¹  Vani beige tax idiḡare ḡahavaia mati ḡaru ḡaha ruḡage iauki Iesu gare ihisa rome iauki kahika ḡahi au ḡasina otege. ²  Gerege Faresia ḡaha mati aena ḡaha iabeki namina raḡi roege, “Koita oramu daure ḡaha ihirogei iau ruḡa tamuta vara.” ³  Gerege auki badigomu be boriti ḡahi gevenu: ⁴  "Iana bena, mamoe tinahu bera auki nitabata ḡahima, edube kobabe raki dauraḡanu, gerege auna beta utu-igaḡu hakira igaḡu ena ḡare gevare auna kobabe dauraḡane iaḡoisa ate auna behuḡisa. ⁵  Auki behuḡare, heḡirita mi iagemi au bagunehe maemare mi ogo otito vara. ⁶  Auki oḡo hakivi, au vasiruhe mati au oḡo nanuhe ihirogei kiro gevege, Oroḡi da ruta no heḡiri raḡa, badiva dakamu di mamoeve dauraḡane behuḡanu. ⁷  Eige, daki a boriti ḡahima, iaukamu vava heḡiri raḡa badiva koita kobabe au daureve ḡaremi eduge negu utu-igaḡu hakira igaḡu iau ananave iauka maḡe iabeki eige iauka beta iau ḡuma daureve ḡaregeisa. ⁸  “Se maḡi bena au muni tahakave na utubenu, erehuta koita be vani be me miare damunava, gerege auki kobabe dauḡanu, auna beta lamepa miare abaḡahe, iaga uhura didivare, negu muni tahaka e iaḡoi ateme auna behuḡisa? ⁹  Auna behuḡanu, aukamu au vasiruhe mati au oḡo nanuhe ihirogei kirogei gevara, Oroḡi da ruta no heḡiri raḡa, badiva dakamu di muni tahaka be dauraḡane behuḡanu. ¹⁰  Ḡuma kobuga eige, daki aki roma, vava gera Dirava aneruve iabe ramu heḡiri raḡa badiva koita be au ḡuma daureve ḡaremane dainehe." ¹¹  Gerege Iesu raki ronu, “Ata bera au ḡamuhe iabera ḡami mo abu gera, ¹²  Ḡami avieva raki au mama kironu, “Mama, a di ḡahune rone emi da moima. Gerege iau mame raki au kohue abu ruḡa iau vaḡa kasa gevenu. ¹³  Vani rorebe itahe, ḡami avie raki au kohuve idigei bougevare auki au ioave mata ḡamana bei otinu. Eige auki au ahata maka maḡuriva ḡuramime auki au kohue rokoro ḡahi kosavanu. ¹⁴  Auki au kohue inuhati rokoro ḡahi kosa vege, ḡamana veite mata e inuhati doe raki manu, gerege auki ḡubu raḡi iahe iahe iaḡovege. ¹⁵  Gerege auki otime auki mata e koitava bei me iaḡoi, auki besuḡanu auka oti au ohe ni tabata ḡahigeisa. ¹⁶  Auki heḡirita oti badiva auka oho iare damakava iare au dera bubu vara; renu bera iaḡa be moimo veitera. ¹⁷  Eduge au uhure raki bao raḡi gerege auki avaḡu anai ronu, Di mame ramu au ḡasina me miare ḡahava iabera damu miare renu iau ade ra ḡere ḡereve, edube daka oi gurami ḡubu raḡima! ¹⁸  Daka urimare di mame ḡasina otisa, renu dana kirosa, Mama, dakamu ḡuma daure kinu ai mati Dirava ai iai vaḡotoni; ¹⁹  daka ai vaḡotoni maḡe veite ana da mi ai moe rosa; eige ama da mi ai me miare koitava be naḡate kisa." ²⁰  Gerege auki urimare au mame iaḡoi otinu. Edube auka ḡamanahu oroḡege uhura, au mame raki ni ḡahi eraḡare au soruke raki hosa raḡanu. Auki rurui oti au moe hodohare auki mi anoḡanu. ²¹  Gerege au moe raki kironu, Mama, dakamu ḡuma daure kinu ai renu Dirava ai iai vaḡotoni; daka ḡereḡere veite a da mi ai moe rosa. Da mi ai me koita be kisa. ²²  Eduge au mame raki au me ḡahatuhe kiro gevenu, Vaina, ogona maḡe be mi oroḡi mi au kiare, renu ada iaga be mi au adehe maemisa renu vasi iaga be tage au kisa. ²³  Renu oti mamoe ḡamika maḡe be mi ḡamare, noma iare heḡiri raḡisa; ²⁴  badiva di moe ramu hoḡe raḡare edube auki maḡuri vi ḡoiraḡanu; aukamu dau raḡanu edube damu behuḡanu! Eige noma heḡiri raḡisa. ²⁵  “Au moe baugeva auka mamoe ni tabata ḡahi gevege auki ḡoiraḡi iaga otege; au oḡi iaga kahika ḡahi otege uhura, auki koitaia gure noḡo raḡohi renu iavea raḡi heḡiri raḡohege enoḡava ihinu. ²⁶  Auki iau ḡamite be ihiromi beraḡanu, virena otavadoana iau kia. ²⁷  Auki kironu, Ai ḡoḡe raki oroḡonu, eige ai mame raki roege iauki mamoe ḡamika be ḡamege iauki heḡiri raḡa, badiva auki ḡoiraḡanu maḡurive mati maḡe. ²⁸  Gerege au moe baugeva raki hoḡoi renu iagahu ḡadiḡa besibe vanu. Au mame raki itahe hakivare auki imiḡege auka iagahu sirivisa. ²⁹  Eduge auki au mame kironu, Eraḡa! Tau dadaḡava daki ai meve kiege erehuta koita nune naḡate, renu daka ai gare dodo veite; edube aka vani bei so roro veite mamoe ḡamika be ḡami au vasiruhe ruḡa heḡiri raḡisa. ³⁰  Edube ai moe ora ai kohu hakirava mi oti ni muduka maḡuriva iogei kosavare auki ḡoiraḡanu, aka auni mamoe ḡamika be ḡamanu! ³¹  Gerege au mame raki kironu, Di moe, aka vani inuhati da ruta gera, renu di kohue inuhati ḡainage aiera. ³²  Eige noka heḡiri raḡohisa, badiva ai ḡoḡe ramu hoḡe raḡaranu edube auki maḡuri vanu; aukamu dauraḡanu edube nokamu behuḡanu."