¹  Iesu koita gagagei kosavane itaharahe, auki Caperanaum otinu. ²  Tuari biava besubesu ḡamive au ḡahara viare ḡami maḡeva bera. Auki dikai ḡamana veite auki ni kumuisa vima. ³  Negu tuari bia eraki Iesu harike ihime, gerege auki Iuda ata bauge be besugei Iesu ḡasina, iauka imiḡege auka oroḡi au besubesu ḡamive maḡuri ḡahisa. ⁴  Iauki Iesu ḡasina haki raḡi iauki imiḡanu, “Ata ora koita maḡe bera ana beta iahe iahe vanu, ⁵  badiva auka ni koita tuhe iau ḡahara vima eige auki ni dubuve oi ḡonu.” ⁶  Eige Iesu raki iau ruga otinu. Auka ḡamana veite au iagahe tuari baiva raki au vasiruhe besugei iauka kirosa: “Rohi Bauge, a negu ai uhure huhu ḡahime, daka maḡe veite ai vaḡotoni a di iagehe ḡadimare. ⁷  Eige daka anana veite daka ai ḡasina oroḡisa badiva daka maḡe veite ai vaḡotoni. Eduge gaḡuva, gerege di besu besu ḡamive ramu maḡuri visa. ⁸  Da tage koita be aena derikehe daki me mima, besu besu ḡamituhe ḡainage di derikehe. Daki boriti ḡahigeima, Ote, gerege auna otisa; mati au tage, Oroḡo, gerege auna oroḡisa. Damu di ḡamituhe boriti ḡahi, Ama o kisa, gerege auna kisa.” ⁹ Iesu au gare ihine negahe au soruke raki au iagemi, auki aniḡoi koita au itahe ioa ragege, boriti ḡahigei, “Iakera daki ia kirogeima, daka koita be au ihihive onakikive Isaraela uhura se be behube veitera.” ¹⁰  Gerege au ḡami besugevene iaberaki ḡoiraḡohi iagahu orogime iauki negu dika ata eraḡege auka maḡe ḡoinu. ¹¹  Ḡamana veite, Iesu au ḡamitue renu koita dadaḡa ḡainage iau ruḡa, oḡo be ihivara Nain otinu. ¹²  Iauka oḡo hakiraḡi siri raḡisa roege, koita iabera hoḡe ata be hirivi haki raḡohi—negu ata era maḡi ḡobu be moe kobuaḡa vara. Oḡo ḡaha dadaḡa ḡainage maḡi e ahata moimi iau ruta. ¹³  Rohi Bauge eraki niḡahi eraḡege, au sorukehe vaḡahu ḡahare, auki kironu, “Nivisa ḡarema.” ¹⁴  Gerege auki oḡi otime auki hoḡe ata udavane mauava kamuare, renu hirivane ḡahava iabera rahi rahe. Auki ronu, “Di oḡo nane, daki roma, urima!” ¹⁵  Negu hoḡe ata eraki urimi guramare renu ga vege, gerege Iesu raki ḡami emi au neine moimi ronu, “Ai moe one”. ¹⁶  Iauki soruraka raḡi renu Dirava moteḡahi, roege, “Peroveta bauge be raki o ni vaḡotoni ḡaḡae ḡoinu!” mati “Dirava raki au koitatuhe uhudau ḡahigei iahegei auki oroḡanu!” ¹⁷  Iauki au gare ro ioa raḡi Iudea matava inuhati mati au oriḡi matava iau ḡainage. ¹⁸ Ioane ḡamituhe iabeki iaḡa inuhati boriti ḡahi. Gerege Ioane raki au ḡamituhe abu ihirogei gaḡagei ¹⁹  mati besugei iauka oti Rohi Bauge beraḡisa, “Ana iau koita roiare auka oroḡisa, se nune bena oroḡisa vima?” ²⁰  Negu ga roro atava abu ruḡage raki Iesu ḡasina otime, iauki beraḡanu, “Ioane Babatiso raki no besugei noka a beraḡisa, Ana iau koita roiare auka oroḡisa, se nune bena oroḡisa vima?” ²¹  Iesu ra negubutu koita dadaḡa maḡuri ḡahigei iau dika nune nuneve iau, dika daure koita huhu ḡahigei, renu koitaia sua daure idigei, mati koitaia ni tubukate iau nie baogei. ²²  Gerege auki boriti ḡahi gevenu, “Otiahe iama Ioane kirosa ia eraḡane renu ihine: koita ni kopute ramu niḡa niḡa raḡa, oḡiḡi veite ramu oḡia, lepera koitava ramu maḡe ḡoinu, ihiko veite ramu ga iha, hoḡe koitava ramu urimanu, koita goroa iaberamu hari maḡe ihinu. ²³  Ana unuhuna ana da daure ḡahiḡa veitenu ama heḡiri visa.” ²⁴  Ioane ḡamituhea otege, Iesu raki koita gaḡagei Ioane badine roege: “Ana otavadoana a mata ḡaḡaeva oti eraḡanu? Ana nono ḡugui idi hanaka vaḡa viege ena a oti eraḡanu? ²⁵  Veite tage, otavadoana a oti eraḡanu? Se atabe ahatane ogona maḡe kine enu? Veitera, oḡoreana oḡona damu ketakete kiare ḡahava iaberamu rohi iau guragu maḡe maḡurihe ge iauki ḡuraha. ²⁶  Eduge otavado erarava na otinu? Peroveta benu? Riaḡava daki roma, mati auka beta peroveta eḡugera gera. ²⁷  Oramu iau ro maemane auka onu: “Dakamu uriḡatu di besubesu koitave besuḡi otima, aukena uriḡoi oti au ḡumaḡe kisa. ²⁸  Iakera daki ia kirogeima, iai vaḡotoni iana koita ḡamika ianu bera beta Ioane variada gera; eduge koita goroa be Dirava basileiave uhura eraki au variada.” ²⁹  (Gerege koita inuhati au gare ihine, tax gogoare ḡahava ḡainage ihinu, iauki Dirava moteḡahi, badiva iau ḡainage Ioane raki babatiso ḡahi gevenu. ³⁰  Eduge Faresea mati aena ḡahava iabera Dirava iau meve rone besibe ḡahime, iauki au babatiso ḡahigeige tage besibe raḡanu.) ³¹  “Gerege dana negu orenaki tau o ḡahavaia ḡereḡere ḡahiḡa vanu, renu iauna orena raḡira vanu? ³²  Iaukamu momona iau naḡate orogo ḡurahare gure bebe eragei to raḡoha, Noka noḡo raḡa, edube aka iaveia veite; noka niḡo raḡa, edube aka nina veite. ³³  Edube Ioane Babatiso oroḡane auka demaka renu ḡadiki be i veite, mati aka roma, Auka sua daure raki au uhura; ³⁴  Koita Ḡamika oroḡane ra auka tamuta vima mati eia ima, aka roma, Eraḡiahe, tamuta niḡu be renu ḡadiki daure iare koitava, tax gogoare iau vasire mati daure ḡahaia! ³⁵  Eige, uhuvakava oroḡane au ḡamuhe inuhati ḡainage iau gera.” ³⁶  Faresea ata be raki Iesu beraḡi auna beta au ruta oti au iagehe tamuta raḡira vanu, gerege auki ata e ruta au iagehe otime auki tamuta patava gurahanu. ³⁷  Oḡo eige maḡi bera, auka ḡuma daure maḡi vara, auki ihinu Iesu ra Faresea ata be iagehe auki tamuta vima, gerege auki dehoro ḡutika maḡete be mimita otinu. ³⁸  Auki oti Iesu vasi ḡaika ḡorumime, auki nivige, au nemotane ra au vase degide ḡahege gerege auki au omo hanakehe dahuḡi koriko ḡahege. Mati au vase anoḡei dehoro ḡutika maḡeva dahu ḡevege. ³⁹  Negu Faresia ata ihiromone eraki eraḡare au uhuruhe roege, “Ata ona peroveta koita vanu, auna dibana veitenu ona maḡi orena gure kamuima—auka beta maḡi maḡe vara. ⁴⁰  Gerege Iesu raki gavi kironu, “Simona, daka iaḡa be aki roro vara.” Auki ronu, “Di Biage, gava, otavado a da kirosa roma.” ⁴¹  Ata abuge ra ata be moni ni tabata ḡahare au ḡasina; bera tinahu adakasiva manu, mati bera utu adakasiva. ⁴²  Eduge iauki damuna ki ḡoiraḡohira veite, gerege auki uhudau ḡahigeime auki iau abu moni mane sebo gevenu. Eige orena raho ḡahi maḡe ḡahisa vima?” ⁴³  Simona raki ronu, “Daka roma moni ketake mane atava.” Gerege Iesu raki kironu, “Aka riaḡa vara aki ronu.” ⁴⁴  Auki aniḡoi maḡi e eraḡare, auki Simona kironu, “Ana maḡi o eraḡima? Da ai iagehe ḡadimi, aka eia be kiki veitera di vase ketoisa, eduge auka au ni nemotahe auki di vase keto vare auki au omo hanakehe dahuḡi koriko ḡahanu. ⁴⁵  Aka da oroḡi ḡadimi akamu da anoano veitera, eduge auka da ḡadimi aukamu di vase anoḡi netu netu veitera. ⁴⁶  Aka di omote dehoro ḡahiḡa veite, eduge aukamu di vase auki dehorova dahuḡi. ⁴⁷  Eigera, daki aki roma, au daureve iana dadaḡa vanu, aukamu keto gevenu; badiva au maḡeve ketake auki ḡaḡae kinu. Eduge daure avie ḡahi ketovare, au maḡeve aviera.” ⁴⁸  Gerege Iesu raki negu maḡi e kironu, “Ai daureve aukamu keto gevenu.” ⁴⁹  Edube au ruta tamuta patava gurahane iabeki iavahu bebe beragei, “Ona unuhunu koita iau daureve ḡainage auki maḡe ḡahima?” ⁵⁰  Gerege auki maḡi e kironu, “Mai ruta ote; ai uhu berebeve ramu a maḡuri ḡahanu.”