¹ Sabadi vani beige Iesu raki koni ḡeḡe oḡi otege uhura, au ḡamituhe iabera koni omoto ada butugei idiḡi iege. ²  Eduge Faresea koita be iaberaki beraḡanu, “Esemena ai ḡamituhea aena dodoi sabadi vaniva ḡuma vire kia?” ³  Iesu raki ronu, “Iana Davida au soukuhe ruḡa ḡuburaḡohi kine dahida veitenu? ⁴  Aukamu Dirava iaga aenave otare auki parao Aena ḡahi maemane auki idiḡi iege, parao era aena vara koita nune bera beta isa edube dubu bauge iana iavahu isa, mati be idiḡime auki au soukuhe mohigei iauka isa?” ⁵  Gerege auki boriti ḡahigei ronu, “Koita Ḡamika vara sabadi rohivara.” ⁶  Auki sabadi vani bei dubu otime auki Dirava gare viege, atabe tage uhurahe gura gurave auki au ada vamaḡa vera hoekera. ⁷  Dubu biavaia renu Faresea ḡahava iabaki eraḡege auna negu ata e maḡe ḡahiḡa vanu sabadi vaniva, gerege iauka kirosa aukamu ni aenave auki dodoanu. ⁸  Edube Iesu ra iau uhu ananave dibana, eige auki ata ada hoekete kironu, “Urimi oroḡi oi rama.” Auki ei urimi ramanu. ⁹  Gerege Iesu raki kiro gevenu, “Iake daki ia berageima, auna aena vanu no maḡe kiare se nona sabadi vaniva daure kisa, se nona koita be maḡuri ḡahisa se nona daure ḡahisa?” ¹⁰  Auki niḡahi inuhati eragei oriḡare, auki ata e kironu, “Ai ade inuḡa.” Auki au ade inuḡege au ade raki maḡe ḡoinu. ¹¹  Eduge iauki hoḡahi mati bebe gaḡagei iauna orenaki Iesu kisa. ¹²  Auka vani eiau gera nimu ge auki otime auki imimi viege; renu auka vahi uhuḡatu ge auna Dirava ḡasina imimi visa. ¹³  Va tahege, auki au ḡamituhe au utube-abu idigevene ihirogei, auki aposetolo rogei ihiva iaukamu onu: ¹⁴  Simona, auki ihiva ronu Petero, renu au ḡoḡe Anderea, renu Iakobo, renu Ioane, renu Filipo mati Batolemeo, ¹⁵  renu Mataio, renu Toma, renu Iakobo auka Alfeos moera, mati Simona, auki ihiva kinu Selota, ¹⁶  mati Iuda auka Iakobo moera, mati Iuda Isakariota auka bi kiki koita. ¹⁷  Auki iau ruḡa uguhime auki vata ieririva rami, au ḡamituhe dadaḡa ruḡa renu koita dadaḡa ḡainage Iudea uhuḡatu, Ierusalema seni, mati Taire renu Sidiona eve kasiva oḡova iau. ¹⁸  Iauki oroḡi Iesu gare ihare renu iau dikave maḡe ḡahigei; mati bea sua daure idigevenu auki maḡe ḡahi gevenu. ¹⁹  Mati koita inuhati iauki gahara raḡi kamuisa, eige au hedoke raki au seni hakivime auki dika koita inuhati maḡuri ḡahi gevenu. ²⁰ Gerege auki au ḡamituhe eragevare auki ronu: Goroa ḡaha iabera maḡera, badiva Dirava basileia vera iau era. ²¹ Iana negubutu ḡuburaḡoha iabera maḡera, badiva iai dera bu raḡira vara. Iana oḡoreana ia huhu naḡoha iabera maḡera, iaka heḡiri raḡira vara. ²²  Koitaia iana a enana ḡaha, iau a besibe ḡaha, mati a namiḡa, renu iai ihe daure ḡahi besibe ḡaha, badiva Koita Ḡamika Moe dainehe, ama heḡiri visa. ²³  “Ama vani ei heḡiri raḡisa, badiva damuna ketake vara vava gera; eramu iau vahiruhe peroveta ḡaha iau kiege naḡatera. ²⁴  “Eduge uhudau ana ada-bubu koita vanu, eramu ai damune aki manu. ²⁵  Iana negubutu iai de na bu raḡanu, iaka so ḡubu raḡohira vara. Iana negubutu gena ia tati raḡa, iaka so huhu naḡohi niḡo raḡira vara. ²⁶  “Iana Koita iana ia maḡeve gava raḡa, eramu iau tene gahatuhe peroveta avaunaḡe ḡaha iau kiege naḡatera. ²⁷  “Eduge da uhuiamare ḡahavaia iama ihisa, Iama ia enana ḡahavaia iama maḡe ḡahigeisa, ia besibe ḡahi gevare iama maḡe ḡahigeisa, ²⁸  iai ḡuma daure kiare ḡahavaia iama maḡe ḡahigeisa, daure kiare ḡahava iau ada ama imimi visa. ²⁹  Edube koita be ai tihie madavege, ama hakirava tage moimisa; mati iau bena ai ahatane ogonava idiḡima a negu ruḡugei ḡoiraḡime. ³⁰  Koita bea ai imimi raḡa ama moimisa; mati koita bea ai iaḡane idigevare, a negu iau ro ḡoiraḡime. ³¹  Ḡuma kobuḡa a kiare naḡate iauna so enaki ai kiare. ³²  “Iana ia maḡe ḡahi gevare ḡahava ia maḡe ḡahigeva, ena otavado maḡe be mi ororo vanu? Daure ḡahava ḡainage maḡe ḡahi gevare maḡe ḡahigeva. ³³  A koita be maḡe ḡahare ai maḡe damune, ena otavado maḡe be mi ororo vanu? Daure gaha gainage ḡuma kobuḡe iauna kisa. ³⁴  Ana koita be iauena a mohi gevare iauka a moimi ḡoiraḡohisa, ena otavado maḡe be mi ororo vanu? Daure ḡahava ḡainage daure ḡaha iaue kia, iauka so tinabe mi ḡoiraḡohisa. ³⁵  Eduge ama a enana ḡahare maḡe ḡahi geisa, renu aue kisa, edube a negu damuna anaime. Ai damune ra ketakera vava, erehuta Rohi Vava uiare au ḡamuhe ḡahiga vara; aukamu enana raḡare mati daure ḡaha auki maḡe ḡahigeima. ³⁶  Ama vaḡahu visa, negu ai Mame vaḡahu viare naḡate. ³⁷  A negu berabe vime, eige iauka beta a berabe vara; renu a negu be sine kime, badiva iau negu ai sine kime. Ama vagua ḡahigeisa, gerege iauna aie vagua ḡahisa; ³⁸  moima, eige auna a moimisa. Ai ḡuma maḡeve, ama kamui kobuḡa ḡahi vaḡava ḡahisa, auna tobo raḡisa, iauna mi ai ada maemisa; eige a miare eramu a moimane era.” ³⁹  Eige auki mati badigomu be kiro gevenu: Riaḡahe koita be ni kopute bena au naḡate ni kopute be nisiḡami ḡamiḡa vanu? Iauna beta iau abu aba uhura desuraḡi raḡira vanu? ⁴⁰  Ḡami bera beta au biage variada ḡoiḡo vara, eduge unuhuna uhuvakate koita vanu eramu au biage naḡate ḡoiḡoara. ⁴¹  Esemena ai oḡo nane niehe idi tarana eraḡima, eduge aka ai niehe aie era aka erara veite? ⁴²  Se orenaki gena a ai oḡo nane kiroma, Vasi, da ai niehe idi tarana emi hakivima, aka ai niehe era aka erara veite? Tarata ḡahaia, uriḡahi ai niehe idi tarana mi hakivare, gerege ana reḡunaki niḡa niḡa viare ana ai oḡo nane niehe aue mi hakivisa. ⁴³  “Idi maḡe bera beta madika daure kiki vara, se idi daure tage beta madika maḡe kiki vara; ⁴⁴  eige idi inuhati ge au madikehe ana dibana ḡahisa. Aka beta idi tahaka be ḡati daure iau mimi vara, se aka beta idi madika maḡe be gahara uhura mimi vara. ⁴⁵  Koita maḡe be au soruke maḡenu auka iaḡa maḡe kikivara, mati koita daure be au soruke daurenu auka daure kikivara; eige ai soruke uhuḡatu maemare era aki gavi roma. Iaga Ḡaika Abu ⁴⁶  “Esemena a daki roma Rohi Bauge, Rohi Bauge, eduge aka da aki roiare kiki veite? ⁴⁷  Daka koita be di ḡasina oroḡare, di gare ihare, mati ḡumahe maḡuri viare, dana a ḡaḡiromisa. ⁴⁸  Eramu erehuta ata be au iage ḡone naḡate, auki aba rohi dobuke ḡahare muni ada ḡaikava kinu; ei taḡo raki ḡadimi auhe au iage vaḡava ḡahi, eduge auka vaḡava veite, badiva au ḡaikera muni ada ge auki ḡonu. ⁴⁹  Eduge unuhuna ihinu edube auka maḡuri ḡahiḡa veitenu, era erehuta negu ata be au iage vata ada ḡone ḡaikava berebe veite. Eiga eia taḡo oroḡane, ḡamana veite au iage desuraḡi renu iaḡa inuhati daure ḡahanu.”