¹ Gerege Horu Aenava raki Iesu nisiḡami mata ḡaḡaeva otinu diabolo so tohoḡisa. ² Eige auki vani utu-ababu mati vahi utu-ababu aena vi tamuta veite itaharahe auki ḡubu raḡanu. ³ Gerege diabolo raki oroḡare kironu. “A Dirava Moe ḡoinu, muni o ḡanito ḡahigeve iau ḡoiraḡohi parao ḡahe.” ⁴ Eduge Iesu raki boriti ḡahanu, “Edube Buka aenava ramu ronu, ‘Koita bera beta demaka eiḡu auki maḡuri vima, eduge ga inuhati Dirava avaḡehe ro hakivare era.’ ” ⁵ Gerege diabolo raki nisiḡami oḡo aena, Ierusalema otinu, eige auki mi oti dubu ada ramanu, ⁶ auki kiroege, “ A Dirava Moe ḡoinu, oi geroi uguha; edube Buka aenava ramu ronu, ‘Dirava aukena au aneruve ḡanito ḡahi gevege iauna ada ami ugu raḡisa,’ renu ‘Iauka ada a kamui ugu raḡira vara, gerege ai vase ra beta muniva ḡadiḡa vara.’ ” ⁷ Iesu raki kironu, “edube Buka aena ramu ḡaitana ronu, ‘A negu Rohi Bauge ai Diravate tohoḡime,’ ” ⁸ Gerege Diabolo raki ḡaitana nisiḡami otinu nimu ḡadimi kobokahe tiare auki vata ketake basileiave ḡaḡiromi, au erara vaḡa maḡeva mati iaḡa maḡe inuhati uhurahe; ⁹ renu diabolo raki kironu, “A eragevare iaḡaniva inuhati daka mi a moimo vara, a vata komuko daivi renu ama da maḡe ḡahisa a Dirava au kiare ḡumahe.” ¹⁰ Iesu raki kironu, “Ḡeahu ote, Satani! Buka aena ramu ronu, ‘Dirava ai Rohite eḡuge ana maḡe ḡahisa, renu auḡuge ana au meve kisa.’ ” ¹¹ Gerege diabolo raki ḡaremi ḡeahu otinu, ḡamana veite aneru iaberaki oroḡime iauki iaheḡanu. ¹² Eige Iesu raki ihege Ioane iauki mi vadibu iagava maemanu, gerege auki ḡoiraḡi Galileia otinu. ¹³ Auki Nasareta ḡaremare oti Kaperanamu gurami Galileia gohu ḡaika, Sebuloni mati Napatali iau matamehe, ¹⁴ eige otavadoana peroveta Isaia rone eraki riaḡa ḡoinu: ¹⁵ Sebuloni mata, mati Napatali mata, ḡumahe oti eve, hakivi Ioridana kasihe, Galileia koita nune nune ia gurahare matahe, ¹⁶ koitava vadibu uhura uiare ḡahava iauki abaga ketake be eraḡanu, renu iana oḡore ia mata ei uiare, renu vadibu uhura maḡuri raḡa Dirava abage ramu iai ada oroḡanu.” ¹⁷ Nega eige Iesu raki avaḡu haroro vi, roege, “Iai daureve iau ḡoiraḡohiahe, badiva va basileia vara hugure.” ¹⁸ Gerege Iesu Galileia gohu ḡaika oḡi otege uhura, auki ni ḡahi ata abu oḡo nana iabera era gevenu, Simona au ihe bera Petero, renu au ḡoḡe Anderea, iauka eve ḡaha iabara eige iauki iau reke eve maemege. ¹⁹ Iesu raki kiro gevenu, “Di itahe oroḡiahe, gerege dakena koita iaḡoia ḡumava ia mohi geisa.” ²⁰ Gerege iauka iau rekeve ḡare gevare urihi au itahe otinu. ²¹ Au ei urimi otege, auki niḡahi ḡami abu era gevenu, Iakobo mati Ioane iauka Sebedeo ḡamuhe iabara. Iauka vanaḡiva ge iauki iau Mame Sebedeo ruta, iau rekeve gure reḡu gevege, gerege Iesu raki ihiro gevenu. ²² Iauki vaina vanaḡiva iau mame ḡarehare iauki au itahe otinu. ²³ Gerege Iesu raki Galileia matava inuhati otime auki dubu uhura uguro viege mati va basileia hari maḡe gava ro gevege. Renu dika nune nune mati koitaia dika raḡohane inuhati maḡuri ḡahi gevege. ²⁴ Iauki au badine ro ioa raḡege Suria matava inuhati uhura. Gerege koita iabaraki iau dika nune nune, ahata huhu, vasi hoeke, se be iabera oḡiḡi veite inuhati idigei Iesu ḡasina oroḡege auki maḡuri ḡahi gevege. ²⁵ Gerege koita dadaḡava raki Galileia seni au itahe ioa raḡege, oḡo utube iau, Ierusalema, Iudea mati Ioridana mata hakirahe.