¹ Iesu raki vanaḡi bei ḡadimare auki ḡoiraḡi au oḡehe koa hakirahe otinu. ² Gerege koita be iaberaki ata be oḡiḡi veite iagahu ena iaḡare hirivi mi Iesu ḡasina oroḡonu. Auki iau ihihive eraḡare auki ata oḡiḡi veite kironu, “Hero kisa di moe; ai daureve Dirava ramu vahu gevenu. ³ Gerege aena ḡaha be iaberaki iorena iavaḡu ga raḡi onaki ronu, “Ata oramu ga vime auki Dirava daure ḡahima.” ⁴ Edube Iesu raki iau uhu ananave eraḡei, auki ronu, “Esemena ia iai sorukehe gure uhu anana daure raḡa? ⁵ Dana rosa, ‘Ai daureve aumu vahuḡanu,’ se dana rosa, ‘Urimare renu oḡi.’ Orena ageraḡirave?” ⁶ Eduge iama anaisa, Koita Ḡamika vara hedokate vata ketake o ada, auka daure vahugeige vara, gerege auki oḡiḡi veite atava kironu, “Urima, ai iaḡia gedave mare renu oḡo ote.” ⁷ Gerege auki urimare au oḡehe otinu. ⁸ Koita iabaraki eraḡare iauki ḡaḡu raḡohanu, mati Dirava mote ḡahege, au hedo ona kikive koita mohi gevare. ⁹ Iesu oḡi otege uhura auki niḡahi ata be eraḡanu ihivara Mataio, auka gura gurave au me mare iagahe; renu Iesu raki Mataio kironu, “Di itahe oroḡo.” Gerege Mataio raki urimare au itahe otinu. ¹⁰ Iesu raki iagahu tamuta viege uhura, Mataio ruta me mi moni gogoare gahava mati be iabera ḡuma daure kiogevare iaberaki oroḡi Iesu mati au ḡamituhe ruḡa gurahanu tamuta patava. ¹¹ Faresia ḡaha be iaberaki eragevare, iauki Iesu ḡamituhe bera gevenu, “Esemena iai biage koita vire ruḡa tamuta vima?” ¹² Eduge Iesu raki ihare auki ronu, “Oḡore iana komata veite iauka beta iahe iahe koita iaḡoia vara, eduge dika raḡare eḡu gena. ¹³ Oti iaḡoiahe otavado Dirava buka aenave roma, ‘Daka vaḡahu daki roma, beta iauka da maḡe ḡahisa.’ Da oroḡane ra beta ḡuma ieriri ḡahe eḡu ihirogeige vara, eduge daure ḡahe iau dainehe. ¹⁴ Gerege Ioane itahe oḡiare gahava iabaraki oroḡi Iesu beraḡi, roege, “Esemena no mati Faresia ḡaha aena raḡohi vani be iau tamuta veite, eduge ai ḡamituhe iabera aena raḡira veite?” ¹⁵ Iesu raki kiro gevenu, “Deiva iabena negu maḡi e mobore iau ruta gerege iau heḡiri raḡa, iauka beta niḡo raḡira vanu? Vaniva oroḡege negu ata era iauna mi ḡeahu otege, gerege iauna aena raḡohisa. ¹⁶ Koita bera beta ogona isaḡe be miare ogona emene ruta baniba vara, enaki kiare ogona emene eramu dariḡohi ketake ḡoiḡoara. ¹⁷ Mati bera beta ḡadiki isaḡe be mi ḡadiki emene vadaka uhura bohubo vara; enaki kiare vadaka emene eramu dariḡohiḡo vara, gerege ḡadiki ḡavaḡa ramu hakivima, renu vadakava ramu daure ḡoima; eduge ḡadiki isaḡe mi vadaka isaḡeva bohuḡege, auka beta daure ḡoiḡo vara.” ¹⁸ Iesu gure gavege uhura, dubu iau biage be raki au ḡasina otime auki au vaḡotoni komuko daivare, ga ḡahi roege, “Di mae ramu negubutu ge auki hoḡe raḡanu; edube ana beta oroḡi ai ade mi au ada maemege, gerege auna maḡuri visa.” ¹⁹ Gerege Iesu raki urimi au ḡamituhe ḡainage au itahe otinu. ²⁰ Gerege maḡi be tage tau utube hakira abu auki taḡo eraḡanu eraki Iesu itahe oroḡime auki au ogona bisuke kamuanu, ²¹ negu maḡi eraki au uhurehe onaki ronu, “Da enaḡu au ogonave bisukava kamuare, dakamu maḡe ḡoiḡo vara.” ²² Iesu raki aniḡoi eraḡare auki kironu, “Hero kisa di mae; ai ihihive raki a maḡe ḡahanu.” Tutube veite maḡi eraki maḡe ḡoinu. ²³ Gerege Iesu raki ata bauge iagehe sirivare eige auki niḡahege abate abate koitava iaberaki noḡo raḡi mati niḡo raḡohege era gevenu. ²⁴ Iesu raki boriti ḡahigei ronu, “Iai bouge haki raḡiahe; maiaḡo ora beta hoekera edube iaḡime auki.” Gerege iauki iau bouge ehaiahia ḡahi tati ḡahege. ²⁵ Eduge koitaia iaberaki hakiraḡi itahe otinu, Iesu raki sirivare auki negu maiaḡo adakahe mi iagemege auki urimanu. ²⁶ Renu badi oramu rome iauki ioa raḡohege mata inuhati iau. ²⁷ Iesu ei urimi otege, ata abu ni veite e iaberaki au itahe otime iauki niḡo raḡi bararaḡi roege, “Davida Moe no vaḡahu ḡahigeve!” ²⁸ Iesu raki oti uduani sirivanu, ni veite abu ruḡa geraki au ḡasina otinu; gerege auki bera gevenu, “Iana da riaḡa ḡaha dakamu ia maḡe ḡahigeige vara?” Iauki kironu, “Erege, Rohi Bauge.” ²⁹ Gerege Iesu raki iau nie kamui gevare renu ronu, “Iaka da riaḡa ḡahare eige auka enaki iai ḡoiḡo vara.” ³⁰ Renu iau nie iaberaki bao raḡohanu. Gerege Iesu raki uagatugei ronu, Eraḡege ia negu koita be kirome.” ³¹ Eduge iauki otime iauki Iesu badine rome iauki mata e oḡova iau rogei oriḡi kouanu. ³² Iauka urihi ḡeahu otinu, be iabera ata ga veite be nisiḡami Iesu ḡasina oroḡonu. ³³ Iesu raki negu sua daure oiahane itaharahe, ata ga veite eraki gavege koita iaberaki ḡaḡu raḡohime iauki roege. “Nokamu beta ḡuma ona kikive be erara veite Isaraela uhura.” ³⁴ Eduge Faresia ḡaha iabaraki ronu, “Eramu sua daure iau biage hedokehe ge auki sua daure oia geima. ³⁵ Gerege Iesu raki oti deiva viege oḡo bauge mati avie iau. Auki koita iau dubu uhura uguro ḡahigei renu va basileia badi maḡe ḡava ro gevege, mati dika nune nune mati komata ḡaitage maḡe ḡahi gevege. ³⁶ Auki koita oro gevene era gevare auki uhudau ḡahigei. Badivara iauki anana dadaḡa raḡohi mati iau ahatane ḡaitage hero veite, erehuta mamoe nitabata ḡahiḡa koita veite naḡate. ³⁷ Gerege auki au ḡamituhe kiro gevenu, “Taboro meva ramu ketakera, eduge me ḡahiḡa iabara rore beḡu gera; ³⁸ eige iama taboro Rohiva imiḡege aukena me koitatuhe besugei iauna taboro meva kisa.