¹ Iesu raki au ḡamituhe utube abu ihirogei bouge vare mati hedo mohigei, iauka sua daure oiageisa mati dika nune nune mati huhu nune nune inuhati maḡe ḡahi geisa. ² Au apostolo utube abu ihiva iaukamu onu: uriḡoi geramu, Simona, au ihe bera Petero, mati au ḡoḡe Anderea; Iames renu au ḡoḡe Ioane iau mame ramu Sebedeo. ³ Filipi mati Batelomeo; Toma mati Mataio auka moni gogo koitava; Iames auka Alepeo moe, mati Tadeos. ⁴ Simona auka Kanana koita vara, mati Iuda Isakariota auki Iesu bive kinu. ⁵ Iesu raki ata utube abu besugei hakivare auki ḡanito ḡahi gevenu: “Otiahe ia negu koita nune nune iau ḡasina oti geima, mati ia negu Samaria ḡaha iau oḡe bei siri raḡohime, ⁶ eduge iama Isaraela mamoe dauraḡohane iau ḡasina otisa. ⁷ ia otare uhura iama hari maḡe gava boriti ḡahigeisa, ‘va basileia ramu hugure raki. ⁸ Iama dika ḡaha maḡe ḡahigeisa, hoḡe maḡuri ḡahigeisa, dika nune nune maḡe ḡahigeisa, sua daure oia geisa. Eige otiahe daka beta di damune roro vara, eige otiahe ḡuma kobuḡa ei kisa ia negu iau damu rome. ⁹ Ia negu muni tahaka be mi otime, ¹⁰ koita be negu ioa oi au iagode mime, se ogona abu, se vasi iaḡa, se oḡiḡi besoke; edube me ḡaha iabara iau de bubu iaḡane auka mimi vara. ¹¹ Iana oroḡi oḡo bauge bei se avie bei ia siri raḡoha, oti iaḡo iaḡo raḡisa unuhuna iai ḡahara vare e ruta iana gurahi ate ia oḡo e ḡarehisa roege. ¹² Ia iaga ei oti siri raḡohege iama maḡe ḡahi geisa. ¹³ Iaga e ḡahava ia maḡe ḡahi gevege, iama Dirava maive iau ada maemisa. Eduge iau ia maḡe ḡahiḡa veitenu ia negu maḡe ḡahigeime. ¹⁴ Mati koita be ia maḡe ḡahiḡa veite se iai gare ihihi veitenu, iama iai vasi souke ei iei gevare iana ḡaregeisa. ¹⁵ Riaḡa vara daki ia boriti ḡahi geima, berabe vani eige aukamu Sodoma mati Gomora mata koitava vaḡahu ḡahi geige vara. ¹⁶ “Ihiahe, dakamu koita iau uhura ia besugei hakiha erehuta mamoe besugei ura totoka daure iau uhura; eige iama uhu anana maḡe ruta gurahisa mati ḡuma ieririve maḡuri raḡisa. ¹⁷ Iama uhuiamisa, iaukamu ia idigei aena ḡaha mohi gevare mati iauka iau dubu uhura ia hodi geige vara; ¹⁸ renu koita iaberamu ia di itahe oḡiare dainehe ia idigei oti Roma rohiva ia mati aena ḡaha iau vaḡotoni otito vara, iaka di badi maḡeve rone riaḡa ḡahisa. ¹⁹ Iau ia idigei otege, ia negu anana raḡime iana orenaki ga raḡira vanu se otavado roro vanu; ni Mame vava uiare eraki mi iai ḡaḡae kisa iana otavado roro vanu. ²⁰ Eige beta aki ga visa vima, eduge iai Mame vava uiare Horuve aukena iai uhurehe ga visa. ²¹ Oḡo nana bera avaḡu au oḡo nane hoḡe kisa, mati mama iabera iau ḡamuhe iaue kiogeisa, mati ḡami iaberamu iavaḡu iau iahuve iau hoḡe ḡumaḡe kiogeisa; ²² renu koita inuhati gena ia betia ḡahigeisa di ihe dainehe. Eduge unuhuna uhu berebe kiege oti netu netua koita vara maḡuri vara. ²³ Iana oḡo bei otege iau ia betia ḡahigeva, iama ḡarehi bei otisa; eige riaḡa vara daki ia boriti ḡahi geima, Koita Ḡamika vara Dirava maḡeve ruta ororo vara, edube iaka au meve kiogei kosako veite Isaraela oḡo inuhati uhura. ²⁴ “Ḡami bera beta au biage variada gera, se besu besu koita be tage beta au biage variada; ²⁵ edube au ḡamite eramu au biage naḡate ḡoisa, renu besu besu koita tage au biage naḡate ḡoisa. Eduge iau iaga e biava ihiva Belsebulo roiare, iauna orenaki au iaga ḡahetuhe ḡaitage ihi daure iauni ro geige vanu! ²⁶ Eige ia negu siḡa ḡeime; iaḡa be iau ḡodomare auna beta ḡaḡae ḡahiḡa vanu, mati iaḡa be ḡoḡohu iauna beta ro ḡaḡae ḡahiḡa vanu. ²⁷ Otavado ana da vadibua aki roma, ama vani abagava ro geisa; mati otavado a ga ḡamikava a ihi gevenu, ama mata ketake oi gava rogei raho ḡahisa. ²⁸ Ia negu siḡo raḡime oḡore iana ahata maka ḡami hoeka eduge iauka beta horu ḡamiḡa vara; eige iama Dirava siḡamisa. Aukena ahata maka hoekare mati ai horuve vene uhura daure ḡahisa. ²⁹ Ana riaḡahe moni kusinaike bei uguha abu hae geige vanu? Eduge bera beta desuraḡira vata ada edube iai Mame roiare eḡu gera. ³⁰ Eige iai omo hanake inuhati tagera aukamu dahi gevenu. ³¹ Gerege ia negu siḡo raḡohime; au ia ana gevare ramu raho ketake beta uguha dadaḡa iau naḡatera. ³² “Eige oḡore iana uriḡoi di ihe koita iau vaḡotoni roia, da tage onakime dana di Mame vava uiare vaḡotoni rosa; ³³ eduge oḡore iana da betia ḡaha koita iau vaḡotoni, da tage betia ḡahiḡa vara di Mame vava uiare vaḡotoni. ³⁴ Ia negu anai rome da oroḡane daka mai mi oroḡanu vata ketake o ada; veite da oroḡane ra beta mai, eduge eḡi daki mi oroḡanu. ³⁵ Da oroḡane ra ḡami ramu au mame enana ḡahisa; renu ḡami maḡi vara au neine enana ḡahisa; varu maḡi vara au vare maḡive enana ḡahisa; ³⁶ eige iakamu iai iaga ḡahetuhe iavaḡu enana raḡira vara. ³⁷ Oḡore di ḡahara veite edube au mame se neine ḡahara raḡi ketake ḡaha, iauka beta daie ḡahiḡa vara; renu oḡore iana iau ḡami move se ḡami maḡive ḡahara raḡohi ketake ḡaha, iabera beta daie ḡahiḡa vara; ³⁸ renu iana unuhuna au sataurove hirivi veite renu au itahe oḡiḡi veite iabera beta daie ḡahiḡa vara. ³⁹ Oḡore iana iau maḡurive kamui uia, iauka dauda vara, eduge oḡore iana iau maḡurive mi vata maema di dainehe iauka maḡuri riaḡa mimi vara. ⁴⁰ “Unuhuna a maḡe ḡahima da tage auki maḡe ḡahima, mati unuhuna da maḡe ḡahanu auka di Mame da besuḡane e tage auki maḡe ḡahima. ⁴¹ Unuhuna Dirava peroveta koitave maḡe ḡahima auka peroveta koita maḡe ḡahane au tage mimi vara; mati unuhuna Dirava meve kiare koitava maḡe ḡahima, auka koita maḡe ḡahane auka maḡeva mimi vara; ⁴² mati unuhuna di itahe oḡiare dainehe eia ribike be mi koita kusinaike o moimare; riaḡa vara daki roma, auka Dirava maḡeve riaḡava mimi vara.”