¹ Iesu raki Galileia gohu hakirahe otinu ihiva iauki roia Tiberia gohu. ² Koita dadaḡava raki au itahe otege, badiva iauki eraḡege auki me ketake kiogei dika ḡahe maḡe ḡahi gevege. ³ Iesu raki au ḡamituhe ruḡa nimu ḡadihime iauki gurahanu. ⁴ Nega oige Iudea ḡaha iau Rigi bauge vaniva tage hugure. ⁵ Iesu raki aniḡoi niḡahege koita dadaḡava raki gure beiami oroḡege, gerege auki Filipo beraḡi ronu, “Nona negu orei demaka haevi koita o inuhati vasi geige vanu?” ⁶ Iesu raki onaki rone auka Filipo auki tohoḡima, badiva riaḡa vara Filipo ra dibana auna otavado kiki vanu au so Filipo berabe veite. ⁷ Filipo raki ronu, “‘Bata agorokiva’ damua tage ramu ḡereḡere veite nona mi demaka haevege iauna tina tina idiḡisa.” ⁸ Au ḡamite bera, Simona Petero ḡoḡe, Anderea raki Iesu kironu, ⁹ “Ḡami avie be oigera au ḡasina gera parao ada kasiva mati karava momona abu tagera. Eduge ena otado be riaḡahe kiki vanu koita dadaḡa o inuhati iahe geige vanu?” ¹⁰ Iesu raki ronu, “Koita kirogeve iau bouge gurahe.” Iauki iau bouge isu ada gurahi, iau ate eramu erehuta daha adakasiva naḡatera. ¹¹ Gerege Iesu raki parao idigevare, auki Dirava au maḡe ḡahi gevare, auki idigei koita gurahane mohi gevenu; karava tage enaki kiege, iauki tamuta raḡi iau uhure geregere ḡahanu. ¹² Koita iau uhure ḡereḡere viege, Iesu raki au ḡamituhe kiro gevenu, “Demaka momona inuhati bouge vare, ia negu be daure ḡahime.” ¹³ Gerege iauki koitaia tamuta raḡi demaka momonava inuhati bougei idigei boteka utube hakira abu toboḡa gevenu. ¹⁴ Koita iaberaki Iesu kine meva eraḡare, iauki ga raḡi roege, “Oramu iau peroveta koita be rone eraki o vata ada o oroḡonu.” ¹⁵ Iesu raki dibana ḡoinu iauka orogi mi oti iau oḡo rohiveni kiki vara, gerege auki ḡaitana avaḡu ia vaḡotoni urimi nimu kasihe otinu. ¹⁶ Va hiriḡomege, Iesu raki au ḡamituhe ruḡa uguraḡi gohu otinu, ¹⁷ iauki vanaḡiva bei gui raḡare iauki Kaperanamu gohu hakirahe otinu. Va vadibu ḡoine uhura Iesu ra so iau ḡasina roḡiro veite. ¹⁸ Gerege eve raki vaḡava viege badiva nono raho tinabe raki ḡuguige, ¹⁹ Au ḡamituhe iabera vanaḡi barai ḡamanava erehuta abigaḡa se ababu naḡate, iauki niḡahi Iesu eraḡanu. Iesu raki eve ada oḡi oroḡoge vanaḡi kahika ḡahege. Eige iauki siḡo raḡanu. ²⁰ Eduge Iesu raki kiro gevenu, “Ora dakaki; ia negu siḡo raḡime.” ²¹ Gerege iauki heḡirita mi vanaḡiva auki gui vare, renu ḡamana veite iauki iau otare gabuhe haki raḡanu. ²² Va tahege koitaia gohu hakirahe gurahane iaberaki vanaḡi kobabe eraḡanu. Renu iauka eraḡege Iesu ra vanaḡi ei au ḡamituhe ruḡa guigu veitera, eduge auka iavaḡu ge iauki otinu. ²³ Gerege vanaḡi rore beḡu Tiberia seni oroḡi iauki Rohi Bauge demaka maḡe ḡahi koitaia tamuta raḡane gabuhe hakiraḡi. ²⁴ Gerege iauki koita inuhati era gevege Iesu mati au ḡamituhe iabera ei veite, eige iauki urihi vanaḡi rore bei gui raḡi iauki Iesu beiami Kaperanamu otinu. Iesu ra maḡuri demaka vara ²⁵ Iauki gohu hakirahe behuḡare iauki beraḡanu, “Ni Biage, ana vaisu gena a oi oroḡonu?” ²⁶ Iesu raki kiro gevenu, “Riaḡa vara daki ia boriti ḡahigeima, iana demaka maḡe iare geregere raḡane dainehe gena ia da iaḡoa. ²⁷ Ia negu demaka a daure ḡahare meva kime, eduge demaka maḡe maḡuri behi-behive meva eḡu iana kisa, era Koita Ḡamika vana a moimisa. Badiva Dirava au Mame raki hedoka ḡahare renu aena ḡahanu.” ²⁸ Gerege iauki kironu, “Nona otavado kiare ena negu no Dirava meve au ḡahara viare me vanu?” ²⁹ Iesu raki kiro gevenu, “Oramu Dirava ḡahara viare me vara, iaka au besuḡane koitava riaḡa ḡahisa.” ³⁰ Gerege iauki kironu, “Ana ḡuma orei no ḡaḡiro geige vanu, gerege nona eraḡare a riaḡa ḡahiḡa vanu? Ana negu otavado meva kiki vanu? ³¹ Ni tene tuhe iaberamu demaka mana rone iauki mata ḡaḡaeva iege; ga aenava ro maemane naḡate, ‘Auki va demaka mohi gevege iauki iege.’ ” ³² Gerege Iesu raki kiro gevenu, “Riaḡa vara, daki a boriti ḡahima, era beta Mose raki va demaka ia mohi gevenu, eduge eramu di Mame raki demaka riaḡa vava seni ia mohi gevenu. ³³ Badiva va demaka riaḡa Dirava seni vava oroḡane koitava ramu vata o ḡahava maḡuri mohi gevenu.” ³⁴ Iauki imiḡi ronu, “Rohi Bauge, ama demaka o nega inuhati no mohigeisa.” ³⁵ Iesu raki kiro gevenu, “Dakamu maḡuri demaka vara. Di ḡasina oroḡare ḡahava iabera beta ḡubu raḡohira vara, mati oḡore iana da riaḡa ḡaha, iauka beta eia hoḡe raḡira vara. ³⁶ Eduge dakamu ia boriti ḡahi gevenu iakamu da eraḡanu, eduge iaka da riaḡa ḡahiḡa veitera. ³⁷ Iaḡa inuhati di Mame da moimare auka di ḡasina ororo vara, renu unuhuna di ḡasina oroḡima daka beta ita betia ḡahiḡa vara; ³⁸ badiva da vava seni oroḡane beta davahu ḡahara viare kiki vara, eduge Dirava da besuḡane au roiare era dana kisa. ³⁹ Oramu Dirava da besuḡane daka kisa rone meva, renu au da moimane ḡahava inuhati daka beta ita betia ḡahigei gevara; eduge basu-basua dama iau bouge idigei maḡuri ḡahigeisa. ⁴⁰ Oramu riaḡa di Mame ḡahara vane meva ra, gerege oḡoreana au Moe eraḡare mati riaḡa ḡahare iabera maḡuri behi-behi misa; eige dana maḡuri mohigei oti basu-basua misa.” ⁴¹ Gerege Iudea koita iaberaki gure namina raḡege badiva auki ronu, “Daka vava seni oroḡane demaka vara.” ⁴² Iauki gure ga raḡi roege, “Oramu Iesu raki, Iosepa moera, noka au mame mati au neine iau dibanera. Orenaki ge au negubutu roma, ‘dakamu vava seni ge daki uguhanu’?” ⁴³ Eduge Iesu raki kirogevenu, “Ava madama ḡarehiahe. ⁴⁴ Koita bera beta di ḡasina ororo ate di Mame da besuḡane aukena nisiḡami oroḡisa; eige dana iagemi maḡuri moimisa ate basu-basu vaniva. ⁴⁵ Peroveta ḡahi maemane naḡate, ‘Eige Dirava na iau bouge uhuvaka mohigeisa.’ Unuhuna di Mame gare ihinu mati au hugoru mare ḡahava iabera di ḡasina oroḡisa. ⁴⁶ Koita bera di Mame erara veitera edube Dirava seni oroḡane; auki avaḡu ni Mame eraḡanu. ⁴⁷ Riaḡa vara, daki ia boriti ḡahigeima, unuhuna da riaḡa ḡahima auka maḡuri behi-behive mimi vara. ⁴⁸ Daka maguri demaka vara. ⁴⁹ Iai vahiruhe iaberamu mata ḡaḡaeva mana iege, eduge iaukamu hoḡe raḡohanu. ⁵⁰ Oramu demaka vava seni oroḡane era, eige unuhuna iarenu auka beta hoḡe raḡira vara. ⁵¹ Daka maḡuri demaka vara vava seni daki oroḡanu. Unuhuna demaka o iarenu auka maḡuri behi-behi mimi vara; renu da vata ada oi maḡuri demaka a moimare era di ahata makera.” ⁵² Gerege Iudea ḡaheva iaberaki iavaḡu iau vaḡa gure berebe raḡi roege, “Ata ona orenaki au ahata make mi no mohi gevege nona isa?” ⁵³ Gerege Iesu raki kiro gevenu, “Riaḡa vara daki roma, iana Koita Ḡamika ahata maka mati au taoke mimi veite ḡoiare, ai maḡuri vera ahakera. ⁵⁴ Iana oḡoreana ia di ahata make iare mati di taoke iare ḡahavaia iabera maḡuri behi-behi mimi vara, mati dana vani ihie uhura ge dana iage geisa; ⁵⁵ badiva di ahata make ramu demaka riaḡa mati di taoke ramu eia riaḡa vara. ⁵⁶ Oḡoreana di ahata make mati di taoke iare ḡahava iabera di uhurehe geraki, mati daka iau uhura ⁵⁷ Eige maḡuri behi-behi iau Mame raki da besuḡanu, renu da maḡuri viare ramu ni Mama au dainehe, gerege unuhuna di ahata make iare auka di dainehe maḡuri vivi vara. ⁵⁸ Gerege oramu vava seni oroḡane demaka vara, beta iai tene ki iare mati iaukamu hoḡe raḡohanu iaḡaniva naḡatera. Eduge unuhuna demaka o iare auka maḡuri behi-behi mimi vara. ⁵⁹ Iesu raki ga o ro gevege au Kaperanamu dubu uhura gavege uhura. ⁶⁰ Au ḡamituhe iaberaki au gare ihare iauki ronu, “Ga ora berebere ra, unuhuna negu ihare riaḡa ḡahiḡa vanu?” ⁶¹ Eduge Iesu be ra kiroro veite auka dibana au ḡamituhea gure au gare ava madama raḡohare. Gerege auki bera gevenu, “Ga ona iai uhure huhu ḡahigeima? ⁶² Gerege iana orenaki niḡahi Koita Ḡamika eraḡi auna vava ḡadimi ḡoiraḡi au oroḡane gabuhe? ⁶³ Ora horu raki maḡuri mohimohi vima; ahata maka vara herove ra iaḡa be veitera. Da iai ro gevene gava iabera horu mati maḡuri gava ra. ⁶⁴ Eduge iai vaḡotoni be iabera da riaḡa ḡahiḡa veitera.” Badiva Iesu ḡanai ge auki dibana ḡoinu oḡoreana iana riaḡa ḡahiḡa veite, renu unuhuna negu au bive kiki vanu. ⁶⁵ Iesu raki ronu, “Eige daki ia boriti ḡahi gevenu iaka beta di ḡasina ororo vara edube di Mame riaḡa omo iagemege iana di ḡasina oroḡisa.” ⁶⁶ Badiva Iesu onaki gavi rone dainehe au ḡamituhe iabaki ḡoiraḡohi au itahe otito netu raḡanu. ⁶⁷ Gerege Iesu raki au ḡamituhe utube hakira abu bera gevenu, “Ia ḡaitage - iana ḡeahu otisa ia ḡahara raḡa?” ⁶⁸ Simona Petero raki kironu, “Rohi Bauge, nona unuhu ḡasina otisa? Akamu maḡuri behi-behi gava ramu aigera. ⁶⁹ Nokamu riaḡa ḡaha mati dibana ḡahanu akamu Aena Koita, Dirava besuḡane era.” ⁷⁰ Iesu raki ronu, “Dakamu iai ate utube hakira abu daki ia idi gevenu, ani? Eduge ia be ramu diabolo vara.” ⁷¹ Auka Iuda, Simona Isakariota moe gare auki roege, au tage utube hakira abu iau ate bera, eduge auka Iesu bive kiki vara.