¹ Harihari tax gogo taudia iboudiai bona kara dika taudia na e maiva Iesu bae hakala henia. ² A Farasia taudia bona Itorena taudia na e maumau etomava, "Ina tau na karadika taudia e haboudiamu bona ia ida e aniani heboumu." ³ Bena Iesu ese ina sivarai hegeregerena eha-maorodia. ⁴ Edena tau umui padamui ai na mai ena mamoe iboudiai sinahu-ta, bena ta bema raka boio, unu mamoe taurahanita-ahui taurahani-ta na tano gagaena ai basinema rakatanidia bena e raka boio mamoe na murina amo basinema tahu diba ela bona baine davaria, a? ⁵ Bena eha davaria neganai pagana ai baine atoakau, mai moale badana ida. ⁶ Ena ruma baine lou henia, bena turana bona dekena taudia baine boiridia baine hamaorodia, "Ai tame moale hebou, badina be egu mamoe ta e raka boio gauna na name davaria." ⁷ Na hamaoromuimu danu, guba basileia ai danu bae moale kara dika tauna ta baine helalokerehai dainai, a hari taurahanita-ahui taurahani-ta kara maoromaoro taudia daidia be asie uramu bae helalokerehai daidiai. ⁸ Eiava edena hahine na mai ena moni penedia gwauta, bena tamona baine boio, lamepa ta basinema haraia, bena ruma lalona baine daroa, bona baine tahua ela bona bema davaria, a? ⁹ Bena baine davaria neganai, una hahine na turana bona dekena taudia baine boiridia hebou baineto, "Ai tame moale, badina be egu pene tamona e boio na vada name davaria." ¹⁰ Ina dala tamona, umui na hamaoromuimu, moale na baine bada Dirava ena aneru vairadiai kara dika tauna ta do baine helalokerehai dainai. ¹¹ Bena ma eto, "Tau ta natuna na rua, ¹² bona tau muritai na tamana eha maoroa, "Tamagu e, lau egu kohu o karoaia gauna na ba henigu." Bena tamana ese ena kohu na eha-pararaia idia raruosi ediai. ¹³ Dina dia momo muridiai tau muritai na ena kohu iboudiai e abidia bena ela hanua daudauna ta, bona unuseni ai ena kohu iboudiai eha oredia ena lebulebu maurina ai. ¹⁴ Hari ena kohu iboudiai e ore neganai, doe badana ta e kau una gabu ai e noinoiva ena ogogami lalonai, ¹⁵ bena ela una hanua tauna ta enai eha gaukara, bena e siaia boroma baine ubudia gaukarana e henia. ¹⁶ Ia na e urava boroma e ubudia aniani dia baine anidia, ta ese danu ana aniani se heniva. ¹⁷ A ia na sibona lalona e parara, eto,"Lau tamagu enai e gaukaramu hesiai taudia na momo bona mai adia aniani, a lau be iniseni ai noho, hitolo ese be hamasegumu! ¹⁸ Lau na baina tore-isi bona tamagu dekena bainala bona baine hamaoroa bainato, "Tamagu e, lau na vada na kara dika Guba tauna vairanai bona oi vairamu ai. ¹⁹ Lau na dia hegeregere oi natumu ai ba halaogu, avabigu emu hesiai tauna ta ai ba halaogu mai davagu." ²⁰ Bena ia na e tore-isi bona tamana dekena ela. A ia dounu daudau lalona amo tamana e roha lao bona e itaia bena e bogaiahisi bena e heau henia, e rosia bona eha-rahua. ²¹ Bena mero ese tamana eha maoroa eto, "Tamagu e, lau na kara dika Guba tauna bona oi vairamu ai. Lau na dia hegeregere oi natumu ai ba gwauraigu." ²² A tamana ese ena hesiai memerodia eha maorodia, "Dabua namona ta a mailaia haraga ba hahedokilaia, bona imana gauna ba karalaia, bona tamaka ta ba hakaralaia aena ai. ²³ Boromakau natuna ta ba alaia, ba mailaia bona baita ania bona baita moale! ²⁴ Badina be ina lau natugu na e mase, hari ia na e mauri, ia na e boio, bona harihari ma tame davaria." Bena iboudiai e moale. ²⁵ Hari tau natuna roboana na imea ai. Ruma e raka henia kahiva ai, ane regedia e kamonai bona e mavaruva. ²⁶ Bena hesiai merona ta e boiria bona e henanadai ina be dahaka e varamu. ²⁷ Hesiai merona ese eha maoroa, "Oi tadimu na ema bona tamamu ese boromakau natuna na eme alaia badina be eme davaria lou mai namona ida. ²⁸ A tau guna na e badu bona asine ura baine raka vareai, bena tamana na e raka lasi bona tau guna na e noia. ²⁹ To tau guna ese tamana e haere henia eto,"Aitaia, lagani momo oi emu ai name gaukara, bona emu taravatu ta asina makohia, a oi ese nani natuna ta do se henigu bamogu ida baiama moale, ³⁰ a ina natumu na ema hari oi ese o henia kohudia iboudiai vada e peta-petalai ariara hahinedia ida, bena boromakau natuna ta na ome alaia ia dainai. ³¹ Bena tamana ese eha maoroa eto, "Natugu, oi na nega iboudiai lau ida, bona lau egu gau iboudiai na oi emu. ³² A ina na maoro baita aniani bona baita moale, badina ina tadimu na e mase, a hari eme mauri, bona e boio ina hari matame davaria."