¹  Gerege Iesu raki au ḡamituhe kiro gevenu, “Ada bubu ata be raki au kohue ni tabata ḡahiḡa rome auki biava be manu, edube koita iabeki oroḡi boriti ḡahege au koita mane eramu au kohue auki rokoro ḡahima. ²  Gerege auki ihiromare kironu, Ona otavado da koitaia iau ihima? Ama ai meve kine bukava maemane mi da moimisa, badiva aka beta negahie di kohuve ni tabata ḡahi ḡoiraḡira vara. ³  Gerege ni tabata koitava raki auvaḡu au uhurehe berabe vi, Dana negu otavado kiki vanu, di biage ramu di meve mi ḡoiraḡima? Daka hero veite aba be rohisa, renu dakamu imimi variva vima. ⁴  Dakamu anai dana otavado kisa, di biage di mevehe da ariḡege, koita iana di ḡahara raḡi iau iagehe. ⁵  Auki au biage kohue idigevene ḡahava koba koba ihirogei, auki koita ganai beraḡanu, Ana di biage kohue idiḡane damunava esebugenu? ⁶  Auki kironu, Daka oliva oila maḡima iaḡaniva tinahu bera, Auki kironu, Damunava one, guramare renu vaina utu-adakasiva maema. ⁷  Auki mati abu ḡahiḡava beraḡanu, Ama aie damunava esebugena? Auki kironu, Daka demaka puse ketake tinuhu bera. Auki kironu, Aie damunava one miare mi utu-abuḡu veite maema. ⁸  Eige au biage raki au avaunaḡe motea ḡahi badiva au tarata ḡumaḡe dainehe; renu negu tau o momona iabera avaunaḡe meva ge iauna maḡuri raḡisa, edube beta momona Dirava abage uhura maḡuri raḡare iabera. ⁹  Renu Iesu raki gavi oti ronu, eige daki roma, ahata maka iaḡaniva ruḡa vasi kiahe, au kosavege, iauka maḡuri behi behive oḡova a ihiromiro vara. ¹⁰ “Unuhuna iaḡa avie riaḡa ḡahima auka iaḡa raho riaḡa ḡahiḡa vara; renu unuhuna iaḡa avieva avaunage vima auka iaḡa raho. ¹¹  Gerege aka beta ahata maka iaḡaniva riaḡahe nitabata ḡahisa, ana unuhuna a riaḡa ḡahisa aka iaḡa dadaḡa ni tabata ḡahisa? ¹²  Renu aka koita be kohue reḡunaki ni tabata ḡahiḡa veitenu, ana orenaki iauna aie a moimisa? ¹³  Besu besu koita bera beta bia abu iau meve kiki vara, bera auka besibe ḡahisa mati bera auka maḡe ḡahisa. Aka beta Dirava meve mati ata maka meva abu ruḡa kiki vara.” ¹⁴  Faresia ḡahava iabera ahata maka kohua iauki ḡaharava raḡa, eige iauki Iesu gavane ihare, iauki ho ḡahi namiḡege. ¹⁵  Gerege Iesu raki kiro gevenu, “Ia iavaḡu gera koita iabera ia eragei iai maḡeve rosa; eduge Dirava ramu iai soruke eraḡima; eige koitaia eraḡi iaḡa maḡe vanu Dirava vaḡotoni gera beta maḡera. ¹⁶  Eige aena renu peroveta iau bukava maemane era iamu me ḡahi ate Ioane Babatiso negahe; eigera Dirava basileia hari maḡeva iauki roege, renu koita inuhati ge iauki hero ḡahigei iauki oroḡisa. ¹⁷  Eige va mati vata ora dauraḡohisa, edube orenki aena ḡamika ora veite ḡoisa. ¹⁸  Eige bena au mabare besibe ḡahima mati maḡi ḡaita mima auka ni muduka auki kinu, mati unuhuna au moborena ḡaremane maḡiva mima auka ni muduka auki kinu. ¹⁹  Ada bubu ata bera vani inuhati ge auki ogona damu rahote kima mati demaka maḡe iare eige auki maḡuri maḡeva guramege. ²⁰  Renu au iaga uduanehe gera atabe ihiva Lasaro raki ei guramege, au ahatane uhuḡati gera kuhiku tobo ḡahanu, ²¹  auki anana viege auna so au ḡubuve aviḡahi ada bubu ata e tamuta viare demaka momonova desuraḡare mi iare; auka anana veite totokaia au kuhive teraḡare. ²²  Negu ata goroa eraki hoḡe ragege aneru iabeki mi agohi otinu Aberahamo ḡasina. Negu ada bubu ata etage raki hoḡe raḡage iauki mi oti abatemenu. ²³  Auka hoḡe oḡova uhura auki huhunaḡi ḡanaḡa viege, renu auki ni baovi ni ḡahege Aberahamo eraḡi ḡamanahu Lasaro ra au ḡaika. ²⁴  Auki toege, Aberahamo di mame, da vaḡahu ḡaha, renu Lasaro besuḡa au oroḡi au ade mi eiava taḡoare di meine degide ḡahe; daka vene hedoka uhurage daki huhu naḡima. ²⁵  Eduge Aberahamo raki kironu, Di moe, ana anavima akamu ai maḡurihe iaḡa maḡe dadaḡava aki idi gevege, edube Lasaro maḡurihe auka iaḡa maḡe be mimi veitera, eige auki negubutu oi maḡeva mima, mati aka huhu naḡima. ²⁶  Renu beta eḡu gera, a mati no ni nomuakehe geramu kekera ketakera, gerege oḡoreana oi urihi hakirahe ai ḡasina otisa roia beta riaḡa kiki vara, mati bera beta ei urimi ni hakirehe oroḡisa. ²⁷  Auki ronu, Gerege, mama, akera daki a imiḡima so besuḡa au so di mame iagehe ote. ²⁸  daka di nanuhe iabera adakasiva gera, auma so oti vasiba ḡahigeisa, iau negu oḡo oi oroḡi huhu naḡohime. ²⁹ Aberahamo raki kironu, Iauka Mose mati peroveta ḡaha iaberamu enu, iaukamu iau gare ihisa. ³⁰ Auki ronu, Veitera, di mame Aberahamo; eduge koita be hoḡe uhura iau ḡaḡae ḡoiege, iauma iau ḡuma daureve ḡaregeisa. ³¹  Aberahamo raki kironu, Gerege iau negu Mose mati peroveta ḡaha iau gare ihihi veite ḡahege, iauka koita be hoḡe uhura maḡuri viare tage beta au gare ihihi vara."