¹ “A negu be iau daureve gava vime, ḡuma kobuḡa ei Dirava ra beta ai daureve gava vivi vara. ² Eige Dirava ramu ḡuma kobuḡa eige auna a be iau daureve gava vane ai kisa, renu Dirava ramu aena kobuḡa eige auna a be iau daureve gava vane ai kisa. ³ Esemena a idi tarana ai oḡo nane niehe gava vima, eduge aka ai niehe idi bauge era aka erara veite? ⁴ Se ana orenaki ai oḡo nane kirosa, ‘Da ai niehe idi tarana e ariḡima,’ a aka idi bera ai niehe? ⁵ Tarata koitaia, uriḡoi ai niehe idi tarana e ariḡare, gerege ana reḡunaki niḡa niḡa viare, ihie ana ai oḡo nane niehe idi tarana e ariḡisa. ⁶ “Ia negu aena iaḡa be mi totoka mohi geime; renu ia negu iai aḡevade idigei oho iau vaḡotoni kira geime, iau negu adahe rahare renu aniḡahare renu ia mato geime. ⁷ A imimi viege auna a moimisa; a iaḡoege ana behuḡisa; a pidi-pidi viege auna ai uduane bao visa. ⁸ Gerege unuhuna imimi vima auka moimo vara, mati unuhuna iaḡoima auka au ḡaḡae kiki vara, mati unuhuna pidi-pidi vima auka au uduane bao bao vara. ⁹ Unuhuna iai vaḡotoni, bena au moe parao imimi viege, auna muni be mi moimo vanu? ¹⁰ Se ana riaḡahe au karava roege, inuhu mi moimo vanu? ¹¹ Gerege iana negu, uhu anana daure ḡahava ḡaitage dibana iauna orenaki iaḡa maḡe idigei iau ḡamuhe mohigeisa, eige iai Mame vava uiare eramu iaḡa maḡe dadaḡa mohigeige vara ia imimi raḡare negahe! ¹² “Eige ia iaḡa inuhati ḡahara raḡi be iau kiare naḡate iauna so ai ḡasina tage kiare; oramu aena mati peroveta ḡaha iau uguro garera. ¹³ “Ḡuma avieva sirivisa; au uduane ramu radarade mati ḡuma vara ageraḡira vera, ḡuma era daure uhura ge auki otima, renu ḡuma ei otare ḡahava iabara dadaḡa vara. ¹⁴ Edube ḡuma avie eramu bereberera, eramu maguri ḡuma vara, renu koita rore beḡuge raki behuḡanu. ¹⁵ “Iama peroveta avaunaḡe ḡahava iau gabide misa, iauka mamoe eravaḡa naḡate ororo vara, edube iau uhure iabera ura totoka daure iau naḡatera. ¹⁶ Eige ḡuma kobuḡa ei iana au make eraḡisa. A idi madika maḡe ena idi garanate auge iau mia, se idi maḡe ena maha garanate uhura au madika kiki veite? ¹⁷ Idi maḡe vara maka maḡe kiki vara, eduge idi daure vara maka daure kiki vara. ¹⁸ Idi maḡe vara beta maka daure kiki vara se idi daure vara beta maka maḡe kiki vara. ¹⁹ Idi be maka maḡe kiki veite, iauma dodovare vene uhura kira visa. ²⁰ Eige iana au make riaḡava erageisa. ²¹ Beta koita inuhati dai roia, ‘di Rohite, ‘di Rohite,’ iana va basileia uhura siri raḡisa, eduge oḡoreana di Mame vava uiare meve kiare ḡahava eḡu. ²² Vani eige koita dadaḡava ramu daki roro vara, ‘di Rohite, di Rohite, nona ai ihehe peroveta raḡira veitenu, renu ai ihehe sua daure oia geige veitenu, renu ai ihehe noki me bauge dadaḡa kiogevenu?’ ²³ Gerege dana kiogei rosa, ‘daka a erara veitera; ḡeahu otiahe, ḡuma daure kiare ḡahava maḡahanu.’ ²⁴ “Gerege oḡoreana di gare ihare renu meva kiare ḡahava iabera erehuta uhu anana maḡe koitava naḡate au iage mi muni ada kisa. ²⁵ Veni ḡoromare, eia abata orogi, renu nono ḡugui iaga ei ḡadimi, eduge iaga era beta desuraḡira vara, badiva auka muni ada ge auki ḡonu. ²⁶ Renu oḡoreana di gare ihare, edube auka me ḡahiḡa veite auka erehuta atabe ga ihihi veite oti au iage siḡu ada ḡonu. ²⁷ Veni ḡoromare, eia abata ḡadimi renu nono ḡugui iaga ei ḡadimi, iaga eramu desuraḡira vara, auka desuraḡi dudu ketake ruta!” ²⁸ Iesu ga o rogevene itaharahe, koita iaberaki ḡaḡu raḡohi au uguro viege ḡumahe, ²⁹ au uguro viege erehuta auka hedokate ga o riaḡa ḡahi geisa, renu beta aena ḡahava uguro raḡare naḡate.