¹  Iesu raki vani bei Ḡenesareta gohu ḡaika ramege, koita iabaki bebe sedegei auka Dirava gare roege iauka ihisa, ²  auki vanaḡi abu eve ḡaika eragei; ḡami iabera iau rekeve reḡugei keto gevege. ³  Auki Simona vanaḡihe guivare, auki boriti ḡahigei iauka tinakibe doḡoi eve hakiraḡisa. Gerege auki guramare vanaḡiva seni koita gaḡa gevege. ⁴  Auki koita gaḡagei kosavare, auki Simona kironu, “Tinabe virehe dobukehe otare renu reke maemiahe noma ei karava be misa. ⁵  Simona kironu, “Di Biage, nokamu vahi ketake oige noki korahi raḡohi iaḡa be mimi veite. Edube a roiare, daka oi reke ḡaḡiremire vara. ⁶  Iauki au rone kiege, karava dadaḡava raki iau rekehe uguhi gerege iau rekeve tage isukahe dariḡohege. ⁷  Gerege iauki iau soukuhe iau vanaḡihe ihirogei iauka iahe geisa. Iauki vanaḡi abu ruḡa karava udai toboḡagei, vanaḡiva ḡainage isukahe eve uguraḡege. ⁸  Edube Simona Petero raki eraḡare, auki ḡorumi ate Iesu komukone ḡereḡere ḡahi, gavi roege, “Dai seni veite ḡoi, Rohi Bauge, daka daure koita vara!” ⁹  Badiva au mati oḡoreana iau ruḡa ge iauki ḡaḡu raḡohi iau negu karava ḡamane eraḡane; ¹⁰  renu iau ruḡa ge ramu Sebedaio ḡamuhe, Iakobo mati Ioane, iauka Simona vasiruhe iabaki. Gerege Iesu raki Simona kironu, “A negu siḡoime, negu vani otare iau aka koita ididi vara.” ¹¹  Iauki iau vanaḡive abu ruḡa idigei gohu ḡaika ḡosigare, iaḡa inuhati ḡaregevare iauki au itahe oḡinu. ¹²  Vani beige auka oḡo bei, ata bera lepera raki ahataniva uhuḡatu ḡodomanu. Au niḡahi Iesu eraḡane, auki au vaḡotoni edemi ḡorumare auki imiḡanu, “Di Rohite, ana da maḡe ḡahiḡa vanu, akaki avaḡu hedokate ana kisa.” ¹³  Gerege Iesu raki au ade inuḡi kamuare, auki kironu, “Eige daki aki ronu aka maḡe ḡoiḡo vara.” Tutube viege negu lepera eraki ḡaremanu. ¹⁴  Mati auki kironu auka beta koita be kirosa. “Ote,” auki kironu, “oti dubu ḡahe iau ḡaḡae ḡoisa, mati, Mose aena rone, iama badiva koita boriti ḡahigeisa akamu maḡe ḡoinu.” ¹⁵  Eduge Iesu badine raki hakivime mata inuhati iau; koita iabaki iau bouge bouraḡohi au gare ihisa mati iau dikave maḡe ḡahigeisa. ¹⁶  Edube auka ḡaregei hakivi oti kerike veite matahe auna imimi otisa. ¹⁷  Vani bei, Iesu gure hadiba viege uhurage, Faresea mati aena ḡahava iabaki gura gurave (iauka Galileia renu Iudea oḡova inuhati seni iauki oroḡi, mati Ierusalema seni); gerege Rohi Bauge hedoke ra au uhurehe ge auki koita maḡuri ḡahi gevege. ¹⁸  Gerege koita be iabaki atabe ahataniva hoeke au iaḡia gedake ruta hirihita mi oroḡonu. Iauki mioroḡisa Iesu vaḡotoni maemisa; ¹⁹  eduge koita dadaḡa iau dainehe iauka ḡuma veite siri raḡira, gerege iauki mi iaga ḡurida ada otare iauki vakava kiare iauki mi koita dadaḡa iau vaḡa mi uguraḡohi Iesu vaḡotoni maemanu. ²⁰  Auki iau ihihive renu herove eraḡare, auki ronu, “Di Vasiruhe, riaḡa vara daki roma, Dirava ramu iai daureve keto gevenu.” ²¹  Gerege dubu biava mati Faresea ḡahava iaberaki bebe beragei, “Ona unuhuna onaki Dirava gare vima? Koita bera beta riaḡahe ni daureve ketogei gevare, eduge Dirava avaḡugera?” ²²  Eduge Iesu raki iau uhurehe berabe raḡohi, auki kiro gevenu, “Esemena ia berabe ona kikive raḡa iai sorukehe? ²³  Orena berebe veite, auna rosa, Ai daureve aumu keto gevenu, se auna rosa, Urimi ramara oḡi? ²⁴  Eduge ama dibana ḡoisa Koita Ḡamika vara hedokate vata ada oi auna ai daureve ketoisa”—auki ahataniva hoeke boriti ḡahanu—“akera daki aki roma, urimi ramare renu ai gedake miare ama bina ai iagehe otisa.” ²⁵  Inono veite auki iau vaḡotoni urimare, au adahe iaḡare gedava miare au iagehe otinu, Dirava gure motea ḡahege. ²⁶  Iauki iau bouge heḡiriva raki idigei, renu iauki Dirava moteḡahi mati soru hiroro raḡi, roege, “Nokamu vani oigera no ḡuma erageige veite noki eraḡevenu.” ²⁷  E itaharahege auki hakivi otime auki tax idiḡare atava be, ihivara Levi, auka au me iagahe gura gurave eraḡanu; auki kironu, ”Di itahe oroḡo.” ²⁸  Gerege auki urimi iaḡa inuhati garegevare, au itahe oḡinu. ²⁹  Gerege negu Levi ata eraki au iagehe Iesu ni demaka ketake be kime; eige au me soukuhea mati koita be ḡainage iau ruḡa tamuta raḡege. ³⁰  Eige Faresea ḡaha renu iau dubu ḡahatuhe iabaki namina raḡi au ḡamituhe iau, roege, “Otavado dainehe au gure tax ididi ḡaha mati daure ḡaha ruḡa au tamuta vima?” ³¹  Iesu raki ronu, “Oḡoreana iana maḡe ianu iaka beta iahe iahe iaḡoia vara, eduge dika raḡare ḡahava iavahu gena; ³²  Da oroḡane ra beta maḡe koita iau gera eduge daure koita au ḡuma daureve ḡaremi ḡoiraḡane iau gera.” ³³  Gerege iauki kironu, “Esemena Ioane ḡamituhe, renu Faresea koitavaia iau ḡainage, tamuta veite iauki imimi raḡa, edube ai ḡamituhe iabera tamuta raḡoha.” ³⁴  Iesu raki kiro gevege, “Ana riaḡahe ata isaḡe be maḡi mane au deiva tuhe kirogei iauka beta tamuta raḡisa, se? ³⁵  Vani be orogare eige ata isage maḡi mane iauka so mi ḡeahu otito vara, gerege vani eige iauna tamuta veite gahisa.” ³⁶  Auki mati badigomu be boriti ḡahi gevenu: Koita bera beta riaḡahe ogona isaḡe baraka be miare ogona emene be bani bani vara; ena ḡoiare isaḡe era dariḡohiḡo vara, renu isage baraka era emene ḡorehe beta ḡere ḡereve raḡira vara. ³⁷  Mati koita bera beta ḡadiki isaḡe mi vada emeneva bouhubo vara; veite ḡoiare ḡadiki isaḡe vadakava dariḡohare renu bohu raḡira vara, mati vadakava tage daure ḡoiḡoara. ³⁸  Eige iama ḡadiki isaḡe mi vadaka isaḡeva bohuḡisa. ³⁹  Mati bera beta ḡadiki emene iare itaharahe ḡadiki isage maḡeva rosa, edube auka roro vara, Emene eraki maḡe riaḡa.”