¹ Jisi budo rorae utu da isira ainda piyeyo, natokare toregari embo Mamo Siroro arida ingo beda anumbesira isira ainda, ango ata gido imo Mamo mi Main de daedo jiari erata. ² Kotembari rorae utuda ainda piyeyo, rorae butuda ainda piote. ³ Imo besiteta, edo ito wasiri toregari embo da yai undugari Mamo da doda. ⁴ Toregari embo ito wasiri da gumaina, awa ito wasiri be, ainda imu daedo gumbata taogari da. ⁵ Buro butuda, awa, pie betare - jitabaita, donojiwae, beonotomana, sini gambari binei da wasiri, edo motou wasiri, edo rorae betari tumonde bain edera ainda nei. ⁶ Buro eiyawa Mamo da sinigambari gegae kinapeina de pisideira. ⁷ Buro eiya imo matu einda doda isite edo esiteta. ⁸ Boroko imo buro berari eiya doyo - daribetari, sinigambari, binei da kotembari, ge bebegae tari, edo beda ge sino pu da tari ainde. ⁹ Imo buro eiya doteta gido, ge pitawa teote, ¹⁰ Imo embo teka kotembari teka Mamo da jipapa awa eteta. ¹¹ Grik edo Jiu teote, tamo ainto kapari edo tamo ainto kapae, Babarien, edo Skaitien, embo buro itae edo buro embo, awa berari Mamo da edo Mamo awa embo berari da. ¹² Awatedo, Mamo Siroro arida avigari embo ango isiwo, kotopu edo dubobari mi, do ari dode, wasisiri dave berari de edo piari wotari tataimbari mi iwo, dengoro baiari dave awa ewo, edo iwata ae gede netegewo. ¹³ Kondade mina ara ewo. Ge dave de kera mina ara ewo. Embo nenei ge bunau taro gido, Mamo da Main mi nakare kotembedo doturisina ango ewo. ¹⁴ Buro berari einda kopiri awa dubobari. Buro dave berari ainda moka awa dubobari. ¹⁵ Mamo da Main da bega doiyo imonde itare, bega emi imo dao tesiri gumundo tamuda esiteta, awatedo Mamo Siroro ari awa ategeyo. ¹⁶ Mamo Siroro ari da Main da ge awa ito doda siriyo, Psalms, hymns edo giu ari ya awa embo nenei atopasiwo. ¹⁷ Buro ro eta, ge mi tako iwatami, buro berari awa Mamo da Mai da dao da eiyo. Ategari ainda dao da piyeyo. ¹⁸ Asinimai, ibonomai de piyewo tembare, buro eiya dave Mamo da yai. ¹⁹ Ibonomai, asinimai dubo buwo, edo asinimai de ge bunau teove. ²⁰ Kinapeina aimamo kotopu ewo, kotopu ari awa Mamo da jipapa. ²¹ Mamomane kinapeina beyae eove, awa kana bore. ²² Emboda buro embo, buro da mamo kotopu eiyo, jisi mi goteyari eote, ata Mamo adu eite do ito mi buro eiyo. ²³ Buro ro eta, ito dode asisi de mi buro Mamo da eta ango awa eiyo ata buro embo da eta ango awa eote. ²⁴ Mamo mi ito tau wasiri natopo sia ari awa piyaina. Awa Mamo da buro embo da tau ra. ²⁵ Edo wasiri beae ari embo da tau awa beae edera awa bara, edo ainda doari itae.