¹ Iesu raki koita dadaḡa era gevare auki nimu ada ḡadimi guramanu; itaharahe au ḡamituhe iabaraki au ḡasina otinu. ² Gerege auki urimi gavi, mati uguro ḡahigei, roege: ³ “Goroa ḡahe iaberamu heḡiri raḡisa, badiva va basileia vara iau era. ⁴ “Niḡo raḡohare iaberamu heḡiri raḡisa, badiva iauka uhudau ḡahigeige vara. ⁵ “Uhu maḡe ḡahava iaberamu heḡiri raḡisa, badiva iauka vata o mimi vara. ⁶ “Ḡuma maḡe ḡubuva raḡare mati eia hoḡeva raḡare iaberamu heḡiri raḡisa, badiva iauka de bubu raḡira vara. ⁷ “Vaḡahu ḡahava iaberamu heḡiri raḡisa, badiva iauka uhudau ḡahigeige vara. ⁸ “Iau soruke inuhati Dirava moimare iaberamu heḡiri raḡira vara, badiva iauka au udume mimi vara. ⁹ “Mai kiare ḡaheva iaberamu heḡiri raḡira vara, badiva Dirava ra idigei au ḡamuhe ro geige vara. ¹⁰ “Iana oḡore iana iau ia besibe ḡahigeva ia di dainehe ḡuma maḡe kiare, va basileia vara iai era. ¹¹ “Di dainehe ge koita iaberamu ia daure ḡahigei renu iai ada ga avaunage raḡi renu ia huhu ḡahigei, badiva iaka di itahe oḡiare ḡahava iabara. ¹² Iama heḡiri raḡohisa, badiva iai damune vava gera raho ketakera, eige ḡuma kobuḡa oige iauki peroveta uridane onaki besibe ḡahi gevege. ¹³ “Iakamu vata ketake o damena vara, eduge damena au mamine kosavare, nona orenaki au mamine ki ḡoiraḡohisa? Auka bina beta iaḡa be maḡe ḡahiḡa vara, edube iauka mi ḡeahu kira vare renu vasi au ada rahi ioa raḡira vara. ¹⁴ “Iakamu vata ketake o uhuḡati abaga vara. Oḡo be nimu ada kiare era beta ḡoḡohu ḡoiḡoara.” ¹⁵ Bera beta lamepa iahure mare mi maua derikahu maema vara, eduge au maema gabuhe maemege auma iaga ḡahava inuhati abaga mohigeisa. ¹⁶ Ḡuma kobuḡa ei iai abage ramu uriḡoi koita iau ḡaruisa, gerege iauma iai me maḡeve eragei mati iai Mame vava motea ḡahisa. ¹⁷ “Ia negu anai rome da oroḡane ra Mose aenave se peroveta ḡaha sebogeisa; da oroḡane beta sebogeisa edube iau gare riaḡa ḡahiḡa vara. ¹⁸ Gerege riaḡa vara daki a boriti ḡahima, oti va o mati vata ketake ora veite ḡahisa, aena ga kobabe se uhura gava kobabe tage beta aena oi veite ḡahiḡa vara, ate aena o maka riaḡava inuhati geramu ḡaḡae ḡahisa. ¹⁹ Gerege unuhuna aena avie o be dodoi, renu koita be ḡanito ḡahigei iauka ḡuma kobuḡe kisa, iauka va basileia uhura ihie koita ḡoiḡo vara; eduge unuhuna aena riaḡa ḡahi mati koita be iaheḡi uguro ḡahima auka va basileia uhura au ihe ra raho ḡoiḡo vara. ²⁰ Iakera daki ia kirogeima, oti iana iai uhure inuhati Dirava meve kiki veite beta Aena kiare ḡaha mati Faresia ḡaha iau naḡate, Dirava ra beta riaḡahe ia idigei au va basileia uhura siri raḡira vara. ²¹ “Iakamu ihege koita iabaramu subuta roege, ‘Ia negu ḡa kime’; mati ‘ana unuhuna ḡa kiare koita vanu iauka aenava a maema vara.’ ²² Eduge akera daki aki roma ana ai nane se ai amakine a hoḡa geima, iauka ami kotava a maema vara; mati ana ga daure vima ai nane se ai amakine, iauka ami aena ḡaha mohi gei gevara; renu a roiare, ‘Uhura veite,’ iauka ami vene uhura a kira kira vara. ²³ Eige ana dubu Dirava moimisa roege, edube ama anana visa ai oḡo nane tage ramu ai uhu huhu tera, ²⁴ ama a Dirava moimare mi pata aenava so maema veite; eduge ama uriḡoi oti ai oḡo nane ḡore bebe vasi maḡe kiare, gerege ana ḡoiraḡi oti a Dirava moimo rone maemisa. ²⁵ Ana koita be ami kotava otege ama vaina au ruta bebe maḡe ḡahigeisa, edube a negu ei tiare au ami aena ḡaha mohigei, iauka ami vadibu iagava a maema vara. ²⁶ Riaḡa vara daki aki roma, eige ana gurami ate a moni damuna inuhati ana kiogeisa. ²⁷ “Iakamu ihege iaukamu ronu, ‘ia negu ni muduka raḡime.’ ²⁸ Eduge daki iaki rogeima, unuhuna maḡi be eraḡi ḡamana ḡahare au uhure au ḡahara vima aukamu au sorukehe ni muduka vanu. ²⁹ Gerege ai vamaḡa kasiva nie ḡuma daure kiege ama ḡiroi hakivare mi negevisa. Badi vara ai ahata make tinabe dauḡare eramu maḡera, a beta maḡe a ai ahata make inuhati mi vene uhura kira vare. ³⁰ Ai ada vamaḡe ḡuma daure kiege ama dodovare mi negevisa. Badi vara ai ahata make tinabe dauḡare eramu maḡera, a beta maḡe ai ahata make inuhati vene uhura kira vare. ³¹ “Mati onakime iauki ronu, ‘Unuhuna au mabare betia ḡahima, auma au ḡaremare pepava maemane moimisa.’ ³² Eduge iakera daki ia kirogeima; ata be au mabare ḡaremare, beta auka ni muduka maḡi dainehe, eduge unuhuna maḡi au mobore ḡaremane auka ni muduka maḡi vara; mati maḡi e mare atava tage ni muduka ata vara. ³³ Akamu ḡaitana ihinu iaukamu subuta ḡahe iabara iauki boriti ḡahi gevenu, ‘Ia negu ia ominue raḡohane e hosaḡime, eduge otavadoana a ominue ḡahanu Rohi Bauge vaḡotoni ronu ama meva kiogeisa.’ ³⁴ Eduge akera daki aki roma, ia negu ominue raḡohime, va ihiva rome, badi vara era Dirava terona vera, ³⁵ se vata o ihe tage beta rosa, badi vara ora au vase maema gabu vara, se beta Ierusalema ihehe, badi vara era Rohi bauge oroḡane oḡo vara. ³⁶ Renu a negu ai omotehe ominue vime, badi vara aka beta riaḡahe omo hanaka kobabe mi kae se dubu ḡahiḡa vara. ³⁷ Edube ai gare ramu rosa ‘Riaḡa, Riaḡa’, se ‘Veite, Veite’; ana mati iaḡa bena a roma era diabolo seni ge auki oroḡima. ³⁸ “Iakamu ihege iauki ronu; ‘Ana koita be nie kiege au ḡiroi hakivanu ama ai nie tage ḡiroi hakivisa, renu ana koita be eḡie kiege au kokivanu ama ai eḡie tage kokivisa.’ ³⁹ Eige daki ia kirogeima, ia negu ḡuma daure kiare koitava daure kiogevare damunava kime. Edube koita be ai vamaḡa tihie madavege, ama aniḡoi ge auma ai vaḡa tihie tage madavisa; ⁴⁰ mati koita bena a mi kotava a maemi ai ahata ogonave iau dainehe, ama uhura ogonava tage mi moimisa; ⁴¹ renu koita be ḡumaḡa a ḡanito ḡahi aka iaheḡi au iaḡane agogei tinabe ḡamana otisa, ama agohi tina kibeta ḡamana ḡahi otisa. ⁴² Koita be ai iaḡa be imimiva viege ama moimisa; mati koita bena ai iaḡa be mare ihie auna damunava kiki roma, ama moimisa. ⁴³ “Iakamu ihege iauki ronu, ‘Ama ai vasire ḡahara visa, a enana ḡahare ama betia ḡahisa.’ ⁴⁴ Eige daki ia kirogeima, iama ia enana ḡahi gevare iama iau ḡahara raḡisa, mati iai ḡuma daure kiogevare iau ada iama imimi raḡisa, ⁴⁵ eige iana iai Mame vava uiare au ḡamuhe ḡahisa; badiva auki vani kiege auki ḡaruima koitaia daure mati maḡe iau ada, mati auki veni no mohigeima ḡuma maḡe renu ḡuma daure kiogevare iau ada. ⁴⁶ Eige ana ai ḡahara raḡare eḡuge iau ḡahara vima, ana otavado damu be mimi vanu? Gerege moni gogoare ḡahava ḡaitage enakime iauki kia iau moni gogoare ḡahava eḡu iauki ḡahara raḡa? ⁴⁷ Mati ana ai oḡo nanuhe eḡu maḡe ḡahigeisa, ana negu orenaki koita nubaḡa iau kisa? Gerege Dirava riaḡa ḡahiḡa veite ḡaitage enaki ḡuma kobuḡa ena iau kia? ⁴⁸ Eige ama heroḡu kisa, ḡuma kobuḡa ei Dirava ni Mame vava uiare era ieriri vera.