti noi hina aratao gabu ra nasani, nupe Tuwa Tutu ra geme hungao awiya gaya zawagaise, na aeno buro tauya nona, geme nuna hungao awiya Kristo ara. ³ Wau au nuna aungna atu hungao mitoiya, deka ayero, nigao ingwaing aungne kotumao ingwang waing apakana awiya, Kristo ra moko ra atu hungero mitowa ara. ⁴ Mani zozo bungno nige etegairo, nupe nige unung mowese, aeno na ge ewiya sinena. ⁵ Na nige aungne dema oko mitena, arata Oweno ra mokora awiya, na nige aungne dema mitena ayero gipu zawagae. Nige buro etetero neya, nupe Kristo tumodiyao ra putoung neya, aeno na yawa yawa baina kama nena. ⁶ Nige Tuwa Kristo mena pumuwa, arare nige nu aungne dema tairo ang yepu. ⁷ Nige nuna hina atu tai gaero babi nasani, nupe, nu ziwong tauya ninage yai nige nuna tame atu dopepu, bowi ingwaing mena tugata yewa nige nigiwa, awiya ago nasani, tumodiyao ra dopero tau yepu, ayero nasani, be apakana nige Tuwa eno dange sina sani neungpu. ⁸ Emo ena tangi eungna ewowo nigao gehiwao, me aung, awiya puro bungno nige etegari neya, aeno nige diti ake nasani neungpu. Nigao ayao awiya Kristo ra nao otao oko noiya, nigao awiya tangi nao gege otao noiya ara. ⁹ Kristo awiya tangi taung puro kasa yena, arata Tuwa Tutu ra nao apakana awiya nuna tame atu mitoiya. ¹⁰ Nige awiya gerao dubu nuna ware nu ninage mokora atu be bungno mitoiya. Nona putoung re apakana mitowa aungna gitau yao awiya nu gege ara. ¹¹ Taung tata kapao ra gabu ra atu nige nu aungne tairo baingtiwa, nao awiya taung piti ra nao oko ara, Kristo ra nao ingwaing ra atu name nao memeko agogowa awiya tunewa. Taung tata kapao me awiya ara. ¹² Nige ge ou susunewa be awiya nige Kristo aungne taka sewa, Tuwa Tutu nige Kristo aungne dema bingditi ra atu gowena, ayenu nige Tuwa Tutu Kristo magayao ra atu uwenu seka yena, awiya tumodiro nige ge ou susu newa be aungne, Tuwa Tutu nige Kristo aungne dema uwenu seka yero iropumuwa ara. ¹³ Gitau nige dubo agowa ra nao memeko awiya ago nasani nupe nao beraung giti nauwa ami nige denu maga yewa, arata Tuwa Tutu pasena naname awiya nuwe gaiti nasani name soreungnu, name Kristo aungne dema nao pumuwa. ¹⁴ Sao tauyao zo pasena naname gipenu, name nuna beraung ra ambeyang re mitauwa, awiya apakana disena. Pasena naname awiya apakana puro hitiro ipasao ra atu dena. ¹⁵ Nu oweno memeko aungna putoung re, nupe nona apakana aungna putoung awiya besugaina. Tuwa Tutu nona putoung re apakana awiya hingza yenu ago putoung aung yewa, ayero ipasao ra atu emo apakana awiya gipena. ¹⁶ Arare mani zozo nige eno hisipatao ge eyero oko saise, nige sao tauyao minao ra ta, ou ra ta, bowiyao wari babuze ra ta, ino seka kasayao ra ta, Sabat wari ra awiya oko ago neya ayero oko saise. ¹⁷ Nona apakana ewiya agore kasa yari niya aungna ititi gege ara, arata nona me awiya Kristo ara. ¹⁸ Emo ena nona atiyo re giro, ni nikani puro hosisi nasani angelo dubu bowi yasese saya, ge agera eno dago oko hawe. Emo ayetugao ami kotupu nowa awiya, ago nigao ingwaing ago nowita sero nowa, arata ago awiya nao agowa ra mitowa. ¹⁹ Anasani, ago Kristo zio naname awiya oko hingiro baingtiro nowa. Zio ami taung apakana aeno minao pugaiti noi, hetu ra susumao aungne huro re apakana hingiti noi ingwaing mitasani, Tuwa Tutu ra putoung ra babinowa. ²⁰ Nao memeko ninage aungne, tangi eungna putoung aungne, awiya mena Kristo aungne maga yena. Arare nige susuwa noeno, tangi eungna sao tauyao eyetugao awiya ago nei? ²¹ "Ni oko hingi, ni oko mini, ni oko kiriung" ²² Name nao eyetugao ago yaname me kasa yaise sinowa, arata nona aungna me oko kasa noiya, no eno oko, denao awiya tangi emora sao aungne gipao gege. ²³ Mani ena zo eyero sinowa: Sao tauyao ewiya kotumao ingwaing re butu niya, arare sao tauyao emi moko naname uwinai name bowiyao ra nasani, moko naname puro hosisi nasani, nupe taung naname kokoni nariniya, ayero sinowa. Arata sao tauyao emi name soreungno nao memeko agowa name aungne mitoiya awiya disao teng oko ara.