¹  Ḡamana veite Iesu raki oḡo bauge mati avie iau otime, auki Dirava basileia hari maḡe badiva ro ioavege. Au ḡamituhe utube-abu ḡainage au ruta, ²  maḡi bea sua daure mati dika nune nune iau uhura Iesu maḡe ḡahi gevene ḡainage: Maria, auka Maḡadala maḡi vara, auka au uhura sua daure iatiriḡa oiagei haki raḡi, ³  mati Iona, auka Heroda ḡami baugeve be Kuisa mabare, mati Susanna, renu be ḡainage orogi iau iahe geisa. ⁴  Koita dadaḡava raki oḡo bauge mati oḡo avie iau Iesu ḡasina oroḡi, gerege auki badigomua gaḡagei roege: ⁵  “Ḡeḡe kiki koita be raki au demaka iaka beḡibeva otime; gerege au beḡi beḡi viege uhura, iaka be iabera ḡumaḡa desuraḡohi koita iabera adahe oḡi, renu be iabera uguha vava ioa raḡare iabera iogei. ⁶  Be iabera muni ada desuraḡi; auka koboraḡi ḡadimi auki mae raḡohi badiva degide veite dainehe. ⁷  Be iabera ḡati uhura desuraḡohi, renu ḡati raki au uhura kobo raḡi ḡadimi hoeki gevenu. ⁸  Be iabera vata maḡeva desuraḡohi, iauki kobo raḡohi, au madike dadaḡava maka kinu.” Auka enaki gavi, mati to gavi roege, “Ana ihikotenu ama ihisa!” ⁹  Gerege au ḡamituhe iaberaki beraḡanu au badigomu rone makava. ¹⁰  Iesu raki ronu, “Aukamu Dirava basileia gare iorena ia mohi gevenu; eduge be iaugera daka badigomua roege, eige iauka iaḡoisa edube iauka beta erara vara, mati iauka ihisa edube iau uhure beta bao raḡira vara. ¹¹  "Badigomu makava ramu onu: Dirava gare ramu demaka iaka vara. ¹²  Tahaka bea ḡumaḡa desuraḡane iabera au gare ihine; edube diabolo raki oroḡi iau sorukehe idigei ḡeahu otinu, eige iauka beta riaḡa ḡahiḡa mati maḡuri raḡisa. ¹³  Tahaka muni ada desuraḡohi iabera koitaia au gare ihare, mati heḡirita ge iauki manu. Eduge iau ḡaikera berebe veite; eige iauka negubutu au gare iha edube iau tohogei ḡamana veite iauka desuraḡa. ¹⁴  Tahaka bea ḡati uhura desuraḡohi, iauka au gare ihinu; eduge iau otege uhura, iauka ahata maka uhu korahi renu maḡuri raki idi gevenu, eige iau madike ra berebe veite. ¹⁵  Eduge vata maḡeva desuraḡohi iabera, au gare ihine, iauki riaḡa ḡahi renu soru maḡe ruta kamui berebe ḡahanu, eige auki madika maḡe dadaḡa kinu. ¹⁶  “Koita bera beta lamepa raḡare mi iaḡa bei baku baku vara, se mi au iaḡia gedake derikahe maemisa, eduge auka mi auhe ge auna maemisa. Eige koita bea siri raḡa iauma abagava eraḡisa. ¹⁷  Eige ḡoḡohu iaga bera beta ḡaḡae ḡoiḡo vara, se iorena iaga benu aka beta ihihi vara mati beta erara vara. ¹⁸  Gerege ama reḡunaki ga ihisa; aute koitava, auka dadaḡa moimisa; renu aue veite koitava, otavado iau ḡasina auka so iau mimi vara.” ¹⁹  Gerege Iesu neine mati au ḡoḡuhe ruḡa iauki au ḡasina otinu, eduge koita dadaḡa iau ḡumaḡehe dainehe iauka au ḡasina otito veite. ²⁰  Renu iauki boriti ḡahanu, “Ai neine renu ai ḡoḡuhea iauka me itahe a eraḡisa roia.” ²¹  Eduge auki kiro gevenu, “Di neine mati di ḡoḡuhe iabera Dirava gare ihare mati meva kiare ḡahava iabera. ²²  Iesu vani beige auki au ḡamituhe ruḡa vanaḡiva gurahi, auki kiro gevenu, “Noka gohu hakirahe otito vara.” Gerege iauki eve doḡoi otege, ²³  edube iau eve otege uhura ge auki iaḡanu. Nono ketake gugui veni ruta, mati eia gure vanaḡiva tobo raḡi ḡadimi, mati iauki siḡo raḡohege. ²⁴  Iauki au ḡaika otime iauki ḡutihi, roege, “Ni Biage, ni Biage, nona negu hoḡe raḡohira vanu!” Gerege auki urimi nono mati eve namigei; iauki netu raḡi, keri ḡahi kosai. ²⁵  Iesu raki kiro gevenu, “Iana da riaḡa ḡahi veitenu?” Iauki siḡo raḡi mati ga raḡi bebe beragei, “Gerege auna unu hunu, au nono mati eve gaḡa geima, iau ḡainage au gare iha?” ²⁶  Gerege iauki Galileia gohu hakirahe oti Ḡeresene vata haki raḡohi. ²⁷  Iesu raki vanaḡiva ḡoromi vata ada rami, auki ata be sua daure mane eraki oḡo seni oroḡi eraganu. Auka va ḡamana ge auki ogona veite ioavege renu iagahu guragu veite, eduge midava ge auki uiege. ²⁸  Auki niḡahi Iesu eraḡare auki nivi au vasi ḡaika ḡorumi, gavi barai roege, “Iesu, Dirava Vava Vava au Moe, ana otavado a dai roma? Akera daki a imiḡima, a negu da huhu ḡahime!” ²⁹  Badivara Iesu raki sua daure ata e uhurehe oiahi hakivanu. (Vani dadaḡa sua daure eramu au uhura uguhi se auka omo daureva ḡoi; renu iauka mi auriva raroi maemi nitabata ḡahisa, eduge auka bokoi renu sua daure eramu mi otima vata ḡaḡae hakivima.) ³⁰  Gerege Iesu raki beraḡanu, “Ai ihena unuhu?” Auki onaki ronu, “Teri teri”; badiva sua daure dadaḡava raki au uhura ugu raḡanu. ³¹  Eige iauki imiḡanu au negu oiagei vata derikahe otime. ³²  Eigera oho teri bera nimu hedikava iauki tamuta raḡa; renu iauki Iesu imiḡanu auka besugei iau uhura ugu raḡisa. Eige auki ei besu gevenu. ³³  Gerege negu sua daure eraki ata ei haki raḡare iauki oho teri iau ugu raḡare iauki kekerava ugu raḡi gohu uhura eia ime iauki hoḡe raḡanu. ³⁴  Negu oho nitabata ḡahare ḡahava iabaki siviḡoro raḡime iauki oḡo otime iauki iau eraḡane iaḡaniva gava raḡege. ³⁵  Gerege koita iaberaki erarava iauki otinu Iesu gasina, iauki negu ata sua daure mane eraḡege, auka Iesu vasi ḡaika gura gurave, renu au ahatane ogona kinu mati au omote tage maḡe ḡoi; eige iauki siḡo raḡanu. ³⁶  Renu eraḡane ḡahavaia ḡainage boriti ḡahigei negu sua daure mane atava maḡuri ḡahane ḡumava gava raḡege. ³⁷  Gerege koita inuhati Ḡeresene matahe gurahi iaberaki Iesu imiḡanu auka ḡaregei; badiva iaukamu siḡo raḡoha; eige auki vanaḡiva ḡoiraḡanu. ³⁸  Auki negu ata sua daure au haki raḡane eraki imimi viege auka Iesu ruta otisa; edube auki besuḡi, roege, ³⁹  “Ḡoiraḡi ote ai iagehe, mati ama kiro geisa otavado Dirava ai ḡasina kinu a maḡe ḡoine ama rosa.” Eige auki au oḡehe otare, auki badi maḡe ro ioavege mata inuhati auna orenaki Dirava au maḡurive maḡe ḡahane. ⁴⁰ Iesu raki ḡoiraḡi, koita inuhati geraki heḡiri raḡi, badiva iauka au oroḡare iauki uhuiamege. ⁴¹ Gerege ata be ihiva Iairos, auka dubu bauge bera. Auki oti Iesu vasi ḡaika ḡorumi renu imiḡi auka au iagehe otisa, ⁴²  badiva au mae kobuḡava, au tau era utube-abu, auka au dikave raki isuke ḡoinu. Gerege Iesu otege uhura, koita dadaḡava au oriḡi ge iauki au haiaḡohi. ⁴³  Eigera maḡi bera taḡo auki tau utube-abu manu; mati au ḡasina muni tahaka tinabe auki mi iahe iahe ḡaha iau damune kiege, eduge bera maḡe ḡahiḡa veite. ⁴⁴  Negu maḡi eraki Iesu itahe seni otime auki au ogona bisukahe kamui, ḡamana veite au taḡo hakivege eraki netuanu. ⁴⁵  Gerege Iesu raki berabe vanu, “Unuhuna di ogonave kamuanu?” Iauki iau bouge ḡore ḡore raḡi, Petero mati au soukuhe iaberaki kironu, “Ni Biage, koita dadaḡava raki ai ḡaika a oriḡi mati ai haiaḡoha.” ⁴⁶  Eduge Iesu raki ronu, “Koita be raki da kamuanu; daka dibana negu hedo eramu dai hakivanu.” ⁴⁷  Negu maḡi eraki dibana ḡoinu auka beta ḡoḡohu ḡoiḡo vara, auki siḡota orogi; au vaḡotoni ḡorumi, auki koita inuhati iau vaḡotoni gavi ronu otavado dainehe ge au kamuanu, mati ḡamana veite auka maḡe ḡoinu. ⁴⁸  Iesu raki kironu, “Di mae, ai ihihive ramu a maḡuri ḡahanu; mai ruta ote.” ⁴⁹  Au so gave ge uhura, koita be raki dubu biava iagehe oroḡi ronu, “Ai mae ramu hoḡe raḡanu; a negu bina ni biage korahi ḡahime.” ⁵⁰  Iesu au gare ihine, auki kironu, “A negu rabura vime. Ama riaḡa ḡahisa, auka maḡuri vara. ⁵¹  Auki ḡoiraḡi iagahu otime, auki koita bera beta au ruta sirivisa, edube Petero, Ioane, renu Iakobo, mati maiaḡo e mame renu au neine iavaḡu. ⁵²  Iauki iau bouge maiaḡo e nina ḡahi, iau ḡahigei; eduge auki kiro gevenu, “Ia negu niḡo raḡime; auka beta hoḡe raḡime auki eduge auka iaḡiarera.” ⁵³  Iauki tati ḡahi, iauka dibana maiaḡo ora subuta ge auki hoḡe raḡanu. ⁵⁴  Eduge auki adakahe mi iagemi to barai ronu, “Di mae, urima!” ⁵⁵  Maiaḡo e suare raki ḡoiraḡi, auki maḡurivi. Gerege Iesu raki boriti ḡahigei iauka demaka be kiage auka isa. ⁵⁶  Maiaḡo e iahuve iaberaki soru raka raḡohi; eduge auki boriti ḡahigei iauka beta koita be kiro geisa otavado iau eraḡanu.