¹ Iama eraḡi maḡe ḡahisa ia negu ia Vesioka meve kiogevare ḡumava koita be iabera erageisa; gerege iaka beta maḡe be iai Mame vava uiare au ḡasina mimi vara. ² “Eige ana koita be iaheḡi iaḡa be moimima, ia negu bitivakava kime, erehuta tarata ḡahaia dubu uhura mati orogo kiare naḡate, gerege koita iabara motea geisa. Riaḡa vara daki ia kirogeima, iaukamu subuta ibinava manu. ³ Eduge a koita be iaheḡi iaḡa be moimare ḡoiege, ai ada vaga negu dibana ḡoime otavado ai ada vamaḡave kima, ⁴ eige a ḡoḡohu ai iahe iaheve kiare, renu ai Mame iorena a eraḡare auna ibinava a moimisa. ⁵ “Renu ia imimi raḡege, ia negu be iau naḡate rahi imimi raḡime. Iauka ura raḡi dubu uhura rahi imimi raḡisa mati ḡuma eḡiahu rahi imimi raḡisa, gerege koita iabara so erageisa. Riaḡa vara daki roma, iaukamu subuta ibinava manu. ⁶ Eige a imimi visa roege ama oti ai daituhe sirivare udua iaevi kouare ana ḡoḡohu ai Mame imiḡisa. Gerege ai Mame iorena a eraḡare auna ibinava a moimisa. ⁷ “Renu a imimi viege ia negu ga maka veite ro geime, Dirava dibane veite ḡahava kiare naḡate; iau anavare auka iau gare ihima badiva iauka ga dadaḡa roiare dainehe. ⁸ Ia negu iau imimi raḡare naḡate kime, badiva iai Mame ramu aka so imimi veite auka subuta ge auki dibana ana otavado a ḡahara vima. ⁹ “Eige onakime iana imimi raḡisa: Dirava ni Mame vava uma, ai ihera aena vara. ¹⁰ Ai basileia ramu oroḡisa. A ḡahara vare noma kisa, vata ketake o ada kisa vava kiare naḡate. ¹¹ Negu vani oi noie no mohigeisa. ¹² Mati ni daureve vahu geve, no be iau daureve vahu gevare naḡate, ¹³ A negu daure uhura no idigei otime, eduge daure uhura ama no iahe geisa. Badiva basileia renu hedo renu eravaḡa maḡe iabara aiera negu oti behi behi. Amen. ¹⁴ Gerege ia bebe iau daureve vahu gevege, iai Mame vava ramu iai daureve tage vahugeige vara; ¹⁵ eduge ia be iau daureve vahugeige veite ḡahare, iai Mame vava gera beta iai daureve au ia vahugeige vara. ¹⁶ “Renu a aena vi tamuta veite ḡoiege, a negu ni berabe vime, erehuta avaunaḡe ḡahaia kiare naḡate. Iauka iau eravaḡe ena kiege koita iabara rosa iauka vaḡoro raḡime iauki. Riaḡa vara daki ia kirogeima, iaukamu subuta iau damune manu. ¹⁷ Eduge a tamuta veite ḡoiege, ama ai nie ketovare renu ai omote tage kisa, ¹⁸ gerege be iabara beta dibana ḡahiḡa vara a vaḡoro vare, edube ai Mame ḡoḡohu a kiare eraḡare auna damunava a moimisa. ¹⁹ “Ia negu vata ada oi gure iai kohue bougeime, gerege pitoroka ramu iogeisa mati vaho ḡahe iabara iaga hosaḡi vaho raḡira vara; ²⁰ eduge iama vava iai kohue bouge vare, iaḡa daure be se vaho ḡaha ḡaitage beta iaga hosaḡi vaho raḡira vara. ²¹ Gerege oreigena a ai kohue bougeima, ai soruke tage ramu eigera. ²² “Ni ahata make ramu erehuta ni ni abagera. Eige ai nie maḡe ḡahare, ai ahata make inuhati geramu abaga ḡahiḡa vara; ²³ eduge ai nie daure ḡahare, ai ahata make inuhati ramu vadibu ḡahiḡa vara. Gerege negu abaga e ai uhurehe vadibu ḡoiare, ai uhure vadibua ramu raho ketakera. ²⁴ “Koita bera beta bia abu iau besu besu koitave ḡoiḡo vara; badiva auka be betia ḡahisa mati bera ḡahara visa; se auka be maḡe ḡahisa, bera auka daure ḡahisa. Eige aka beta Horu mati ahata maka abu ruḡa iau besu besu meve kobuḡa ḡahi kiki vara. ²⁵ “Eige daki ia kirogeima, ia negu maḡuri anana raḡime, iana otavado demaka se eia iogeisa, se ana otavado ogona be bodibo vanu. Maḡuri vana a demaka iare eḡu, renu ahata maka vana a ogona gahara viare eḡu se? ²⁶ Ana niḡahi uguha vava erageima, iauka beḡi-beḡi veite, taboro veite se bougeige veite, eduge iai Mame vava uiare eraki vasi geima. Edube iakamu beta uguha vire ruḡa geregereve iabara? ²⁷ Renu ia bena beta anana vanu iai guragu maḡurive tinabe ḡamana ḡahiḡa vanu? ²⁸ Esemena ia gure ogona uhu anana korahiva raḡa? Ama iana idi eravaḡa maḡe kobo raḡoha eraḡa, orenaki ge iau kobo raḡanu; iauka me veitera se ogona tigu-tigu veitera, ²⁹ eige daki roma, riaḡa Solomona au iaḡa dadaḡa uhura au ogonave ra idi eravaḡa maḡe vire naḡate veitera. ³⁰ Eduge Dirava ḡati kobo raḡare ḡodo gevare, orena negu gera maḡurive edube vahiḡu gera iauka mi vene kira kira vara, eige auna beta enaki ogonava a ḡodoḡo vanu. otavado ihihi avieva ianu. ³¹ Gerege ia negu anana raḡi, roege, ‘Nona otavado demaka be isa?’ se ‘Nona otavado eia isa?’ se ‘Nona otavado be bodibo vanu?’ ³² Eige iaḡa o iabara Dirava riaḡa ḡahiḡa veite ḡahava iaberaki nega inuhati anava; mati riaḡa iai Mame vava gera dibana ia ḡahara raḡoha iaḡaniva inuhati. ³³ Eduge iama Dirava basileiave uriḡoi iaḡoisa mati au ḡuma ieririve iaḡoisa, gerege iaḡa o inuhati ḡaitage auna ia mohigeisa. ³⁴ “Eige ia negu vahiḡu anaime, badiva vahiḡu tage avaḡu au huhuve auna anaisa. Negu vani o huhu vara geregere vera noka beta mati nu iaḡa mi adahe maema vara.