¹  Iesu raki Ieriko oḡo seni auki oḡi otege. ²  Eigera ata be ihivara Sakaio, auka teks idiḡare iau biagera, mati ada bubu koita vara. ³ Au uravera auka Iesu eraḡisa, eduge koita dadaḡa iau dainehe auki erara veite, badiva auka koita tuake vara. ⁴ Gerege auki uriḡoi rurui otime auki ioḡo idi bei ḡadimi auka Iesu eraḡisa, badiva auka ḡuma ei otito vara. ⁵ Iesu raki mata ei hakivare, auki ni iagemi eraḡare auki kironu, “Sakaio, vaina ḡoroma; daka negu vani oi ai iagehe oti guragu vara.” ⁶ Gerege auki vaina ḡoromare renu heḡirita mi au iagehe otinu. ⁷ Koitaia eraḡane iabeki mudumu raḡi roege, “Aukamu otime auki daure koita vire iagehe au deivave ḡoinu.” ⁸ Sakaio raki ramare auki Rohi Bauge kironu, “Eraḡa, di kohue hakirava, di Rohite, daka idigei goroa mohigeige vara; mati dana be iau iaḡa be idiḡanu, daka damuna kisa nega ababu dana mohigei ḡoiraḡisa.” ⁹ Gerege Iesu raki kironu, “Negu vani oigera maḡuri raki iaga oi roḡonu, badiva au tage Abarahamo moera. ¹⁰ Koita Ḡamika oroḡane badivara koita dauraḡohane iaḡogeisa mati maḡuri ḡahigeisa.” ¹¹ Iauka Iesu gare ihige uhura, auki mati badigomu be ronu, badiva auka Ierusalema kahika ḡahege, renu iau ananave iauka Dirava basileiave iau ḡaḡae ḡoisa. ¹² Gerege auki ronu, “Ata bauge bera au ioave oḡo ḡamana bei otisa au Rohive hedokava miare mati auna ḡoiraḡisa. ¹³ Auki au besu besu ḡahetuhe utube ihirogei, auki muni tahaka koba koba mohigei, erehuta bata abigaḡa damunava naḡate, mati kiro gevenu, ‘Iama me ḡahigeisa ate dana ḡoiraḡisa.’ ¹⁴ Eduge au oḡo ḡahetuhea iabera besibe ḡahi renu iauki oḡo koita bea au itahe besugei, roege, ‘Noka gahara veite ata ora ni Rohive ḡoisa.’ ¹⁵ Eige au rohi hedo mane auki ḡoiraḡi, auki au besu besu gahetuhe ihirogei, au muni tahaka mohigevene, iauka boriti raḡisa renu iauna muni tahaka kiege auna raho ḡoinu. ¹⁶ Uriḡoi koitava raki ronu, ‘Di rohite, dakamu utube adahege daki utube mati kinu.’ ¹⁷ Auki kironu, ‘Maḡera, aka ata maḡe vara! Badiva aka iaga avie ni tabata ḡahi maḡe ḡahanu, daka ami oḡo utube aka ni tabata ḡahiḡa vara.’ ¹⁸ Gerege abu ḡahiḡava raki oroḡi, roege, ‘Di rohite, dakamu ada kasiva daki adahe ada kasiva kinu.’ ¹⁹ Auki kironu, ‘Renu aka mata o oḡova ada kasiva ana ni tabata ḡahisa.’ ²⁰ Gerege be raki oroḡime, auki roege, ‘Di rohite, ai muni tahaka kobabe da moimane iaḡaniva one. Miare daki ogona tina bei ḡodomi maemanu, ²¹ akera daki a siḡami, badiva aka ata bere berera; aka a maema veite iaganiva aki manu, renu aka a beḡibe veite iaḡaniva aki dodo vanu.’ ²² Auki kironu, ‘Daka avaḡu ai garehege dana a beraḡisa, aka besu besu koita daure vara! Aka dibana, daka koita bere berera, daka da maema veite iaḡaniva misa renu beḡibe veite iaḡaniva dana dodo visa? ²³ Gerege otavado dainehe a di muni tahakave mi koitaia moni maemare maema veite? Eige daka ḡoiraḡi, dakamu tinabe iau adahani maemane mimi vara.’ ²⁴ Auki koitaia rahirahe kiro gevenu, ‘Muni tahake miare oti moni utube kine moimiahe.’ ²⁵ (Iauki kironu, ‘Ni rohite, auka utube bera auki manu!’) ²⁶ ‘Riaḡa daki roma, unuhuna iau ḡasina dadaḡa vanu, auka dadaḡa mimi vara; eduge oḡoreana iau veite, iau ḡasina iaḡaniva tage auka mimi vara. ²⁷ Eduge da enana ḡahare ḡahavaia da besibe ḡahi daka beta iau rohite ḡoisa—idigei oi di vaḡotoni oroḡare iama ḡahigei hoeki geisa.’ ” ²⁸ Iesu gavane itaharahe, auki uriḡatugei, Ierusalema ḡadimi otege. ²⁹ Auki oḡi Betafage mati Betani kahika ḡahi otege, oḡo ihiva Oliva nimu, auki au ḡamituhe abu besugei, ³⁰ roege, “Otiahe oḡo be iau vaḡotoni, ia ei siri raḡege iaka doniki ḡamika bera iauka me raroi maemane erara vara, bera so au ada guragu veitera. Iama vahegare mi oroḡisa. ³¹ Bea ia bera gevege, ‘Esemena ia doniki ḡamika e vaheḡa?’ Enaḡu kiro geisa, ‘Rohi Bauge eraki besu besu vanu.’ ” ³² Gerege au besu gevene ḡahava iabaki otime iauki au kiro gevene ḡumahe eraḡanu. ³³ Iauka doniki ḡamika vaheḡege uhura, biava raki beragei, “Esemena ia doniki ḡamika e vaheḡa?” ³⁴ Iauki ronu, “Rohi Bauge eraki ḡahara vima.” ³⁵ Gerege iauki doniki ḡamikava mi Iesu ḡasina otinu; iauki iau ogona adareva idigei doniki ada tatavare vare, iauki Iesu iaheḡi auka adahe guramisa. ³⁶ Iauka ḡumaḡa otege, koita iabera iau ogonave idigei ḡumaḡa tatagei otege. ³⁷ Auka Oliva nimu seni uguhi Ierusalema hakivisa, au itahe oḡiare ḡaheva dadagava iabeki iau bouge heḡirita to raḡi gure Dirava motea ḡahi au hedo meve kiege iau era gevege dainehe, ³⁸ roege, “Ni Rohite maḡe ḡahiahe aukame Rohi Bauge ihehe oroḡima! Au maive vava gera, mati vava vava motea ḡahisa!” ³⁹ Farisea ḡahe bea koita dadaḡa iau vaḡa geraki kironu, “Ni Biage, ai ḡamituhe namigeve iau keri ḡahe.” ⁴⁰ Iesu raki kiro gevenu, “Iake daki iaki roma, iau negu keri ḡahare, muni o iabera to raḡira vara.” ⁴¹ Auka oḡo hugure ḡahi oroḡoge auki niḡahi eraḡare, auki vaḡahu ḡahi, ⁴² roege, “Edube ia ḡainage iana so negu vani oi dibana ḡahare mai oroḡare ḡumava! Eduge iauka iai ḡoḡohu ḡahiḡa vara. ⁴³ Riaḡa, vaniv a ai roḡare, ai enana ḡahatuhe iabemu ai ḡamiḡa ḡumava kiege a oriḡare, aka beta hakiha vara. ⁴⁴ Iaukamu ai ḡamuhe ruḡa ia ḡahigei hoekigei, mati iauka beta muni be tage ḡareḡa vara; badiva iaka Dirava deiva viare vaniva iaka uhiamia veite. ⁴⁵ Gerege auki dubu sirivare auki koitaia hae kiege ḡaheva oiagei hakivege. ⁴⁶ Renu roege, “Iaukamu ro maemanu, ‘Di iagera imimi iaga vara’; eduge iakaki mi vaho ḡahe iau guragu iage kia.” ⁴⁷ Auka vani inuhati ge auki dubu oti badi maḡe koita bauge iau roege. Dubu biavaia, aena ḡaheia, renu oḡo koita baugea iau bouge au ḡamiḡa ḡumava iaḡova; ⁴⁸ eduge iauka ḡumava be behube veite, edube koita iabera daḡe raḡi au badi maḡeve ihisa.