¹  Gerege Iesu raki badigomu be boriti ḡahigei roma iama vani inuhati imimi raḡisa ia negu vagua guragu raḡime. ²  Iesu raki ronu, "Oḡo beige berabe koita bera auka Dirava siḡamiḡa veite renu koita ḡainage siḡa geige veite. ³  Oḡo ei tage maḡi ḡobu bera vani inuhati au ḡasina otare renu kiroma, Da iaheḡi di ḡumaḡe maḡe ḡaha da enana ḡahare koitava ḡasina. ⁴  Auka so uriḡoi besibe viege; eduge auki ihie anai roma, Eduge dana Dirava siḡami renu koita siḡa geige veitenu, ⁵  edube ḡobu oramu vani inuhati ge auki di ḡasina dodo vima, daka au ḡumaḡe maḡe ḡahiḡa vara, eige auka beta ḡaitana da dodo ḡahi ḡoiraḡira vara." ⁶  Gerege Rohi Bauge raki kironu, “Iana berabe koita vire avanaḡe gare iana iha. ⁷  Gerege ia anavare Dirava na beta au koitatuhe vani mi vahi mi niḡo raḡare iau maḡeve mohigeige vanu? Auna uhu berebe vi so beta vaina iahe geige vanu? ⁸  Dakamu roma, auka vaina iau ḡumaḡe maḡe ḡahiḡa vara. Eige, Koita Ḡamika oroḡare iana riaḡahe vata ada oi riaḡa ḡahare erara vanu?" ⁹  Iesu raki badigomu be boriti ḡahigei koita bea iavaḡu roia iauka maḡe edube be iabera iauka iaḡa be veite: ¹⁰  “Ata abu ge imimi raḡisa eige iauki dubu otinu, bera Farisea mati bera teks idiḡare koitavaia. ¹¹  Negu Faresia ata era avaḡu ḡeahu rami, onaki imimi viege, Dirava, akera daki a maḡe ḡahi badiva daka beta koita be iau naḡate: vaho koita, ḡuma daure kiare, ni muduka, se beta teks idiḡare koitava iau naḡatera. ¹²  Daka pura be uhura vani abuge daki aena vi tamuta veite, renu di damune miare inuhati dakamu aie tage daki maemi. ¹³  Eduge teks idiḡare atava vire ḡamana rami, auka beta riaḡahe vava gagai ni ḡahiḡa vara, edube au dokane auna ḡami rosa, Dirava, da vaḡahu ḡaha, daka daure koita vara! ¹⁴  Daki aki roma, ata ora au iagehe otare auki uhu maḡe ruta ḡoiraḡanu edube bera veitera; eige iana unuhuna ia heḡiri raḡa iaka maḡe ḡahiḡa vara, eduge iana unuhuna maḡe ianu iaka heḡiri raḡira vara." ¹⁵  Koita iabeki iau ḡamuhe idigei Iesu ḡasina otege auka kamui geisa; eduge au ḡamituhe iabeki eraḡi, iauki namigei roege iauka beta otisa. ¹⁶  Eduge Iesu raki ihiro gevare kiro gevenu, “Momono ḡaregeve iau di ḡasina oroḡe, momono enaki kikive iabera Dirava basileia vera iau era. 17 Riaḡa vara daki roma, Unuhuna Dirava basileiave riaḡa ḡahiga veitenu momono o iau naḡatenu auka beta sirisi vara." ¹⁸  Koita bauge be raki beraḡanu, “Di Biage maḡeva, dana otavado kiare maḡuri behi behive misa?” ¹⁹  Iesu raki kironu, “Esemena a roma daka maḡe? Noka bera maḡe veitera eduge Dirava avaḡu gera. ²⁰  Ana aena dibana veitenu: A negu ḡuma daure kime; A negu ni muduka vime; a negu vaho vime; a negu avanaḡe vime; Ama ai mame mati ai neine maḡe ḡahi geisa.” ²¹  Auki kironu, "Dakamu aena o inuhati ge daki di kusinaike kiege." ²²  Iesu raki au gare ihare, auki kironu, “Iaḡa kobabe aki kiki veite. Ai kohue inuhati hae vare renu damunava mi ama goroa iahe geisa, vava eige ai damune ramu enu; gerege di itahe oroḡo." ²³  Eduge au Iesu gare ihine negahe, au uhure raki huhu naḡi; badiva auka ada bubu koita vara. ²⁴  Iesu raki niḡahi eraḡare kironu, "Uhudau bena ianu ada bubu ḡahavaia Dirava basileiave sirisi vara iai bere berera! ²⁵  Riaḡa, kamela vara riaḡahe kobi nika ḡamikava sirisi vara, edube ana unuhuna ada bubu koita vanu beta riaḡahe Dirava basileiave uhura sirisi vara. ²⁶  Au gare ihine ḡaheva iabeki beraḡanu, "Gerege unuhuna maḡuri misa?" ²⁷  Iesu raki kiro gevenu, “Koita iana iaga be ḡereḡere veite kiki vanu Dirava augera riaḡahe kiki vara. ²⁸  Gerege Petero raki ronu, “Eraḡa, noka ni bouge ni iage ḡarehare noki ai itahe oroḡanu.” ²⁹  Renu auki kiro gevenu, “Riaḡa vara daki roma, koita be ramu so beta, au iage se au mabare mati au ḡamuhe se au nanuhe se au iahuve ḡare gevenu, Dirava basileiave dainehe. ³⁰  Unuhuna roma auka beta iaḡa be mi ḡoiraḡisa negu tau oi, renu ihie tau oroḡare ei maḡuri behi behive misa." ³¹  Gerege auki au ḡamituhe utube hakira abu idigei ḡeahu otime auki kiro gevenu, “Eraḡa, noka Ierusalema otito vara, renu Koita Ḡamika iau peroveta ḡahi inuhati maemane eramu ei basu basu vara. ³²  Badiva iauka mi aena ḡahe mohigeige vara; eige iauna ḡami hodivi mati au ada tage saba raḡohisa. ³³  Iauka hodivare itaharahe, iauka ḡami hoeki vara, edube vani abigaḡa ḡahi ḡahe auka urimi ḡoiraḡira vara. ³⁴  Eduge iauka Iesu gare makava mimi veitera; riaḡa vara, au rone gava iau uhure ra bao raḡira veite, eige iauka au gare uhu maema veitera. ³⁵  Iesu ra Ieriko kahika ḡahi otege, auki niḡahi ata bera niḡa niḡa veite auki ḡumaḡa gurami imimi vima. ³⁶  Auki ihige koitaia iabeki oḡi otege, auki berabe viege. ³⁷  Iauki boriti ḡahi, "Iesu Nasareta koita eraki oroḡima." ³⁸  Gerege auki to barai ronu, “Iesu, Davida Moe, da vaḡahu ḡaha!” ³⁹  Koita bea uriḡahi rahirahe iabeki namina raḡi roege auka keri ḡoisa; eduge auki to barai roege, "Davida Moe, da vaḡahu ḡaha!" ⁴⁰  Iesu raki ramare auki kirogei iauka nisiḡami au ḡasina kahika ḡahi otisa; gerege auki beraḡanu, ⁴¹  "Ana otavado a roma daka ani kisa?" Auki ronu, "Rohi Bauge, dana so niḡahi ḡoiraḡare." ⁴²  Iesu raki kironu, "Ai nie ramu baoraḡanu; ai ihihive raki a maḡuri ḡahanu. ⁴³  Ḡamana veite au ni eraki baoraḡi auki niḡahi ḡoiraḡanu renu Iesu itahe oḡinu, auki Dirava maḡe ḡahi; renu koita inuhati eraḡane, iau bouge ḡainage Dirava motea ḡahege.