¹ Iesu au ḡamituhe gaḡa gevene itaharahe, auki vava gagai niḡahare ronu, “Mama, vaniva ramu horivanu; ai maḡeve ai Moe ei ḡaḡae ḡaha gerege dama koita iau ai maḡeve ḡaḡae kisa, ² makavara akamu hedo moimanu auka koita inuhati iau biage ḡoisa, renu a koita moimane inuhati auka maḡuri behi behive mohigeisa. ³ Renu ora maḡuri behi behive era, eige iauma a anavisa, aki avaḡu Dirava riaḡa, renu aki Iesu Keriso besuḡanu. ⁴ Dakamu a maḡe ḡahi vata ada oi eige daki a me da moimane kiogei kosavanu. ⁵ Eige negubutu, Mama, da maḡe ḡaha ai maḡeve da ai uhura a mi da moimane mati mata o so horiho veite uhura gera. ⁶ “Dakamu ai ihe a koita da moimane vata ada oi iau ḡaḡae ronu. Iauka ai koitatuhe iabara, eduge aki idigei da moimanu, eige iaukamu ai gare kamuanu. ⁷ Eige negubutu iaukamu riaḡa ḡaha a iaḡa inuhati da moimane iabara ai seni ge iauki oroḡanu; ⁸ eige a da moimane gava dakamu mohi gevenu, renu iaukamu manu mati riaḡa gahanu daka aigera daki oroḡanu; mati iakamu riaḡa ḡahanu aki da besuḡanu. ⁹ Eige daki iau ihehe imimi vima; daka beta vata ada o ḡahava iau dainehe gera, eduge a da moimane ḡahava iau dainehe, badiva iauka ai koitatuhe iabara. ¹⁰ Di koitatuhe inuhati gera ai koitatuhe iabara, renu ai koitatuhe iabara di koitatuhe iabara; renu iaukamu di maḡeve iau uhura eraḡanu. ¹¹ Renu daka negubutu vata ada oi veite, eduge iaukamu o vata ada, eige daki ai ḡasina oroḡima. Di Mame, Aena Dirava, a da moimane idigei ai udume maḡe uhura gurahisa, gerege iauma kobuḡa ḡahisa, no ni abu kobabe naḡate. ¹² Da iau ruta uiege uhura, daki a da moimane ḡahava ai ihehe nitabata ḡahi gevege. Daki nitabata ḡahigei, bera dau raḡira veitera eduge ḡeahu otare koitava raki dau raḡisa, gerege ga aena maemanu riaḡa ḡahiḡa vara. ¹³ Eduge dakamu o ai gasina oroḡima, renu da iaḡa o gava vata ada roiare era iauka iau bouge iau sorukehe heḡiri raḡisa ḡuma kobuḡa ei da tage iau vaḡotoni heḡiri vima. ¹⁴ Dakamu ai gare mohi gevenu, renu vata ada o ḡahava iaberamu besibe ḡahi gevenu makava iauka beta vata ada o ḡahava iabara, renu da tage beta vata ada o koita vara. ¹⁵ Daka beta onakime daki roma aka vata ada oi besugei hakivisa, eduge akera daki a imiḡima aka eraḡisa koita daure iau siḡore. ¹⁶ Iauka beta vata ada o koitava iabara, ḡereḡereva daka beta vata ada o koita vara. ¹⁷ Ama idigei aena ḡahigeisa; ai gare ra riaḡa vara. ¹⁸ Aki vata ada oi da besuḡanu, eige daki vata ada oi besugeima. ¹⁹ Mati iau maḡeve dainehe daki davaḡu da aena ḡahanu, eige iau ḡainage aena riaḡa misa. ²⁰ “Daka beta koita o iavaḡu iau dainehe ge daki imimi vima, eduge oḡoreana da riaḡa ḡaha iau garehe ḡainage daki imimi vima, ²¹ gerege iauka iau bouge kobabe ḡahisa. Eige, Mama, aka di uhura renu daka ai uhura, renu iau ḡaitage so ni uhura ḡahisa, gerege vata ada o ḡahava iabaramu riaḡa ḡahisa akaki da besuḡanu. ²² A maḡe da moimane dakamu mohi gevenu, gerege iauka kobabe gahisa, noka ni abu kobabe nagate. ²³ Daka iau uhura renu aka di uhura, eige iauka iau bouge kobabe gahisa, gerege vata ada ora dibana ḡoisa akaki da besuḡanu renu dakamu iau ḡahara vanu a di ḡahara vane naḡate. ²⁴ Di Mame, da tage a da moimane iabara daki ḡahara vima iauka da ruta da uiare iau ḡaitage ei gurahisa, gerege iauka di maḡeve eraḡisa, aki mi da moimanu badivara aki di ḡahara vanu mata o so horiho veite uhura. ²⁵ “Di Mame aka maḡe Dirava, mata ora ai dibane veitera, eduge daka ai dibanera; renu o iabera dibana aki da besuḡanu. ²⁶ Dakamu ai ihe kiro gevenu ana unuhunu, renu dakena daḡe daḡe kiro geisa, gerege a da maḡe ḡahane maḡeva tage ramu iau uhura ḡoisa, renu da tage iau uhura ḡoisa.”