¹ Bena Iesu ese ena hahediba eha maorodia eto, "Hekwakwanai gaudia na do bae vara, to bae havaradia tauna hari madi ihabaina! ² Ia enai namona na nadi metauna ta aiona bema gui laia bona davara ai bema tahoa dobi dia namo ia ese ini maragi-maragina ta baine hahekwakwanaia. ³ Sibomui ba henahuatoho. Bema tadikakamu na e kara dikamu, ba gwau henia; bona bema ia na e helalo-kerehai, ena dika na ba gwau-tao. ⁴ Bema ia na oi e kara dika henimu nega hitu dina ta ai, bona nega hitu oi baine lou henimu, be tomamu, "Vada name helalokerehai" Oi ese ena dika ba gwau-tao." ⁵ Apostolo taudia ese Lohiabada e hamaoroa eto, "Emai abidadama ame habadadia." ⁶ Lohiabada vada eto, "Bema emui abidadama na sinapi nadinadina na heto, umui ese ina budoa ba hamaoroa, 'Ba heraga isi, bona davara ai ba hehado," bona ia na oi be kamonai henimumu." ⁷ A umui daika, mai emu hesiai tauna ta tano iruanai eiava mamoe iregudiai, gabuna amo baine lasi na ba hamaoroa baoto,' Ina harihari aoma bona pata ai bame helai diho? ⁸ (Kahanai) Lasi, ia ini basine gwau toma, 'Gau ta a hahegaegaea lau ese baina ania, bona emu dabua beletana arioa bona isiaigu ba laoheni lau na anianimu bona na inuinumu lalonai, bona ini gau muridiai oi na vada bo anianimu bona bo inuinumu, a? ⁹ Ia na asi ena tanikiu hesiai tauna enai badina be ia na e hamaoroa karadia e kara dainai, ani? ¹⁰ Ina na hegeregere umui emu ai danu, bema umui na e hamaoromui gaudia iboudiai vada o karadia neganai, umui na baoto, "Ai na dia hesiai taudia namodia. Ai na dahaka baia kara gaudia mo ame karadia." ¹¹ Ia na Ierusalema e dae laova ai, ia na momokani Samaria bona Galileia padadia amo e hanai. ¹² Ia na hanua ta ai e vareaiva ai, lepera tataudia gwauta ese e hedavari henia. Idia na daudaunai e gini, ¹³ bona gadodia eha bada, e tomava, "Iesu, Biagumai e, ame bogamai hisi." ¹⁴ Ia ese e itadia neganai, (ia ese) e hamaorodia eo, "Aola emui helaga taudia ese bae itamui." bona vada e vara, idia dala amo e laovai, idia tauanidia vada e goeva. ¹⁵ Bena idia taudia ta, e diba ia na vada e namo, e lou ema, mai gadona badana ida Dirava e e hanamoava. ¹⁶ Ia na e hetuitui Iesu aena badinai, e tanikiu henia. Ia na Samaria Tauna. ¹⁷ Bena Iesu e haere bona eto, "Una be dia gwauta osi eme hanamodia, a? A taurahani-ta be edeseni? ¹⁸ Una na ta asie loumai Dirava bae imodaia, ina idau bese tauna sibona mo, a? ¹⁹ Bena ia ese e hamaoroa eto, 'Atore-isi bona aola. Emu abidadama ese vada eme hanamomu. ²⁰ Farisea taudia ese e nanadaia eto, Dirava ena Basileia be edena nega do bainema, ia ese e haere henia eto, "Dirava ena Basileia na dia ita eda nari namonamo amo do bainema. ²¹ Eiava dia baeto, 'Aitaia gauna oina!' eiava, 'Gauna ouna! Badina aitaia, Dirava ena Basileia na umui bogaragimui ai. ²² Bena ia ese hahediba taudia e hamaorodia eto, "Dinadia na e maimu bena umui na ouramu Taunimanima Natuna ena dina ta baitaia neganai, a umui ese na basio itaiamu. ²³ Bena idia ese bae hamaoromui baeto, Unu a rohalao! eiava ini a rohamai! Basio raka lasi eiava muridia ai basio heaukau, ²⁴ badina kevaru diarina guba kahana amo guba kahana elaomu hegeregerena, Taunimanima Natuna enai danu unu baine heto. ²⁵ A ia na guna gau momo ai do baine hisihisi bona ina uru taudia ese do bae dadaraia. ²⁶ Noa ena negai vada e vara hegeregerena, Taunimanima Natuna enai danu ini do baine vara toma. ²⁷ Idia be e anianiva, idia be e inuinuva, idia be e headavava, e headava heheniva - ela bona Noa lagatoi lalonai e vareai dinana, bona abata e kau bona iboudiai eha-buadia-tari. ²⁸ Lota ena negai vada evara hetomana - idia be e anianiva, idia be e inuinuva, idia be e hoihoiva, idia be e hadohadova, idia be ruma e karava, ²⁹ a una dinai Lota ese Sodoma e rakatania neganai, lahi mai siahu mase-masena guba amo e diho bona iboudiai e habuadia-tari. ³⁰ Ina evara hegeregerena danu Taunimanima Natuna ena hedinarai neganai na unu baine vara toma. ³¹ Una dina ai, tau ta ruma guhinai bona ena kohu na ruma lalonai, na basio hadihoa ena kohu baine abidia oho; bona murimuri tauna danu, unu hetomana basio haloumai. ³² Lota adavana ba laloa. ³³ Daika e hetahumu ena mauri baine abia, na baine reaia (ha boioa), a daika ese baine reaia (haboioa), na baine davaria. ³⁴ Na hamaoromuimu, una hanuaboi ai taunimanima rarua na geda tamonai bae mahuta. Ta be baine abia, a ta be baine hoho. ³⁵ Hahine rarua be uiti iririlaina nadina igirona gabunai. Ta bae abia-oho, a ta be baine noho. ³⁶ Tatau rua uma ai bae gaukara ta baine heabi oho, ta be baine noho. ³⁷ Bena idia e haere bona e hamaoroa eto, "Edeseni ai, Lohiabada? Ia ese e hamaorodia eto, "Tauani edeseni ai, galo danu unuseni ai do ba hebou."