¹ Iesu raki Sabadi me manu  Gerege itaharahe Iesu raki Ierusalema otinu Iudea ḡaha iau rigi baugeve be dainehe. ² Ierusalema uhura Mamoe Udua ḡaika geramu, eagugu gabu adakasiva raki oriḡanu iauki Heberu gava ihiva roia Betesda. ³ Eagugu gabu ḡaika geramu dika ḡaha dadaḡava raki iaḡohi otinu, niḡa niḡa veite, oḡiḡi veite, ahataniva hoeke gahava iabera. ⁴ Iauka gohu eiava vaḡava vi ḡadimi era iauki uhuiama; Rohi Bauge aneruve nega koba koba uguhi oroḡi eia vaḡava ḡahiḡa vara. Unuhuna eia vaḡava ei uriḡoi turui uguhima au dikave raki maḡe ḡoiege. ⁵ Ata be ramu dikai gohu ḡaika ge auki uiege tau utu-abigaḡa hakira abuḡu-veite. ⁶ Iesu raki niḡahi ata be iaḡiaḡe eraḡi auki dibana ḡoinu auka nega ḡamana tinabe auki dika vanu, gerege auki kironu, “Ana maḡe ḡoisa a ḡahara vima?” ⁷ Negu dika ata eraki ronu, “Rohi Bauge, dana unuhuna eia vaḡava viare ei da mi otisa. Daka hero ki otare uhura, koita be ramu e subuta otinu.” ⁸ Iesu raki kironu, “Urima, ai gedake mare, oḡi.” ⁹ Ḡamana veite ata eraki maḡe ḡoinu, auki urimi au gedake miare auki oḡinu. Oramu vani aenava ge auki ḡuma o kinu. ¹⁰ Gerege Iudea ḡaha iaberaki negu ata maḡe ḡoine kironu, “Oramu vani aenava ra; aka beta vani aena oi ai gedake mi oḡiḡi vara.” ¹¹ Eduge auki kiro gevenu, “Da maḡe ḡahane koitava raki daki ronu, ‘Urima, ai gedake mare, oḡi.’ ” ¹² Iauki beraḡanu, “Ona koita orena aki onaki ronu, ‘ Ai gedake miare oḡi’?” ¹³ Eduge, negu ata maḡe ḡoine era dibana veite unuhuna maḡe ḡahanu. Koita dadaḡa eige Iesu raki iau vaḡotoni oḡi hakivanu. ¹⁴ Ihie ge Iesu raki dubu uhura eraḡi kironu, “Ana eraḡima, akamu maḡe ḡoinu! A negu mati ḡuma daure be ki ḡoiraḡime, badiva a negu isuka ketake mati mime.” ¹⁵ Negu ata eraki otime auki Iudea baugeva boriti ḡahi gevenu, negu ata eramu Iesu raki da maḡe ḡahanu.” ¹⁶ Eige Iudea ḡaha iabaki Iesu ho ḡahi namina raḡege, badiva auki ḡuma ona kikive kinu vani aenava. ¹⁷ Eduge Iesu raki kiro gevenu, “Di Mame ramu daḡe daḡe au meva kima, eige da tage me mimi vara.” ¹⁸ Ga o iau dainehe Iudea baugeva iaberaki Iesu ḡamiḡa ḡumava iaḡovege, badiva auka beta vani aena eḡu ge auki hosaḡanu, edube auka roma Dirava ra au Mame, mati avaḡu aumu Dirava ruta ḡereḡere ḡahima. ¹⁹ Eige Iudea ḡaha iabaki Iesu ho ḡahi namina raḡege, badiva auki ḡuma ona kikive kinu vani aenava. Eduge Iesu raki kiro gevenu, “Di Mame ramu daḡe daḡe au meva kima, eige da tage me mimi vara.” ²⁰ Ga o iau dainehe Iudea baugeva iaberaki Iesu ḡamiḡa ḡumava iaḡovege, badiva auka beta vani aena eḡu ge auki hosaḡanu, edube auka roma Dirava ra au Mame, mati avaḡu aumu Dirava ruta ḡereḡere ḡahima. ²¹ Dirava hoḡe koita iagemare mati maḡuri moimare naḡate, au Moe tage ramu au ḡahara viare koitava maḡuri moimo vara. ²² Dirava ra beta koita be seḡuse vara eduge hedo inuhati ge auki au Moe moimanu, ²³ eige iauma iau bouge au Moe riaḡa ḡahisa iau au Mame riaḡa ḡahare naḡate. Unuhuna au Moe besibe ḡahima badiva auka au Mame raki besuḡanu au tage iauki besibe ḡaha. ²⁴ Riaḡa vara daki ia boriti ḡahigeima, unuhuna di gare ihare mati Dirava riaḡa ḡahima badiva auki da besuḡanu koitava ramu maḡuri behi behive manu. Renu aena vara beta mimi vara, eduge hoḡe uhura ge auki maḡuri vanu. ²⁵ Riaḡa vara, daki ia boriti ḡahigeima, negava ramu oroḡima, mati aukamu hugure; eige hoḡe iana Dirava Moe enoḡe ihisa, mati ihare ḡahava iana urihi maḡuri misa. ²⁶ Gerege Dirava di Mame ramu maḡuri umuka vara, eige di Mame raki ḡuma kobuḡa ei hedo da moimi daka koita maḡuri moimisa; ²⁷ mati aukamu hedo moimanu auka aena me kiogeisa, badiva auka Koita Ḡamika dainehe. ²⁸ Ia negu da rosa roiare gava ihihi soru raka raḡime; badiva nega ramu oroḡima eige hoḡe ḡaha iau bouge ramu di enoḡe ihihi vara ²⁹ renu iauna hakiraḡisa, oḡore iana ḡuma maḡe kinu iabera urihi maḡuri misa, a oḡore iana ḡuma daure kinu iabera urihi iau daure damune misa. ³⁰ Daka beta me be davaḡu kiki vara. Da ihare era daki berabeva vima; renu da berabe viare ra Dirava daki roiare eḡu daki kima, badiva daka beta davaḡu di urave eḡu eduge da besuḡane au urave eḡu daki kima. ³¹ “Da davahu di gare vare, di gare ra beta riaḡa vara daki roma. ³² Eduge koita be raki di ihehe ga visa, renu daka dibana au roiare era riaḡa vara. ³³ Ai besubesu ḡahatuhe a besugei Ioane ḡasina, renu auka ga riaḡa vara auki roege. ³⁴ Daka beta koitaia di gare raḡare iauge daki ramima, eduge da rogevare gava iabera iaka maḡuri misa. ³⁵ Ioane abage ramu erehuta lamepa raḡare abagate ra, renu iaki nega tinabe au abaga uhura iaka heḡiri raḡege. ³⁶ Eduge di meve be ramu ketake beta Ioane aue naḡatera. Di Mame me da moimane era damu ki kosavanu, renu da gure me kiare oramu ia ḡaḡiromisa daka di Mame raki da besuḡanu. ³⁷ Renu di Mame da besuḡane tage ramu di gare vanu. Eduge iaka au enoḡe ihihi veitera se au nie tage iaka erara veitera, ³⁸ renu iaka au gare mi iai sorukehe maema veitera, badiva iaka au besuḡane koitava riaḡa ḡahiḡa veitera. ³⁹ “Iaka buka aenava ge iaki iaḡo iaḡo raḡa, badiva ia anavare e uhura ge iaka maḡuri behi behive misa; edube ga maemane gava ramu di gare raḡare riaḡa ḡahi dana unuhunu. ⁴⁰ Eduge iaka di gasina oroḡi maḡuri mimi ḡahara veitera. ⁴¹ Daka beta koita iau motea motea daki ḡahara vima. ⁴² Eduge daka dibana iaka iai sorukehe Dirava ḡahara veitera. ⁴³ Daka di Mame ihehe ge daki oroḡanu, eduge iaka da maḡe ḡahiḡa veitera; edube koita be avaḡu au ihehe oroḡare eramu iamu maḡe ḡaha. ⁴⁴ Iaka koita bea ia motea ḡahi gevare era iaki ḡahara raḡa, eige iana orenaki da riaḡa ḡahisa renu iaka bebe iau ḡahara veite, renu iaka au maḡeve oroḡare e erara veitenu, e ramu au kobuḡo (Dirava) au seni ge auki oroḡima ⁴⁵ Ia negu anai rome daka di Mame vaḡotoni iai daureve roro vara; edube ia uhuiamare koitava Mose, ia riaḡa ḡahege aukena ia iahe geisa. ⁴⁶ Eige iana Mose riaḡa ḡahanu, iakamu da riaḡa ḡahanu, badiva aukamu di gare ro maemanu. ⁴⁷ Eduge iana au maemane gava riaḡa ḡahiḡa veitenu, iana negu orenaki da roiare gava riaḡa ḡahisa?