¹ “ Daka idi iaka riaḡa vara, renu di Mame ra idi iaka beḡibe koita vara. ² Auka idi adaka madika kiki veite inuhati auki dodo geima. Eduge idi adaka madika kiare auka reḡure vara gerege au madike ramu dadaḡa ḡoisa. ³ Da di gare ai ḡasina rone eraki subuta a maḡe ḡahanu. ⁴ Eige ana di uhura dai kamu-kamu venu dakamu ai uhura gera. Renu idi adaka bera beta avaḡu madika kiki vara eduge auma idi kamu-kamu ḡoisa, se a tagera veitera a dai kamu-kamu veite ḡoiare. ⁵ Daka idi iaka vara, iaka erehuta adaka vara. Iana oḡoreana di uhura mati daka iau uhura iabera madika kiki vara, eige da veite ḡoiare aka beta iaḡa be avaḡu kiki vara. ⁶ Ana unuhuna di uhura veitenu iauka erehuta idi adaka naḡate mi ḡeahu kirai auka mae raḡira vara; idi adaka enaki iabera idigei bougei vene uhura kiragei iauna raḡohisa. ⁷ Ana di uhurehe, renu di gare ai uhurehe, ama di Mame imiḡisa ana otavado iaḡa vana a gahara vima, auka mi a moimo vara ⁸ Oramu di Mame maḡe ḡahiḡa ḡuma vara, aka madika dadaḡa kiare, mati aka di ḡamite ḡoisa. ⁹ Di Mame di ḡahara vane naḡate, da tage daki ai ḡahara vanu; eige ama di maḡeve uhura guramisa. ¹⁰ Ana di aenave kamui geima, aka di maḡeve uhura gera, e naḡate dakamu di Mame aenave kamugei renu au maḡeve uhura daki guramanu. ¹¹ Dakamu iaḡa inuhati iai gava rogevenu gerege iaka da heḡiri vare iai uhura ḡoisa, renu iama iai uhure inuhati heḡiri raḡisa. ¹² Ora di ga baegevera, yama bebe mage gahigeisa, da ya mage gahigevare nagate. ¹³ Koita bera mage raho onakikive be veietra be veitera-Au magurive mi vata maemisa be yau dainehe. ¹⁴ Iaka di vasiruhe iabara ia di gare ihige. ¹⁵ Daka beta a mi di besu besu ḡahatuhe roro vara, badivara besu besu koita vara beta au biage kiare dibana ḡoiḡo vara; eduge daka roma iaka di vasiruhe iabara, badiva dakamu di Mame au ihine iaḡaniva inuhati ia vasiba ḡahi gevenu. ¹⁶ Beta aki da manu eduge daki a manu. Renu da a mane aka oti madika maḡe kisa, maka behi behive, eige ni Mame ra a moimo vara ana otavado a imimiva vima di ihehe. ¹⁷ Daka aena o iabera daki ia mohi geima eige iama bebe maḡe ḡahi geisa. ¹⁸ “Mata ona a daure ḡahima, iama anaisa dakera iauki uriḡahi daure ḡahanu ihiege iauki ia daure ḡahigeva. ¹⁹ Ana mata o koitava ḡoiege, mata oramu a mi aue ḡoiḡo vara. Badiva aka beta mata o iera, eduge daki mata o uhura a manu, eige mata o raki a daure ḡahima. ²⁰ Ama da aki rone gava anaisa, Besubesu koitava iabera beta iau biaguhe iau variada gera. Iauna da daure ḡahanu, iauka ia ḡainage ia daure ḡahigeige vara; iauna di gare ihi kamuege, iauka iai gare tage ihihi vara. ²¹ Eduge iauna iaga o inuhati iai kiogevare di ihehe, edube iauka anana veite dana unuhuna da besuḡanu. ²² Dana ororo veitenu renu gaḡa geige veitenu, gerege iauka beta daure kinu; eduge iauka beta roro vara iau kine era ḡuma daure vara. ²³ Unuhuna da daure ḡahima auka di Mame tage auki daure ḡahima. ²⁴ Iauna da iau vaḡotoni iaga be kiogevene koita bera kiki veite, iauka beta daure kiare. Eduge iaukamu eraḡanu renu iau da mati di Mame ruta no besibe ḡahi gevare. ²⁵ Ora ga o riaḡa ḡahiḡa vara iau aena gare maemane, Iauka da daure ḡahima maka veite. ²⁶ “Da di iahe iaheve oroḡoge aukena di gare riaḡa ḡahisa, auka di Mame seni dana besuḡisa auna oroḡisa. Horu aena di Mame seni oroḡare aukena koita iau di gare riaḡa ḡahi rosa. ²⁷ Ia ḡaitage di gare riaḡa ḡahiḡa vara makava ramu iaka ḡanai da ruta gera.