¹ Iesu au ḡamituhe utube abu ḡanito ḡahigei kosaime auki mata e ḡaremare oti oḡo koba koba iau badi maḡe koita hugure ḡahi gevege. ² Ioane Babatiso vadibu iagava uiege uhura auki Keriso me kiare gava ihinu, gerege auki au enoḡe au ḡamituhe iau besuḡanu Iesu ḡasina, ³ renu Iesu beraḡi ronu, “Ana iau koita rone auka oroḡisa, se koita vana so e oroḡima? ⁴ Iesu raki boriti ḡahi gevenu, “Gerege ḡoiraḡohi oti Ioane kirosa iana otavadoana ia koita iau iha mati ia iavaḡu era gevenu; ⁵ niḡa niḡa veite iaberamu niḡa niḡa raḡa, oḡiḡi veite iaberamu oḡia, dika nune nune iaberamu maḡe ḡahanu, ihiko veite iaberamu ga iha, koita hoḡe raḡohane maḡuri ḡahigei mati koita goroa iaberamu badi maḡe iha. ⁶ Renu iana unuhuna iai ihihive dai nune veite iabera heḡiri raḡira vara.” . ⁷ Ioane ḡamituhe urihi otege, Iesu raki Ioane badine koita boriti ḡahi gevege. “Ia mata ḡaḡaeva otine iana otavado vana ia eraḡisa rome ia otinu? Nono ḡugui tiru hanaka desuraḡi erageisa rome ia otinu? ⁸ Gerege otavado ana ia eraḡisa rome ia otinu? Ata be ogona dedika kine enu? Ihiahe, ogona dedika kiare ḡahava iabara rohi iau iagehe ge iauki guraha. ⁹ Gerege unuhuna ia oti eraḡisa? Peroveta koita benu? Otavado peroveta koita be iana eraḡisa? Riaḡa vara, daki roma auka peroveta ḡaha inuhati aukamu soi gevenu. ¹⁰ Ioane ramu buka aena uhura rone koita vara, ‘Eraḡiahe, dakamu e di besu besu koitave uriḡatu besuḡima, aukena uriḡoi oti ai ḡumaḡe baovisa.’ ¹¹ Riaḡa vara daki roma, koita be au neine vaḡatanehe hakivane bera Ioane Babatiso naḡate veitera. Eduge koita avie be Dirava aena derikehe va basileia uhura eraki Ioane variada. ¹² Renu Ioane Babatiso negahe oroḡi negubutu, Dirava basileia gare koita iabaki besibe ḡahege, mati koita iabaki ḡoḡai ḡahi iauka Dirava aenave kisa. ¹³ Ioane so au meve kiki veite uhura, Mose aenave mati peroveta ḡaha iaberamu Dirava aenave gava raḡohege; ¹⁴ mati koita iana roia Ioane ramu Elia, gerege iama riaḡa ḡahisa, koitaia peroveta ḡahe ia rone auka ḡoiraḡira vara. ¹⁵ Ana ihikotenu ama ihisa! ¹⁶ “Eduge negu tau o koitavaia dana oḡore ruḡa ia geregere ḡahisa? Iakamu erehuta ḡami ḡamika ia orogo gurahi bebe bara gevare naḡatera, ¹⁷ ‘Noka iani heḡiri noḡo maḡe rogei, edube iaka iavea veite; noki niḡo raḡoha, eduge iaka niḡo raḡira veitera.’ ¹⁸ Eige Ioane oroḡane negahe auka tamuta veite renu eia daure tage mimi veite, renu koita iaberaki roege, ‘Auka sua daureva raki au uhura’. ¹⁹ Koita ḡamika oroḡane aukamu tamuta viege renu eia iege, renu koita iaberaki roege, ‘Eraḡiahe, ata oramu tamuta momo vima renu eia daure momo ima, auka moni idiḡare ḡahava mati ḡuma daure kiare ḡahava iau vasire. Edube Koita Ḡamika meva kiare era Dirava uhuvake riaḡa vara auki me maḡeva kima. ²⁰ Gerege Iesu raki au hedo meve dadaḡa kiogevene oḡo ḡahava iau ḡoiraḡi oti namigei, badiva iauka iau maḡuri daureve ḡare geige veitera. ²¹ “Uhudau vana ianu, Korasin mati Betsaida. Negu hedo me iai oḡo ḡahatuhe iau kiogevene, ena so Taire mati Sidion iau uhura kiare, iauka subuta iau ogona daure kiogei mati ḡuma daure uhura gurahege iauka maḡuri daureve ḡarehi ḡoiraḡohanu. ²² Iakera daki ia boriti ḡahi geima, berabe vaniva Dirava ramu Tiare mati Sidion ḡahavaia iahe geige vara edube iaka veitera. ²³ Edube, Kaperanamu, ai anana aka avaḡu ḡadimi vava otito vara? Veitera, auka ami vene uhura a kira kira vara. Makava ramu hedo me iai uhura kine ena so Sodoma uhura kiare, auka ei ate vani o manu. ²⁴ Eduge daki a boriti ḡahima, berabe vani eigera Dirava ramu Sodoma iahe iahe vara, edube aka veitera. ²⁵ Gerege Iesu raki imimivi ronu, “Di Mame, va mati vata ketake o Rohiva, akera daki a maḡe ḡahima, aka uhu anana maḡe raḡare mati uhuvaka ḡaha iau iaḡa o reḡunaki ḡaḡae ḡahiḡa veite, edube amu koita ia uhu anana mati uhuvaka veite iauge iauka eraḡisa ḡaḡae kinu; ²⁶ riaḡa vara, Mama, ora ai uhu anana maḡe ḡumava aki ḡahara kisa. ²⁷ Di Mame ramu iaḡa inuhati idigei da moimanu; renu bera au Moe riaḡa ḡahiḡa veitera edube au Mame auvaḡu gera, mati bera au Mame riaḡa ḡahiḡa veitera au Moe auvaḡu gera. Renu oḡore iana au Moe ro gevare ḡahava auna iau ḡaḡae kisa. ²⁸ “Iai bouge di ḡasina oroḡiahe, iana oḡore ia huhu naḡoha renu isuka ketake agoha, dakena vaḡaroro ia mohigeisa. ²⁹ Di isuke mi agoha, renu ama di uguro gare anaisa; daka di soruke ramu maḡe mati heḡiri ḡuma vara, renu iaka vaḡaroro maḡe mimi vara. ³⁰ Eige di huhuve mati di isuke ramu ageraḡirave iabara