¹  Iesu Ioridana seni ḡoiraḡane, Horu Aena raki tobo ḡahi ge auki nisiḡami mata ḡaḡaeva otinu, ²  Iesu ra vani utu-ababu diabolo raki tohoḡanu. Auka vani eiau uhura tamuta veite, ia ³  Gerege diabolo raki kironu, “A Dirava Moe ḡoiege, ama muni o kiro gevege iauma tamuta maka gahisa.” ⁴  Iesu raki kironu, “Buka ramu ronu, Koita bera beta ahata makaḡu ge auki maḡuri vima. ” ⁵  Gerege diabolo raki nisiḡami auhe otare auki mata ketake inuhati ḡaḡiromi. ⁶  Renu diabolo raki kironu, Ana mata o dainakehe mati hedova inuhati dana mi a moimisa; badiva iaga o inuhati ge daiera, eige daka hedo mi unuhuna da gahara viare dana moimisa. ⁷  Eige, a komuko daivi da maḡe ḡahege, ora inuhati aie ḡoiḡoara.” ⁸  Iesu raki kironu, “Iaukamu buka maemanu, Ama Dirava ai Rohite maḡe gahisa, mati auḡu au meve kisa.” ⁹  Gerege diabolo raki nisiḡami otinu Ierusalem, dubu aena adahe ramege, auki kiroege, “A Dirava Moe goiege, ama oi geroi uguhisa, ¹⁰  Iaukamu buka maemanu, Auka au anerutuhe ai dainehe kirogei gevara,a nitabata gahisa, ¹¹  mati Iauka iau adahe a mi iageia vara, eige aka beta muni ai vase ḡamiḡa vara.” ¹²  Iesu raki ronu, “Aukamu ronu, A negu ai Rohite Dirava tohoḡime.” ¹³  Diabolo au tohotoho ḡumave kosaragege, auki Iesu ḡaremare ate mati vani bei. ¹⁴  Gerege Horu Aena hedoke ra Iesu uhura eige auki ḡoiraḡi Galilea otinu, iauki au badine ro ioa raḡege mata e inuhati iau. ¹⁵  Auki oti hadiba vi ioavege iau dubuve iau gerege koita iabaki motea ḡahege. ¹⁶  Gerege auki Nasaret oti au ḡurui ḡadimane matahe hakivi, sabadi vanihe auki dubu otinu, iau tene kiege ḡumahe. Auki urimi rami auka buka dahisa, ¹⁷  renu iauki Isaia peroveta koitava bukave moimanu. Auki buka baovi oti iau maemi rone: ¹⁸  Rohi Bauge Suare ra di ada gera, badiva aukamu da aena ḡahanu daka hari maḡe mi oroḡisa goroa iau. Auki da besuḡanu daka hari maḡe ro ioaisa dauraḡohane iau renu ni tubukate iabera niḡa niḡa raḡisa, mati daure ḡaha maḡuri ḡahigeisa, ¹⁹  mati Rohi Bauge uhu maḡe taua badi maḡeva rosa.” ²⁰  Gerege auki buka kuivi ḡoiragare, auki mi au reḡure koitava moimare, auki ḡuramanu. Dubu uhura ḡahava iau bouge iauki niḡahi auḡu eraḡege. ²¹  Gerege auki gavi kirogei, “Vani oigera iakamu ihinu buka aenava ramu riaḡa gahanu.” ²²  Iauki iau bouge au gare raḡi renu motegahege au avaḡehe ga maḡe ga maḡe hakivege. Iauki roege, “Ona beta Iosefa moe enu?” ²³  Iesu raki kiro gevenu, “Eige iakamu daki rorovara iau ga raḡi roiare naḡate, Dika maḡe ḡahiḡa, iavahu ia maḡe ḡahisa! Mati amu roma, Ama oi ai oḡehe tage no badi ihigevene a Kaperanamu kiege naḡate kisa.” ²⁴  Mati auki ronu, “Riaḡa vara daki a boriti ḡahima, peroveta koita bera au oḡehe iauka beta riaḡa ḡahiḡa vara. ²⁵  Eduge riaḡa vara, Elia negahe ḡobu dadaḡa vara Isaraela ge iauki gurahege, veni raki tau abigaḡa bata agorokiva ḡoroḡo veite, gerege doe raki mata e uhuḡatu manu; ²⁶  eige Elia ra Isaraela ḡobua be iau ḡasina otito veitera edube ḡobu be Sarefa oḡova Sidiona uhura au ḡasina ge auki otinu. ²⁷  Peroveta Elisa negahe tage, Isaraela gera lepera ḡaha dadaḡa gainage ei uiege, eduge dadaḡa vara maḡe ḡahiḡa veitera, edube Namana auka Suria atavara auki avaḡu maḡe ḡoinu.” ²⁸  Koita iabaki dubu uhura badiva ihare iauki iau bouge ho ḡahanu. ²⁹  Iauki urihare, oḡo seni oiahi haki raḡohi, iauki nisiḡami otinu iau oḡe nimu eḡiahu kine, eige iauna dorivi kiravisa. ³⁰  Eduge auki koita dadaḡa iau vaḡa auki oḡi hakivanu. ³¹  Auki uguhi Galileia oḡo be Kaperanamu otinu, eige auki sabadi vaniva hadiba viege. ³²  Iauki au hadiba viege gava ihi moteḡahi, badiva au gavege gava iabera hedo ruta ge auki roege. ³³  Dubu uhura ge ata bera sua daureva raki au uhura, gerege auki nivi baravege, ³⁴  “No garegeve! Iesu Nasareta koita, ana otavado a noi kisa roma? Ana no ḡahigeige romena a oroḡanu? Daka dibana ana unuhunu, aka Dirava Aena ḡahane koitavara. ³⁵  Eduge Iesu raki namigi roege, “Kerigoi, mati ata ei itahe hakiva!” Negu sua daure eraki iau vaḡotoni mi vata kira vare, gerege auki ata ei hakivi auka huhu gahiga veite. ³⁶  Iauki iau bouge gagu raḡohi renu bebe beragei roege, “Ona otavado ga vanu? Auka aena mati hedo rutage auki sua daure ḡanito ḡahi iauka itahe hakiraḡisa!” ³⁷  Gerege iauki au badine ro ioa raḡege mata ketake oḡova iau. ³⁸  Auki dubu ḡaremi Simona iagehe otinu. Simona raki boriti ḡahanu au vare maḡi vara komata raho tinabe auki manu. ³⁹  Auki maḡi e omote ḡaika ramare auki komata e namiḡege auki ḡaremanu. Tutube viege auki urimare mati iahe gevege. ⁴⁰  Vani uguhi otege uhurage, koitaia komata nune nune inuhati iauki idigei Iesu ḡasina oroḡanu; gerege auki au ade mi iau ada kamugei iauki maḡe ḡahanu. ⁴¹  Sua daure ḡainage koita dadaḡa iau uhura haki raḡohi, to raḡi, “Aka Dirava Moera!” Eduge auki namigei iauka beta ga raḡisa, badiva iauka dibana auka Keriso. ⁴²  Va tahege auki urimime auki kerike veite matahe otinu. Gerege koita iabaki iaḡoi ioa raḡege; iauki behuḡare iauki rugui auka beta ḡare geisa. ⁴³  Eduge auki kiro gevenu, “Dama Dirava basileia hari maḡe gava mata be iau oti rosa; badiva au da besuḡane meve aukamu ora.” ⁴⁴  Gerege auki Dirava hari maḡeve behi Iudea dubu iau ro ioavege.