¹ Iesu ese ena hahediba ma e hereva henidia, eto, "Taga tauna ta na mai ena kohu ireguna tauna, bena ia enai haida ese e habadelaia eto, emu kohu na e petapeta-laiamu. ² Bena taga tauna ese e boiria, bena e hereva henia, eto, "Dahaka name kamonai emu kara amo?" Emu heregu karadia herevadia ba hamaorogu, badina oina vada ba doko.' ³ Bena hari kohu ireguna tauna lalona e hadaia, eto, Dahaka baina kara, biagugu ese ina dagi vada eme kokia egu amo? Lau na asi goadagu tano iruhanai, bona lau na hemaraimu baina noinoi. ⁴ Mai dibagu dahaka baina kara, bema baine kokigu egu dagi amo neganai, taunimanima ese bae abigu dae edia ruma ai. ⁵ ABena ia ese biaguna enai e abitorehai taudia e boiridia, ta e nanadaia eto, "Emu abitorehai be hida? ⁶ Ia eto, "Dehoro kavabu sinahu-ta." Bena e hamaoroa eto, "Emu abitorehai pepana avabia, bena a helai diho haraga bena imahui ba torea." ⁷ Bena ta ma e nanadaia, eto, bona oi emu be hida? Ia eto, "Uit puse sinahu-ta." Bena eto, emu abitorehai pepana avabia, bena ba torea taurahani-ahui. ⁸ Bena Lohiabada ese kohu ireguna tauna mai koikoina e hanamoa badina be ena kara e karaia mai lalo-pararana ida. Badina be ina nega uruna taudia edia laloparara ese diari taudia edia laloparara e hereadiamu. ⁹ Na hamaoromuimu, sibomui ba hetura heheni kohu dikadia amo, bena ba dabu neganai oi na basie ore rumadia ai bae abimui dae. ¹⁰ Gau maragina e karaia maoromu tauna ese gau badadia baine kara maoro, a gau maragina e karaia kereremu tauna ese gau badadia baine kara kerere. ¹¹ Bena una dainai gau dikadia basio regu namonamo, daika ese kohu namodia baine henimu? ¹² Bona bema oi ese taunimanima idaudia edia kohu basio regu namonamo daika ese umui emui kohu baine henimui. ¹³ Hesiai tauna ta biguna rarua isiaidia basine lao heni diba, badina ne ta baine inai henia ta be baine lalokau henia, eiava ta baine badinaia, ta baine dadaraia. ¹⁴ Farasia taudia, moni e ura henia badamu ese una hereva e kamonaia neganai e kirikirilaia. ¹⁵ Bena ia ese e e gwau henidia, eto, "Umui na taunimanima vairadiai sibomui o heimodai hehenimu, to Dirava ese lalomui e dibadiamu. Badina be taunimanima ese e imodaimu gaudia na Dirava ese e dadaraidiamu. ¹⁶ Taravatu bona peroveta taudia edia hereva e miava ema bona Ioane ena nega. Una negana amo Dirava ena basileia e harorolaiamu bona taunimanima iboudiai e didi vareaimu. ¹⁷ Guba bona tanobada bae boio na mai dalana, a taravatu ena toutou ta baine boio na asi dalana. ¹⁹ Taga tauna ta e nohova, dabu kakakakadia bona aukadia e hadokilaiva bona dina iboudiai ai e moaleva bona aniani namo dia mo e aniva. ²⁰ Ena ruma iduaranai noi-hegama tauna ta ladana Lasaro e hekureva tauna be toto ese e dudua hegege. ²¹ Ena ura be taga tauna ana aniani momorudia bema ani. Sisia danu ela ia totona e demariva. ²² Noi-hegame tauna vada e mase. Bena aneru ese eabia Aberahamo dekena e laohaia. Taga tauna danu vada e mase bena e guria, ²³ mase gabuna ai, hisi eaniva lalonai, matana e roha dae daudauna ai bena Aberahamo e itaia, Lasaro danu ia ohena ai. ²⁴ Bena e tai lolo eto, "Tamagu Aberahamo e, mani a bogagu hisi Lasaro a siaia, imana kwakikwakina ranu ai aine urua diho malagu mo ai name hagavea badina be lau na ina lahi hururu-hururuna ai hisi na animu. ²⁵ To Aberahamo eto, natugu e, a laloa o mauriva dinadia ai gau namodia o abiva bona Lasaro na gau dika dia e abiva, harihari ia na tauhalo e abimu, a oi bena hisi o animu. ²⁶ Ina danu ita padadai koupa badana ta mia bona ene amo ta ini basine vasimu bona ene amo ta ini basine maimu. ²⁷ Bena Taga tauna eto, Tamagu e na noimumu ia na basiaia tamagu ena ruma bainela - ²⁸ Badina be tadikakagu na laima - ia ese baine hadibadia ina hisiani gabuna baema na garina. ²⁹ A Aberahamo eto, Mose bona peroveta taudia na dekedia ai, idia hari bae kamonai henidia. ³⁰ Ia eto, lasi Aberahamo Tamagu e, mase amo ta dekedia bema lao hari bema helalokerehai. ³¹ A Aberahamo eto, lasi idia na Mose bona peroveta taudia basiema kamonai henidia, mase amo ta bema tore isi danu basiema kamonai henidia. Translation done by: Ret/Dkh. Ori. C. Kohu on Friday (21/07/23), time: 12 10 am. Ready for quality checking.