¹  Iesu raki au ḡamituhe boriti ḡahigei ronu, “Me ona raḡirave iauge daure iaḡa ḡainage ororo vara, eduge oḡoreana ḡuma o mi oroḡa uhudauanu ianu! ²  Au maḡeve ramu iauna so muni raho be mi ai enokehe raroare miare eve kiravisa gerege ḡuma onakikive beta momono daure ḡahigeisa. ³  Eige ama uhuiamisa! Ḡami bena daure kima, ama daure kine namiḡisa, renu au daure kine ḡaremege, ama maḡe ḡahisa. ⁴  Renu koita kobuḡa ena vani bei nega iatiriḡava ai ḡasina daure goiege, renu nega iatiriḡava ḡoiraḡi ai rosa, dakamu di daureve ḡaremanu, ama da vaḡahu ḡahisa.” ⁵  Apostolo iabaki Rohi Bauge kironu, “Ni ihihive raho ḡaha!” ⁶  Rohi Bauge raki gavi ronu, “Ai ihihive na idi tahaka kusinaike naḡatenu, aka riaḡahe idi ketake okiroro vara, Ai umuke rakavare renu oti eve kobo raḡa, auka ai gare ihihi vara. ⁷ "Iai vaḡa unuhuna au me ḡamite negubutu ḡeḡe seni me mi kosai se mamoe ni tabata ḡahigei ḡoiraḡi oḡo oroḡi ana kiroro vanu, Negubutu oi oroḡi daḡore gurami tamutava? ⁸  Se ana beta kirosa, Oti ai ogona maḡeve bodivare, roḡi di demake kiege dama tamuta visa; ihie gena ana tamuta visa? ⁹  Ana ai ḡamite maḡe ḡahiḡa vanu au a rogevene meva kine dainehe? ¹⁰  Eige a tage, au aki rone meva inuhati gena ana kinu, ama rosa, Noka beta me ḡahe maḡeva iabaki; noka no kiro gevare mevaḡu ge noki kia! ” ¹¹  Iesu au gamituhe ruga iau ioave Ierusalema otisa, auki Samaria mati Galileia iau origige iauki otinu. ¹²  Auka oḡo bei sirivege, lepera koita utube raki behuḡanu. Iauki ḡamanahu ge iauki rahanu, ¹³  iauki to raḡi, roege, “Iesu, ni Biage, no vaḡahu ḡahigeve!” ¹⁴  Iesu raki erage vare, auki kiro gevenu, “Otiahe dubu ḡahe iau ḡaḡae ḡahiahe iau ia erageve.” Iauki oḡi otege uhura, iauki maḡe ḡahanu. ¹⁵  Gerege be raki, au ahatane eraḡi auka maḡe ḡoinu, auki ḡoiraḡi otime, auki heḡirita to Dirava motea ḡahege. ¹⁶  Auki oti Iesu vasi ḡaika ḡorumare auki maḡe ḡahi mati aukamu Samaria koita vara. ¹⁷  Gerege Iesu raki berabe vanu, “Iakamu iai ate ramu utube raki maḡe ḡahanu? Eduge ame negu sokovaia igaḡu-veite, iauna oreigenu? ¹⁸  Esemena iau bea ḡoiraḡohi oroḡare Dirava motea ḡahiḡa veite edube koita nune o avaḡu oroganu? ¹⁹  Gerege Iesu raki kironu, “Urimi ramare renu iaga ote; ai ihihive ramu a maḡe ḡahanu.” ²⁰  Vani beige Faresia beraki Iesu beraḡi vaisu gena Dirava basileiave oroḡisa vima, gerege auki ronu, “Dirava basileia vera beta ororo vara edube iai vaḡotoni iana eraḡisa; ²¹  se iauka beta roro vara, Eraḡa, aukamu onu! se Au virena! Eduge, riaḡa, Dirava basileiave ramu iai vaḡotoni.” ²²  Gerege auki au ḡamituhe gaḡa gevege, "Vani be oroḡare iaka roro vara iana so Koita Ḡamika eraḡare, eduge iaka beta erara vara. ²³  Iauka onaki aki roro vara, Virei ni ḡaha! se Ohe ni ḡaha! Ia negu otime, ia negu iau itahe oḡime. ²⁴  Eige va gibaru viare au abagera va hakirahe oti hakirahe, e naḡate Koita Ḡamika tage enakime au abagena ḡaḡae ḡoisa. ²⁵  Eduge auka so uriḡoi huhu naḡina vara renu negu tau o ḡahava iabera besibe ḡahiḡa vara. ²⁶  Erehuta Noa negahe naḡatera, eige Koita Ḡamika tage au negavehe auka enkikive ḡoiḡo vara. ²⁷  Iauka tamuta raḡi eia iege, mati mobo kiere renu au mabare kine riaḡahi, ate Noa vani ei iaḡatoi sirivanu, eia abatava oroḡi inuhati hoeki gevenu. ²⁸  E naḡate eramu orogi Lota negahe tage ena kikivera: iauka tamatu raḡi eia iege, hae kiege se haevege, beḡi beḡi raḡege renu iaga ḡo gevege, ²⁹  eduge Lota vani ei Sodoma ḡaremege, vene hedokate veni naḡate vava seni uguhi koita inuhati hoeki gevenu ³⁰  —aukamu enki kikive ḡoiḡo vara Koita Ḡamika ḡaḡae ḡoiare vanihe. ³¹  Vani e miege, koita be iaga ḡurida uiare beta uguhi iaga uhura au kohue ididivara; renu e naḡate ramu koita be ḡeḡe me miare beta ḡoiraḡira vara. ³²  Lota mabare iama anaisa. ³³  Iana oḡoreana iai maḡurive kamua iaka dauda vara, eduge unuhuna di dainehe iai maḡurive dauḡa iaka maḡuri raḡira vara. ³⁴  Iakera daki ia kirogeima, vahi eigera ata abu gera geda kobabeige iauna iaḡohisa, bera aneru iabera misa bera iauka ḡarehisa. ^{35- 36}  Maḡi abu ḡainage koni iauki tutuḡege; bera iauka misa bera ḡarehisa." Ata abu ḡainage ḡeḡe me miare; bera iauka misa mati bera ḡarehisa." ³⁷  Gerege iauki Iesu beraḡanu, “Rohi Bauge, oreigenu? Auki kiro gevenu, “Oreigena ahata makava iaḡima, eigera gaioka iabera bouraḡira vara.”