1
Asisi mi boroko arapa karigedo sira iji ambo be da embo juwae be tumonda ari ungo da awa dodo gebusari asisi ambo ambo ise edo binei da atopatari ambo ambo ise
2
ungo da wasiri edo kotembari mi ro sira awa adera.
3
Ungo atopatiri biae iyu aro ari edo indari kumbari nenei awa dourase sadera awarate ro ra awa isira awa ungo amemi jingama adi era awa God ategedo jingama adera ungo awe ge be edo tumonda ari gosera ami.
4
Awa sedo rora berari God mi itiri siroro isera amone ewamei be,roraro matu God da yei ategari itera awa jingama ari oju adi aera.
5
Amone God da ge de edo gegata de mi katabedo kumbudo aike itira.
6
Roviravi eiawa nanonamendi da jo da itesa,ami ari imo awa Iesu Keriso da kera ari embo ewamei adesa.Edo imo awa God da tumonda ari ge da bajadesa ami karigadira awa imo atopatari ewagaewa ambo ambo edo esa.
7
Awarate tamo pisida ge embo evetu ogogo mi dubobudo era awa ujoae ewo.Awa embo,ingo ingo suka ewagaewa mi atopatiwo.
8
Tamo pisi da atopatari ainda uso mina ane tegadara,awarate asisi da atopatari ainda mina awa nembodiba bera,ami adi sari wasiri boroko da edo iji puradira ainda awa itido ira.
9
Sari emone ge moka be edo wasiri ewamei mi beda ari.
10
Ainda be mi siri nango jarise edo buro okain be era. Ainda be re nangoda tumonda ari God wasiri de ainda yeida,embo amone embo berari da soregari embo,awe kawe mi ge be edo era awa embo.
11
Rora eiawa ge okain mi sise edo atopatiwo.
12
Doaso imo awa mei nembo ae gido embo nenei mi imo itoro wosose,awarate Iesu ge be ari embobo ainda yei,ge mi,wasiri mi,dubobari mi,tumonda ari mi edo ewagaewa mi.
13
Iji berari God da ge ajigurise,ge ewagaewa mi atopaputise atiroso na sekago engenembane.
14
Doaso binga sari embobo mi ge sera ainde God da buro ari embobo mi ingo iso tamonda itero asisi da kando burisesa awa doaso wosure.
15
Roviravi eiawa gido gogo'o eio.Be jo be ainda torio,awa aso embo berari mi imo babujesa awa gore.
16
Ro atopaputesa awa imo imo isuka be gido gogo edo eio.Doseta,iji berari awodo eio,wasiri awodo esa ami imo edo ungo amemi iso ge awa ingido era awa soregari badera.