¹ Ioane Babatiso nega ei Iudea mata ḡaḡaeva hakivi auki Dirava gare roege, ² “Iama iai ḡuma daureve ḡare geisa, badiva Basileia ramu hugure.” ³ Oramu peroveta Isaia koita be gare vane renu auki ronu, “Eno be ramu mata ḡaḡaeva gure to roma: ‘Rohi Bauge ḡumaḡe baoviahe, iama au oḡiare ḡumava ieriri ḡahisa.’ ” ⁴ Ioane ogonave ramu kamela homoka renu au vadakahe ge auki au negotanehe bodivi, renu au demake ramu isoiso mati ura idi tahaka. ⁵ Gerege Ierusalema seni renu Iudea inuhati koitava iabaraki au ḡasina otege, mati Ioridana iaro hakira oḡo ḡahava inuhati. ⁶ Iauki iau daureve ḡaḡae rogei, auki Ioridana tinavai babatiso ḡahi gevege. ⁷ Eduge auki Faresia mati Sadukea ḡaha dadaḡa iabaraki au ḡasina babatiso oroḡonu, auki boriti ḡahi gevenu, “Inuhu ḡamika ma ḡahanu! Unuhuna roma iaka so Dirava hedokehe siviḡoro raḡohisa? ⁸ Oti me maḡe be kiogeisa eraki ia maḡuri maḡe mane ḡaḡae kisa. ⁹ Ia negu rome iaka ḡuma daure vara ia ḡare gevenu, ‘Noka Aberahamo raki ni tene’; iakera daki ia kirogeima, Dirava ra riaḡahe muni o idi gevare Aberahamo vahiruhe kiogei gevara. ¹⁰ Negu tage ḡuma ra baobao vera; eige idi inuhati madika kiki veite iama iau umukehe dodo gevare idigei vene uhura kira geisa. ¹¹ “Daka eiava ge daki ia babatiso ḡahigeima iai ḡuma daureve ḡare gevene dainehe, eduge di itahe oroḡare au hedoke ramu raho ketake; renu daka au vaḡotoni maḡe veite au vasi iaḡane agohisa. Auka Horu Aena mati hedo ruta ge auna a babatiso ḡahisa. ¹² Au koni kasai me ḡahare gini vara au adehe, eige auna koni kasagei maḡeva genegei idigei ḡosiḡare iagahe reḡui ḡosigeisa; eduge koni momono daureva iabera auna idigei vene raḡi behi behive uhura kira geisa. ¹³ Gerege Iesu raki Galileia seni oroḡime auki Ioane ḡasina Ioridana otinu, auka babatiso ḡahisa. ¹⁴ Eduge Ioane raki imiḡi onaki ronu, “Akena bu da babatiso ḡahisa, esemena a di ḡasina oroḡi roma daka a babatiso ḡahisa?” ¹⁵ Eduge Iesu raki kironu, “Da roiare so negubutu kisa; ḡuma ora Dirava urave roiare nona kisa.” Gerege Ioane raki Iesu gare meva kinu. ¹⁶ Eige auka Iesu babatiso ḡahanu, auki eiava seni hakivanu, tutube viege va uduava raki baoraḡi, auki Dirava Horuve eraḡege auki vava seni uguhi erehuta uguha naḡate au abage au variada. ¹⁷ Gerege eno be raki vava seni uguhi onaki ronu, “Ora di Moera, di soruke, renu di heḡirive au gera raho ketakera.”