¹  Iaḡa e iau itaharahe Rohi Bauge eraki ata utu-iatiraḡa hakira-abu idigevare abu abu uriḡoi besugei otinu. Iauki au uhurehe anai auka ihie mata e oḡova eiau otisa, oḡova inuhati iauki otinu. ²  Auki boriti ḡahigei ronu, “Ḡeḡe demaka vara dadaḡa vara, eduge me ḡaha iabera dadaḡa veite; eige taboro Rohiva imiḡa au me ḡahe be besugeve au ḡeḡe taboro ḡahe. ³  Otiahe da rone matahe. Eraḡa, dakamu erehuta mamoe ḡamika besu gevare gahara totoka iau uhura. ⁴  Ia negu iago ḡamika be miare, se iago bauge be, se vasi iaḡa be, mati a negu ḡumaḡa koita be ga ḡahime. ⁵  Iaga oreigena a ḡadimanu, ama uriḡoi maḡe gahigei rosa, Dirava mai maḡeve Iai iagehe misa! ⁶  Eige bena mai uhura gurami, ai maḡeve ramu koita e iau ada ḡoisa, eduge veite ḡoiege, auka ḡoiraḡi ai ḡasina. ⁷  Ama iaga kobuḡa ei guramisa, demaka se eia iau a moimare ama misa, badiva me koitava enaki kime iauki au damune kia. A negu iaga bei oti iaga bei enaki kime. ⁸  Ana oḡo oreigena a sirivima mati koitavaia a maḡe ḡaha, iau ai vaḡotoni demaka maemare ama isa; ⁹  ama ei dika raḡare maḡuri ḡahigeisa, mati kiro geisa, Dirava basileia ramu ai ḡaika oroḡonu. ¹⁰  Edube a oḡo bei oti mati iauna a maḡe ḡahiḡa veite, ama oroḡi hakivare gavi rosa, ¹¹  Noma iau oḡe soua ni vasehe, noma dahu gevare eramu iau besibe ḡumaḡe. Eige iama ihisa: Dirava basileiave ramu ai ḡasina. ¹²  Akera daki a boriti ḡahima, berabe vani miare Sodomo koitava iau isuke ra avie eduge oḡova ra huhu naḡina vara. ¹³  Uhudau vanu ianu, Korasini mati Betasida! Badiva hedo me iai kine iauna so Taire mati Sidono iau meva kiare, iauka subuta iau maḡuri daureve ḡaregei, iauka beta onaki ogona emene kiege buibu uhura guragu vara. ¹⁴  Eduge berabe vaniva Taire mati Sidono iau isuke ra avie edube iai gera veitera. ¹⁵  Mati ia, Kaperanamu, iana vava ḡadiḡa vanu se? Veitera, iaka ugu raḡohi vata uhura. ¹⁶  “Unuhuna ai gare ihima era di gare auki ihima, mati unuhuna a besibe ḡahima auka da auki besibe ḡahima, renu unuhuna da besibe ḡahima auka da besuḡane koitava auki besibe ḡahima.” ¹⁷  Iau ate utu-iatiriḡa hakira abu heḡirita ḡoiraḡohi, roege, “Rohi Bauge, nokamu ai ihe roege sua daure ḡainage ni gare ihinu!” ¹⁸  Auki kiro gevenu, “Dakamu satani eraḡege auki vava seni moruḡohi erehuta va gibaruva naḡatera. ¹⁹  Eraḡa, dakamu hedo ia mohi gevenu iaka inuhu renu mato mato raḡare iau ada oḡi duhageisa, mati enana raḡare iau hedoke gainage; edube iaḡa bera beta ia huhu ḡahigei gevara. ²⁰  Eige, ia negu heḡiri raḡi roia sua daure iai gare ihinu, eduge bu heḡiri raḡisa iai ihe iaukamu vava ḡosiḡanu.” Iesu Heḡiri vanu ²¹  Vani kobuḡa eige Iesu raki Horu Aena heḡiri ḡahi ronu, “Riaḡa, di Mame, va mati vata o iau Rohive, akera daki a maḡe ḡahima, badiva aki iaḡa o inuhati uhu vaka ḡahe mati uhu anana ḡahe iau ḡaḡae ḡahiga veite eduge karukare iauge aki ḡaḡae kinu; riaḡa, Mama, onaki ora ai uhu anana maḡe vera. ²²  Gerege auki koita gaḡagei ronu, di Mame ramu iaḡa inuhati da moimanu; eduge koita bera dibana veite au Moe edube au Mama avaḡu, se au Mame tage iauka dibana veite edube au Moe avaḡu gera, eige au Moe avaḡu unuhuna au miare ena au ḡaḡae kisa.” ²³  Gerege iau iavaḡu ḡahege Iesu raki aniḡoi au gamituhe iorena gaḡagei ronu, “Iama heḡiri raḡisa iai niehe otavodoana ia eraḡa! ²⁴  Eige daki roma peroveta dadaḡa mati oḡo rohivaia iau uhure iauna so ia eraḡane eraḡare, eduge iauka erara veite, mati iauna so ia ihine ihare, eduge iauka ihihi veitera.” ²⁵  Gerege Aena koita be raki urimi rami Iesu beraḡanu, “Di Biage, dana orenaki maḡuri behi behi misa? ²⁶  Iesu raki kironu, “Otavado aenava iau bukava maemanu? Daha otavado iau maemane roma?” ²⁷  Auki dahi ronu, “Ama Dirava ai Rohi Bauge maḡe ḡahisa ai soruke uhuḡatu, ai uhure uhuḡatu, renu ai herove uhuḡatu, renu ai ananave uhuḡatu; mati ama avaḡu a maḡe ḡahare naḡate ai oriḡi koitava ama maḡe ḡahisa.” ²⁸  Iesu raki kironu, “Aka ga riaḡa aki ronu; onaki kiare, ana maḡuri behi behive misa.” ²⁹  Eduge auki avaḡu au ḡumaḡe ieriri ḡahisa rome, auki Iesu beraḡanu, “Gerege di oriḡi koitava na unuhunu?” ³⁰  Iesu raki kironu, “Ata bera Ierusalema ge auki urimi Ieriko otege uhura auki vaho ḡahe iau uhura uguhanu, iauki au ogonave darivi, ḡami hodivi hoekisa raḡare iauki ḡumaḡa ḡarehi. ³¹  Ḡamana veite dubu koita be tage ḡuma kobuḡa ei otege uhura; auki niḡahi ata e eraḡare, auki ḡuma hakirahe otinu. ³²  Levi koita be tage ḡuma kobuḡa ei otege, auki niḡahi ata eraḡare, auki mati soiḡi hakirahe otinu. ³³  Eduge Samaria ata bera au ioave auki ḡuma kobuḡa ei otege uhura; auki niḡahi eraḡare auki vaḡahu ḡahi. ³⁴  Auki ḡoromi au ḡasina otare auki au beroḡe ḡadiki eiava keto gevare auki ḡodogei. Gerege auki mi au donikihe ada maemare, auki guragu iaga bei mi otare ei nitabata ḡahege. ³⁵  Va tahege auki moni be mi iaga bia moimare, kironu, Ama oi nitabata ḡahisa; da ḡoiraḡege, ana otavado a au kinu dana damuna kisa. ³⁶  Gerege iau ate abigaḡa uhura, ana unuhuna a roma vaho ḡahe iau uhura uguhi atava oriḡi koita vanu?” ³⁷  Auki ronu, "Vaḡahu ḡahane koitava." Iesu raki kironu, "A tage ote au kine naḡate ama kisa." ³⁸  Iau otege uhura, Iesu raki oḡo bei hakivi, eigera maḡi be ihivara Mareta auki Iesu maḡe ḡahare auki nisiḡami au iagehe otinu. ³⁹  Mareta ḡoḡe avieva ihivara Maria, auki Iesu vasi ḡaika gurami au gare ihege. ⁴⁰  Eduge Mareta ra iaga uhura meva uhu korahiva auki kiege; gerege auki au ḡasina otare kironu, “Rohi Bauge, dakamu davahu ge daki me inuhati kima di ḡoḡe na beta da iaheia vanu me be kiki vanu? Kiro au oroḡi da iaheḡe.” ⁴¹  Eduge Rohi Bauge raki kironu. “Mareta, Mareta, akamu ahata maka iaḡaniva iauge aki uhu korahi vima; ⁴²  edube iaḡa kobabeḡu, iaganiva Maria raki maḡeva manu, eige koita bera beta mati au mimi vara.”