¹ Gerege Iesu raki au ḡamituhe utube-abu inuhati ihirogei renu hedo mohigei iauka sua daure oiageisa mati dika raḡare maḡe ḡahigeisa, ²  eige auki besugei haki raḡi iauka Dirava basileia hari maḡeve rosa, mati dika maḡe ḡahigeisa. ³  Iesu raki kiro gevenu, “Ia negu ioa oi iaḡa be kime, iago be, se demaka be, se muni tahaka be, se ogona ḡaita be misa. ⁴  Ana iaga oreigena a ḡadimi, ama ei guramisa, renu eige ana urimi otisa. ⁵  Iana oḡo oreigena iau a heḡiri ḡahiḡa veitenu, a iau oḡe ḡaremi ama ai vase dahuḡi eramu iau ḡumaḡe ḡaḡae kisa. ⁶  Iauki ei urihi oḡo inuhati iau otime, iauki mata e iau uhura hari maḡe ro ioa raḡege mati dika maḡuri ḡahi gevege. ⁷  Heroda iau biage raki Iesu kine gava ihine, au soruke raki hirorovi, badiva be iau ge auki ihinu Ioane hoḡe urimi ḡoiraḡanu, ⁸  be iabera roia Elia raki ḡaḡae ḡoinu, mati be iabera roia subuta peroveta be raki urimi ḡoiraḡanu. ⁹  Heroda raki ronu, “Ioane ramu daki omotova dodo vanu; eduge ona unuhuna ia au gare raḡa?” Auna so ḡuma bei oti eraḡisa. ¹⁰  Apostolo iabera ḡoiraḡohi iau kine inuhati Iesu boriti ḡahi. Auki ḡoḡohu nisigei oḡo be ihiva Bethsaida otinu. ¹¹  Koita iaberaki ihinu auka otinu, iauki au itahe otime; mati auki heḡiri ḡahigei, renu Dirava basileia gava iau roege, renu dika ḡaha maḡe ḡahi gevege. ¹²  Vani uguhu otege, Iesu ḡamituhe iabera au ḡasina oroḡare iauki kironu, “No koita o besugei iau oti oḡo hugure iauni demaka iaḡoisa mati iaḡohisa; badiva oigera iaḡa be veitera.” ¹³  Eduge auki kiro gevenu , “Iaki iaga be mohi gevege iauna isa.” Iauki kironu, “Ni ḡasina gera parao adakasiva mati karava abu—iauna oi demaka haevare ḡahege nona oti koita o inuhati iauni demaka haevisa.” ¹⁴  Badiva iau ate ramu daha adakasiva naḡatera. Gerege auki au ḡamituhe boriti ḡahigei, “Iauka iau ate utu-adakasiva gurahisa.” ¹⁵  Iauki ḡosigei kosavare auki gurahi. ¹⁶  Gerege auki parao adakasiva mati karava abu, idigei vava gagai maḡe ḡahare auki bokoi tina tina, renu idigei au ḡamituhe mohigei iauka idigei koita inuhati mohi geisa. ¹⁷  Iauki iau bouge tamuta raḡi kosai, renu demaka momonava ḡare gevene au ḡamituhe iabeki bouge vare, boteka utube-abu maka kinu. ¹⁸  Vani bei Iesu raki avaḡu imimi viege, au ḡaika gera au ḡamituhea, auki bera gevenu, “Koita iana otavado iau roia dana unuhunu?” ¹⁹  Iauki kironu, “Ioane Babatiso; eduge be iabera roia Elia; mati dadaḡa ḡainage roia, peroveta emene be raki urimi ḡoiraḡanu. ²⁰  Gerege Iesu raki kiro gevenu, “Edube iana otavado ia roia dana unuhunu?” Petero raki kironu, “Keriso Dirava iera.” ²¹  Auki gavi aena ḡahi gevare roma iauka beta koita be boriti gahisa, ²²  roege, “Koita Ḡamika so huhu naḡina vara, mati koita baugea, dubu biavaia, mati aena kiare ḡahevaia iauka besibe ḡahiḡa vara. Mati iauka ḡami hoekisa, eduge auka vani abigaḡa ḡoiege auka urimi ḡoiraḡira vara.” ²³  Gerege auki inuhati kiro gevenu, “Ana unuhuna di itahe oroḡima, iama iaḡa inuhati ḡaregei mati vani inuhati au satauro agohare di itahe ama oḡisa. ²⁴  Iana oḡoreana iai maḡurive kamua iaka dauda vara, eduge iana di dainehe iai maḡurive dauḡa iaka maḡuri raḡira vara. ²⁵  A mata o uhuḡatu miare ana otavado maḡe be misa, eduge ana dauraḡisa se ana veite ḡoisa? ²⁶  Oḡoreana di dainehe se di gare dainehe variva raḡa, Koita Ḡamika tage au maḡe ruta oroḡare au variva vima, mati au Mame vava uiare au aneru aenave ruḡa au maḡeve. ²⁷  Eduge riaḡa vara daki roma, koita bea oi rahirahe beta hoḡe raḡira vara, edube urigahi ge iauna Dirava basileia eraḡisa. ²⁸  Vani abuḡu-veite itahe, auki Petero, Ioane mati Iakobo nisigei iauki nimu ḡadihi imimi otinu. ²⁹  Au imimi viege uhura, au eravaḡe raki nune ḡoi, mati au ogonave tage kae abagave ḡoinu. ³⁰  Ḡamana veite iauki ata abu eragei, Mose mati Elia au ruta ga raḡege. ³¹  Iauka iau abu eravaḡa maḡe ruta ḡaḡae ḡahi. Au hoḡeve gava raḡege, au oti Ierusalema basu basua. ³²  Petero mati au soukuhe ruḡage iaḡohiave; eduge iau iaḡohia veite uhura iauki Iesu eravaḡa maḡeve renu ata abu au ruta rahane era gevenu. ³³  Iauki garehisa rome Petero raki Iesu kironu, “Ni Biage, maḡera noki aruta oi oroḡanu; eige no dubuka abigaḡa kia, bera aie, bera Mose ie, mati bera Elia ie”—auka anana veite auna otavodo au ronu. ³⁴  Au onaki gavege uhura, ori bera iau variada bakugei; iauki siḡota ori uhura siri raḡohi. ³⁵  Gerege eno be raki ori uhura seni oroḡi roege, “Ora di Moe, da rone Ḡami vara; iama au gare ihisa!” ³⁶  Eno e gavi kosavege, Iesu ra avaḡu rami rame. Iauka gava koita be kiege roro veite vani ei iau iaḡa eraḡane. ³⁷  Va tahege Iesu mati au gamituhe abigaḡa ruḡage iauki nimu seni ugu raḡohi, koita dadaḡava raki erarava oroḡonu. ³⁸  Gerege koita dadaḡa iau uhura ata beraki to ronu, “Di Biage, akera daki a imiḡima so di moe eraḡa; auka di moe kobuḡa vara. ³⁹  Auka sua daure raki au uhura sirivare aukamu barai; aumu vata kiravi ate au avaḡehe saba ramu hakivi, mati auka beta vaina ḡareḡa ate aukamu rabura ḡoima. ⁴⁰  Daki ai ḡamituhe imi gevenu iauka sua daure oiahisa, edube iauka kiki veitera.” ⁴¹  Iesu raki ronu, “Iakamu tau oi ihihi ḡamika ḡamika mati ga ihihi veitera, dana ia ruḡa onaki guragu ḡamana vanu mati iai maḡuri ona kikivenu? Ai moe mi oi oroḡo.” ⁴²  Negu ḡami oḡi otege uhura, sua daure eraki vata kirai auki ḡabubu viege. Eduge Iesu raki sua daure e namiḡi oiahi hakivare, auki ḡamiva maḡe ḡahare mi au mame moimanu. ⁴³  Iauki iau bouge Dirava hedoke eraḡime iauki ḡaḡu raḡohi. Iesu raki au Hoḡeve Gava vanu Koita inuhati gure heḡiri raḡohege, Iesu raki au ḡamituhe kiro gevege, ⁴⁴  “Iama iai bouge da gavare uhu maemisa: Iauka Koita Ḡamika bive kiare iauna miare koita mohigeisa. ⁴⁵  Eduge au ga rone iau uhure so bao raḡira veite; au makera iau ḡoḡohu gera eige iauki erara veite. Mati iauki siḡo raḡime iauki au gavane berabeva veite. ⁴⁶  Iauki iau vaḡa heḡade raḡohi unuhuna iau vaḡotoni bauge? ⁴⁷  Eduge Iesu ra iau uhu ananave dibana eige auki ḡami gamika be mi iau origi maemare, ⁴⁸  auki kiro gevenu, “Ana unuhuna ḡami ḡamika o maḡe ḡahima di ihehe era daige auki kima, renu unuhuna da maḡe ḡahima auka da besuḡane koitava auki maḡe ḡahima; eige iai vaḡa unuhuna avienu eraki bauge.” Unuhuna a besibe ḡahiḡa veitenu auka aigera ⁴⁹  Ioane raki ronu, “Ni Biage, nokamu atabe noki eraḡege auki ai ihehe sua daure oiagei hakivi, gerege noki boriti ḡahi auka beta kisa, badiva auka beta no ruḡage auki oḡima.” ⁵⁰  Eduge Iesu raki ronu, “Ia negu besibe ḡahime, unuhuna ia betia ḡahiḡa veitenu, auka iai gera.” ⁵¹  Au ḡadimi vava vaniva kahika ḡoiege, auki uhu kinu auka Ierusalema otisa. ⁵²  Gerege auki urigatu au ga ḡahatuhe besugei. Iau ḡumaḡa otege uhura iauki Samaria ḡaha iau oḡehe siri raḡohi boriti ḡahigei Iesu ororove iauma uhuiamisa; ⁵³  eduge iauka au ororove heḡiri ḡahiḡa veite, badiva Iesu ramu uhu kinu auka Ierusalema auna otisa. ⁵⁴  Au ḡamituhe Iakobo mati Ioane iabaki eraḡari, iauki ronu, “Rohi Bauge ana esegena a roma, nona roege vava seni venena uguhi oroḡi iauna raḡohisa, Elia kine naḡate? ⁵⁵  Eduge auki aniḡoiare nami gevenu. ⁵⁶  Auki namigei ronu, “Iana dibana veite iai suarena oreigenu, edube Koita Ḡamika oroḡane ra beta koita daure ḡahigeisa edube maḡuri ḡahigeisa.” Eige iauki urihi mati ogo bei otinu. ⁵⁷  Iau ḡumaḡa oḡi otege uhuraḡe, ata be raki Iesu kironu, “Ana oreigena a otima daka ai itahe ororo vara.” ⁵⁸  Gerege Iesu raki kironu, “Gahara to iabera muni vakahaḡu, mati uguha auhe huragare iabera idi hisuhe guraha; eduge Koita Ḡamika vara au omote maemi uguhi iagia taru veitera.” ⁵⁹  Bera Iesu raki kironu, “Di itahe oroḡo.” Eduge auki kironu, “Rohi Bauge, da so uriḡatu oti di mame abatemima.” ⁶⁰  Eduge Iesu raki kironu, “Ḡaregeve iau iavaḡu iau hoḡeve abateme; edube ai gera, ote Dirava basileia ama gava ro ioavisa.” ⁶¹  Be raki mati kironu, “Daka ai itahe oroḡisa, edube Rohi Bauge; da so uriḡatu otima di iaga ḡahatuhe vasiba ḡahigeima.” ⁶²  Iesu raki kironu, “Koita be au adehe ḡeḡe kiare mati gure ni ḡahi ḡoiraḡare auka ḡereḡere veite Dirava basileia eraḡisa.”