¹ Iesu imimi rone itaharahe, auki au gamituhe ruḡa Kidron kourava eigera ḡeḡe bera au gamituhe ruḡa siri ragohanu. ² Iuda, Iesu bive kine koitava au tage ḡeḡe e dibana, badiva Iesu au gamituhe ruta nega be ḡahisege ei oti bouraḡoha. ³ Gerege dubu aena biavaia renu Farisea ḡahava iabaraki iau ḡamituhe besugei, renu Roma iau ḡarara ḡahatuhe beḡu, iauki iau ni abaga lamepa mati vaiga ididita, Iuda raki uriḡatugei ḡeḡe ei otinu. ⁴ Gerege Iesu, subuta ge auki eraḡanu otavado vanu iau au kisa raḡa, auki oḡi hakivare oti bera gevenu, “Iana unuhuna ia iaḡoa?” ⁵ Iauki kironu, “Iesu, Nasareta koitava.” Auki kiro gevenu, “Dakamu Iesu ra.” Iuda au bive kine koita vara iau ruta rami rame. ⁶ Eige negu Iesu kirogei ronu, “Dakamu Iesu ra,” iauka vaḡava raḡi rahi ḡoiraḡohime iauki vata ada desuraḡi ragohanu. ⁷ Auki ḡaitana bera gevenu, “Iana unuhuna ia iaḡoa?” Iauki ronu, “Iesu Nasareta koitava.” ⁸ Iesu raki kirogevenu, “Dakamu ia kiro gevenu era dakaki. Eige iana dakena ia iaḡova, di itahe oroḡane ḡahavaia ḡaregeiahe iau ote.” ⁹ Ora au gavane riaḡa ḡahiḡa vara, “Daka a da moimane koitava be dauda veitera.” ¹⁰ Gerege Simona Petero raki au eḡie mi hakivare auki mi dubu aena biava iau besubesu ḡamite Malakas au vamaḡa ihikoke ahanu. ¹¹ Iesu raki Petero kironu, “Ai eḡie mi maemi ḡoiraḡa. A anavare dana beta di Mame rone ḡumahe beta huhunaḡina vanu?” ¹² Eige Roma iau ḡarara biage mati au ḡamituhe ruta mati dubu ḡaha iau ḡamituhe iabaki Iesu kamuare iauki adakava raro gevenu. ¹³ Iauki uriḡahi mi Anas gasina otinu, auka Kaiafas vare mo vara, auka tau ei dubu aena iau baugeve. ¹⁴ Kaiafas ramu nega ei Iuda ḡahava kiro gevenu au maḡeve ramu koita kobabe so ni bouge ni dainehe hoḡe raḡisa. ¹⁵ Simona Petero mati au bamode be ruta iauki Iesu itahe otinu. Negu au bamode era dubu aena baugeve dibanera, eige auki Iesu ruta otinu au iaga maḡu uhura siri raḡanu, ¹⁶ eduge Petero raki maḡu itaharahe ramirame. Negu au bamode ḡamiva, dubu aena bauge dibane, raki hakivi otime auki maḡu uduani ramare maḡiva ga ḡahare auki petero nisiḡami sirivanu. ¹⁷ Negu maḡi eraki Petero kironu, “Akamu ata vire ḡamite bera, se?” Auki kironu, “Veite, daka veitera.” ¹⁸ Negu dubu aena me ḡahavaia renu iau nitabata ḡahavaia iabaraki ribiri dainehe vene ki udumeva ḡaikahe rahi miege. Petero tage iau ruta vene udumehe ramanu. ¹⁹ Gerege dubu biava raki Iesu beraḡanu, Oḡoreana ai ḡamituhe renu otavado gava gena a uguro ḡahigeima. ²⁰ Iesu raki kironu, “Dakamu vata ada oi nega inuhati ge daki koita gaḡa gevege badiva iauka ihisa; dakamu nega dadaḡava daki dubu aenava se dubu ḡaika koita uguro ḡahi gevege, eige Iuda ḡahava iau bouge bouraḡoha. Daka ga be iorena roro veitera. ²¹ Esemena ia da beraḡa? Oḡoreana di gare ihine ḡahavaia bera geve; iauka dibana dana otado vana da ronu.” ²² Auka enaki ronu, iau ḡamite be ramirame raki Iesu nie madavanu, gure roege, “A enaki aena koita bauge ga ḡahara ena?” ²³ Iesu raki kironu, “Dana ga be rone riaḡa veitenu, iama gava rosa. Eduge dana ga riaḡa vanu da ronu, esemena iai ḡamite da madavanu?” ²⁴ Gerege Anas raki besuḡanu au ade daḡe daḡe raro geigeve Kaiafas dubu biava ḡasina. ²⁵ Edube Simona Petero ra rami au udume ḡahege. Iauki beraḡanu, “A tage ramu au ḡamite bera, se?” Auki tarata vime auki ronu, “Daka veitera.” ²⁶ Dubu aena iau gamite be ihikokova dodovane ogo nane raki berabe vanu, “Dana beta ḡeḡe uhura a eraḡanu au ruta?” ²⁷ Petero raki ḡaitana avaunaḡe vanu, ḡamana veite uguha raki nivinu. ²⁸ Gerege iauki vagutu vagutu Iesu mi Pilato ḡasina otinu. Iauka Pilato iaga uhura siri raḡira veite, badiva iauka aena raḡi iauka beta uhu daure ruta rigi ketake demaka kiare uhura oti tamuta raḡisa. ²⁹ Gerege Pilato raki hakivi iau ḡasina otare ronu, “Otavado daure bena ia roia ata ora kinu?” ³⁰ Iauki kironu, “Negu ata ona daure be kiki veitenu, noka beta onaki mi ai gasina oroḡisa.” ³¹ Pilato raki kiro gevenu, “Mi ḡoiraḡohi otare mati iai aenave ro maemane ḡumahe iavaḡu beraḡiahe.” Iuda ḡahava iabaraki ronu, “Noka hedoka veitera noka koita be mi hoḡe maemisa.” ³² (Oramu Iesu rone gava riaḡa ḡahiḡa vara auna orenaki hoḡe raḡira vanu.) ³³ Gerege Pilato raki gaitana iaga uhura sirivanu, auki Iesu ihiromare renu beraḡanu, “Ana Iuda ḡaha iau Rohivenu?” ³⁴ Iesu raki kironu, “Ona avaḡu gena berabe o vima, se be iana di badine aki kironu?” ³⁵ Pilato raki ronu, “Dana Iuda koita vanu, se veitenu? Ai koitatuhe renu ai dubu biava iabaki a mi di ḡasina oroḡonu. Ana otavado daure bena a kinu?” ³⁶ Iesu raki kirogevenu, “Di basileia vera beta vata ada ora. Di basileiave vata ada oi ḡoinube, di itahe oḡiare koitava iabera ia ruta ḡarahi se iauka beta da mi Iuda ḡahava mohi gevenu. Eduge veitera, di basileia vera beta vata ada oigera.” ³⁷ Pilato raki beraḡanu, “Eige akamu rohi ra? Iesu raki ronu, “Aki roma daka rohi. Eige da ḡuruane daka rohi, renu e dainehe daki vata ada oi oroḡonu, daka ga riaḡa rosa. Oḡoreana di enoḡe ihare riaḡa ḡaha iabara ga riaḡa iauki iha.” ³⁸ Pilato raki beraḡanu, “Gerege riaḡa vana otado vanu?” Pilato raki Iesu hoḡeve ronu Au enaki rone itaharahe, auki gaitana Iuda ḡaha iau otare auki boriti ḡahi gevenu, “Daka au daure be erara veitera. ³⁹ Eduge iai aenave bera daka koita be rigi ketake vaniva iani mi hakivisa. Iana onakime ia roia daka Iuda iau Rohive mi hakivisa?” ⁴⁰ Koita iabaraki bara raḡohi roege “Veitera beta aukaki, eduge Barabas!” Barabas ra vaho koita vara.