¹ “Dakamu ga o inuhati ia kiro gevenu makava ramu ia negu desuraḡime. ² Iaukamu dubu a besuḡi haki raḡira vara. Riaḡa vara, vaniva ramu oroḡima a ḡamane ḡahava iaberamu iau ananave iauka Dirava iauki maḡe ḡaha. ³  Koita iaberamu onaki kiki vara iauka anana veite di Mame se da nona unuhunu. ⁴  Eduge da ga o iaki ro gevare vaniva oroḡare iama anaisa dakamu iau ḡare ia boriti ḡahi gevenu. ⁵ Eduge dakamu da besuḡane koitava ḡasina otito vara; edube ia bera da berabe veite, Ana orei otito vanu? ⁶ Eduge dakamu ga o iaki ro gevene eige iai soruke ramu huhu naḡina vara. ⁷ Daḡe daḡe dakamu ga riaḡa vara daki roma; iai maḡeve dainehe daka otito vara, da negu otito veite ḡoiege, iahe iahe vara beta iai ororo vara; eduge da otege, dana besuḡisa iai gasina. ⁸ Renu au negu oroḡege, auka mata o koitava kiroro vara au daureve renu maguri riaḡa mati berabe vani: ⁹ daure tage, iauka da riaḡa gahiga veite dainehe; ¹⁰ maguri riaḡa gava, daka di Mame gasina otito dainehe iaka beta da erara vara; ¹¹ mati berabe vani, makavara Dirava ramu subuta mata o daureve ronu. ¹² “Daka daḡe daḡe iaga dadaḡa iaki roro vara, eduge iaka beta negubutu anana maḡeva raḡira vara. ¹³ Horu aena riaḡa oroḡare, auka a uriḡatuḡa ga riaḡa inuhati uhura; auka beta avaḡu gera, edube auka au ihare gava auna rosa, renu auka otavado ihie oroḡare iaḡaniva auka gava roro vara. ¹⁴ Auka da maḡe ḡahiḡa vara, makava auka otavado vanu daie auka miare renu auka ia boriti ḡahigei gevara. ¹⁵ Di Mame ḡasina iaḡaniva inuhati gera daiera. Eige daki roma, auka di ḡasina iaḡaniva idi gevare auna ia boriti ḡahigeisa. Vaḡahu raki ḡoiraḡi hegiri ḡoisa ¹⁶ “Nega tinabe ḡoiege, iaka beta da erara vara, edube ḡaitana nega tinabe ḡoiege iaka da erara vara.” ¹⁷ Gerege au ḡamituhe be iaberaki bebe bera gevege, “Au gare auki noki rogeima, Nega tinabe ḡoiege iaka beta da erara vara, renu nega tinabe ḡoiege iana ḡaitana da eraḡisa; mati otavado au roma, badivara daka so di Mame ḡasina otito vara?” ¹⁸ Iauki ronu, “Au gare nega tinabe maka vana otavado vanu? Noka au ga roiare makava dibana veitera auna otavado gavana au roma.” ¹⁹ Iesu raki era gevege iauka beraḡisa, eige auki bera gevenu, “Iana iai vaḡotoni da ga rone ia bebe berageva, Nega tinakibe iaka beta da erara vara, renu ḡaitana nega tinakibe iakamu da erara vara? ²⁰ Riaḡa vara, daki ia boriti ḡahi geima, iaka niḡo raḡohi renu uhu huhu raḡohisa, eduge mata o koitava iabera heḡiri raḡira vara; iaka huhu raḡisa, edube iai uhu huhuve ramu ḡoiraḡi hegiri vara ²¹ Maḡi be ḡami misa roiare auka huhu naḡina vara. Eduge au ḡami miare itaharahe, auka huhu e anana veitera edube auka au ḡami karuka be mane hegiri vara auna kisa. ²² Eige iaka neḡubutu huhu naḡoha; eduge daka gaitana ia era geige vara, renu iaka ia sorukehe heḡiri raḡira vara, renu koita bera beta ia heḡirive mimi vara. ²³ Vani e miare iaka beta iaḡa be dai roro vara. Riaḡa vara daki ia boriti ḡahi geima, iana iaḡa be di Mame ḡasina di ihehe imimiva raḡoha, auka mi ia mohigeige vara. ²⁴ Iaka so iaḡa be di ihehe imimi veite ate negubutu. Imimi viege auka mi a moimo vara, eige iai heḡirive ramu uhubaḡe ḡoiḡo vara. ²⁵ “Da iaḡa iai vaḡotoni ḡuma nune nuneva gava ro gevenu. Vaniva ramu o oroḡima daka mati beta ḡuma nune bei ia boriti ḡahigei gevara, eduge daka di Mame gare riaḡava ia kirogei gevara. ²⁶ Vani eigera iaka di ihehe imimi raḡira vara. Daka beta onakime daki roma daka iai ihehe di Mame imiḡisa; ²⁷ di Mame avaḡu tage ramu iai ḡahara vima, makava iakamu di ḡahara raḡanu renu iakamu da riaḡa ḡahanu daka di Mame au gera daki oroḡanu. ²⁸ Daka di Mame senige daki oroḡanu eige daki mata ada oi oroḡonu; ḡaitana, daka mata o ḡaremare mati ḡoiraḡi di Mame ḡasina otito vara.” ²⁹ Gerege au ḡamituhe iaberaki ronu, “Riaḡa, akamu negubutu aki ga riaḡa roma, beta ḡuma nune subuta roege nagate. ³⁰ Nokamu neḡubutu eraḡanu aka iaḡa inuhati biavara, renu bera beta mati a berabe vara; eige noki riaḡa gaha aka Dirava senige aki oroḡanu.” ³¹ Iesu raki kiro gevenu, “Iana negubutu riaḡa gaha? ³² Vaniva ramu o oroḡima, riaḡa vara aukamu o bina oroḡanu, iai bouge koba koba ḡahi iai iagehe ota, renu iamu da davaḡu da ḡareha. Eduge daka beta davaḡu gera makava ramu di Mame ramu da ruta gera. ³³ Dakamu o ia boriti ḡahi gevenu, eige iana di uhura genu iaka heḡiri riaḡa mimi vara. Vata ada oige aka huhu naḡina vara. Eduge heroḡu kisa; dakamu mata o hedokava mi vata maemanu!”