¹ O itaharahe Iesu raki Iudea ḡaremi Galileia otinu. Auka Iudea guragu besibe viare badiva Iudea ḡaha iaberaki au ḡamiḡa ratava kiege dainehe. ² Iudea ḡaha iau Rigi bauge vaniva hugure eige iauki dubuka ḡamika ki au gurahisa. ³ Gerege au ḡoḡuhe iaberaki kironu, “Mata o ḡaremi Iudea ote eige ai ḡamituhe iaberamu a kiare meva tage eraḡisa: edube koita be ura veite au me kiare era ḡaḡae ḡoisa auka iorena ge auki kima. ⁴ Eige ana me riaḡa a kima, vata ketane ḡahava ḡaitage ramu eraḡisa.” ⁵ (Edube au ḡoḡuhe ḡaitage riaḡa ḡahiḡa veite.) ⁶ Iesu raki kirogevenu, “Di nega riaḡa vera so mimi veitera, eduge iai nega vera ia ruta vani inuhati gera. ⁷ Vata o ḡahava iabera beta ia besibe ḡahigeige vara, eduge dakera iauki besibe ḡaha badiva daki boriti ḡahigeima iau ḡumaḡe iabera beta maḡe iabera. ⁸ Urihi rigi heḡiri otiahe. Daka beta heḡiri ei otito vara, badivara di nega riaḡa vera so roḡiro veitera. ⁹ Au onaki rone itaharahe auka vani rorebe so Galileia guramanu. ¹⁰ Eduge au ḡoḡuhe inuhati rigi heḡiri otine itaharahe, gerege auki ihie iorena otinu koita iabera beta au toaḡe kisa mati dibana ḡahisa auna unuhunu. ¹¹ Iudea baugeva iaberaki rigi heḡiri uhura iaḡoi berabe raḡi roege, “Negu ata ena oreigenu?” ¹² Koita iaberaki heḡiri uhura au gare raḡi enana raḡege. Be iabera roege, “Iesu ra ata maḡe vara,” be iabera roege, “Veitera, auka koita iabera auki nisigei ḡuma nuneva otima.” ¹³ Eduge koita bera Iesu gare ḡaḡae roro veitera, badivara Iudea ḡaha iau siḡore iauki raḡege. ¹⁴ Iau rigi heḡiri raḡi ate vani tanahe ge Iesu raki dubu otime auki koita huguro ḡahi gevege. ¹⁵ Iudea ḡaha iaberaki ḡaḡu raḡohi au gare ihi, roege, “Ata ona orenaki ge au uhuvaka ona kikive manu, auka bera dahi-dahi uhuvaka au huguro ḡahiḡa veitera?” ¹⁶ Gerege Iesu raki kiro gevenu, “Da huguro viare ora beta davaḡu di gare ra, edube da besuḡane koitava gare ra. ¹⁷ Unuhuna au uhure inuhati Dirava ḡahare vare kiare auka dibana ḡoiḡo vara eramu Dirava au ḡasina ge auki oroḡima, se da davaḡu gena da ḡa vima. ¹⁸ Oḡoreana iavaḡu iau gare raḡare iabera iavaḡu maḡeve iauki iaḡova; eduge oḡoreana da besuḡane koitava maḡe ḡahisa badiva auka riaḡa vara, renu auka avaunaḡe bera augera veitera. ¹⁹ “Iana Mose na aena mi ia mohigeige veitenu? Edube ia be ramu beta aenava behima. Otavado dainehe ge ia gure di ḡamiḡa ḡumaḡe iaḡova?” ²⁰ Koita iaberaki ronu, “Akamu omo daureva ḡoime aki!. Unuhuna a ḡamiḡa roma?” ²¹ Iesu raki kiro gevenu, “Daka me kobuḡa beḡu kinu iaka iai bouge ḡaḡu raḡohanu. ²² Mose ramu dododo me mi ḡanai ia mohi gevenu (beta Mose au gera, edube iai iahuve iau gera), eige iamu vani aenava tage ḡami be vadake dododo meva kinu. ²³ Eigera ata be vani aenava au vadake dodovare ena beta Mose aenave hosaḡanu, eduge iana ḡuma orei gena ia da ata be vani aenava maḡe ḡahane hova raḡoha? ²⁴ Ia negu koita be au erara vaḡahe berabe raḡime, eduge ḡuma ieririva ge iana berabe raḡisa.” ²⁵ Koita iau berabe raḡi auna Keriso? Ierusalema koita be iaberaki roege, “Ona beta iau at be roiare iauka ḡami hoekisa enu? ²⁶ Eraḡiahe koitava vire ḡaḡae ga vare, eduge iauka iaḡa be au ḡasina roro veitera! Ona iau anavare auna riaḡa vanu Keriso? ²⁷ Ama noka bada dibana ata ona orehe seni ge au oroḡonu, edube Keriso negu oroḡare negahe, koita bera beta dibana ḡoiḡovara auna orehe seni ororo vanu.” ²⁸ Gerege Iesu raki dubu gavege uhura to barai ronu, “Iaka di dibanera, mati iaka da oroḡane matava dibana. Daka beta davaḡu ge daki oroḡanu. Da besuḡane koitava ramu riaḡa vara, renu iaka au dibane veitera. ²⁹ Daka au dibanera badiva dakamu au seni ge daki oroḡanu mati auki da besuḡanu.” ³⁰ Gerege koitaia eige iauka kamuisa, eduge iau ade bera au kauka veitera, badiva au negave rone era so mimi veitera. ³¹ Eduge iau uhura gera koita dadaḡava raki riaḡa ḡaha renu iauki roege, “Keriso oroḡare negahe, auna negu riaḡahe ata o me kiogevene soiḡi au variada dadaḡa kiogeige vanu? Aena ḡaha iabaki Iesu misa ³² Faresia ḡaha be iaberaki koita iau uhura ga ḡamika tahu Iesu gare raḡege ihinu, gerege dubu aena ḡaha iaberaki iau ḡamituhe besugei iauka oti Iesu misa. ³³ Gerege Iesu raki ronu, “Dakamu nega tinabe dana ia ruta guramisa, renu itaharahe dana ḡoiraḡi otisa da besuḡane koitava ḡasina. ³⁴ Iaka negu da iaḡoia vara, eduge iaka beta da behube vara; renu da otare oḡova iaka beta riaḡahe otito vara. ³⁵ Iudea ḡaha iaberaki bebe bera gevege, “Ata ona orei otito vanu eige au roma noka beta behube vara? Auna ni matame ḡaremi Iudea itahe koita nune ei gurahare iau uhura oti guramare mati uguro ḡahigeige vanu? ³⁶ Auna otavadoana au no boriti ḡahigeisa roma, ‘Iaka negu da iaḡoisa eduge iaka beta da behube vara’ mati ‘da otare matava iaka beta riaḡahe otito vara’?” ³⁷ Rigi vani bauge netu netua, Iesu ra ramirame auki to barai ronu, “Ana unuhuna eia hoḡe vima ama di ḡasina oroḡisa. ³⁸ Ana da riaḡa ḡahima, buka aenava ramu ronu, “Ana da riaḡa ḡahima, maḡuri eia eramu ai sorukehe tobo raḡi ḡutui hakiha vara. ³⁹ Iesu onaki rone ra Dirava Horuve auki gava vanu, oḡoreana riaḡa ḡahare iauka Horu mimi vara, edube negubutu gera so Horu veitera, badiva Dirava ra so au maḡeve Iesu moimo veitera. ⁴⁰ Koita iaberaki negu Iesu gare ihine negahe be iabeki ronu, “Oramu iau peroveta koita rone era.” ⁴¹ Be iaberaki ronu, “Oramu Keriso ra.” Edube be iaberaki berabe raḡi, “Gerege Keriso na Galileia seni ororo vanu? ⁴² Gerege buka aenava na roro veitenu Keriso ramu Betelehema seni auna oroḡisa, au tene Davida ḡuruane matahe.” ⁴³ Eige koita be ia besibe ḡahare iaberaki bebe kasa gevenu au dainehe. ⁴⁴ Be iaberaki ura raḡi misa, eduge bera kamuka veite. ⁴⁵ Gerege aena ḡaha iaberaki ḡoiraḡohi dubu biava iau ḡasina oti iauki bera gevenu, “Esemena ia kamui mi ororo veite?” ⁴⁶ Aena ḡaha iaberaki ronu, “Koita bera ata o gavare naḡate veitera!” ⁴⁷ Gerege Faresia ḡaha iaberaki kiro gevenu, “Ia ḡaitage na au ḡuma nuneva ia nisigei otinu? ⁴⁸ Gerege aena ḡahaia se Faresia ḡaha be iana Iesu riaḡa ḡahiḡa veitenu? ⁴⁹ Eduge koita o iaberamu, iauna Mose Aenave dibana veitenu, eige Dirava hore ramu iau ada gera.” ⁵⁰ Nikodemu tage ramu Faresia ḡaha iau uhura au tage iau ruḡa, iauki kiro gevenu, ⁵¹ “Ni Aenave uhura gera noka beta koita be daure damune roro vara, eduge noka uriḡahi au kiogevene gava ihare, ihiege nona au daure damune aenava moimisa.” ⁵² Iauki kironu, “A tage beta Galileia seni ge aki oroḡanu, ani? Ama buka Aena dahare mati anaisa peroveta koita be ramu beta Galileia seni oroḡanu.” ⁵³ Gerege iauki koba koba iau guragu oḡohe otinu,