1
Vali vole nile IESU tiale tabu vole Genesaleti gonele lavilu kele lavisege ata moeagaea DILAVAu nona evilivelu lolu, loale volele nenie solilu isi IESUle kavoloige nenie solilu, IESU lavilivelu age.
2
Kateisege seava kualume kaoivale bouti abutiu lavisi ulu, isege biageabea abo kualume ugaba totoiva ige IESU ke ivelu.
3
Ige IESU ata vole Saimoni ke bouti adae tai lavisi laviai avoe bouti besuvage aike eu nioe lo, ige IESU bouti adae ugulumai ata haivelu.
4
Ata moeaaga ke haivelu, ige vesuge ataea tiatievelu isege IESU Saimoni lavia avoe ai bouti aike besuvage eu minae tai isege lai ugaba agisi ele katuve isi kualume moeaga agive.
5
Ige Saimoniu loui avoe loi Kosive, lo vavi kole e vaulogo kualumabe kava solilu isito a louge lole loi ugaba katui.
6
Kateai louito abo ugaba agisi ele katulu isege kuaume moeaga moeaga loi ugaba vale tige ugabaeabeu ililohoi ulu igeto ugabaebeu davu hovolivelu vekealu.
7
Ige ea bouti vole ke toiavege loi aboili kualume kavei bouti abuti kele agivaga bouti abuitita keu ililoholu vekealu.
8
Ige Saimoni Bitau seava moeaga moeaga ke ivei loi IESU vudile kome bokoai vata bisi IESU laviai avoe, KOSIVE, daa kaleite, dau atau toela.
9
Kateai louale keu kosealu Saimoni au kakoluvuiali kualume moeaga ke ivei tetehamalu.
10
Ige kakoluvuabe Diebedi voo abuti Diemisiu Dioniti abota tetehamalu ige IESU Saimoni lavia avoe vabualive, aa memila kualume agiva isito aule dalu aike ata agige.
11
Kateige abo bouti abuti ke agisi loi eu gonele otovei IESU lovai tievelu.
12
Vali voleo IESU ovoleo tige lebelasi vale ata keu loi au kome bokoai vatabisi tuholuai genuhamai IESU laviai avoe di KOSIVE au ale valivelu daa hoeaseavai.
13
Ige IESU au ada katui malaha kela holisi laviai avoe mana dale aa hoeaseavai, kateisege malaha keu tavale lebelasi keu ue solilu.
14
Ige IESU avolu isuta loui avoe, aike kole lavisi talive Dubu naliavale kela velevai amiga vai haivege abo ai vava ivai vadeu louge Mouseseu louale ke late vale vole vaitai vaiu DILAVA hoeaseava, ige ataea aa ivai koseai vavave ave duave. Isito daa vadeu ale ke koui ata haivelive.
15
IESU kateai loulu isito au ale nona ke ataea evige vesulu ige ata moeagaea avoe loi kotove evisi abo haluluvite keta agisi IESU vileo loevelu.
16
Isito vali moeaga IESUle vavita vau alava solisege aule kobelai talivelu atau ue solivale keveo guliguliagei.
17
Vali voleo IESU ata haivesege Balisese ata isi basuiabe dodavei haivevale ata kea Galileia vatae Diudia vatae isi Dielusalema oo kitae keve lolu. Loevealea keve uevei IESU DILAVAu vuvunele ata hoeaseaveva.
18
Isege ata volea malaha voleu ada keukate isi genave kea keukale ke umuvai kabaisi vai IESU vileo loevelu loige ata moeagage.
19
Vai ou tatae va daiai vai vale hanavage agadita IESU neni kele dobai loaleu IESU vavale agadita dobai nai ulu.
20
Ige IESU aveveabe ke ivage ea abo uvu vai IESU vilele vaeavage IESU malaha ke laviai avoe, dii kakolo daa ai toela keneni uliage vesulu.
21
Kateai lousege Diuia basu loui haivevale ata isi Balisese ata kea huhuai avoe olela koto koseale loulu, DILAVAu ivi vai toelatilu, atabeu ba vaveve toela ulialivelu bele isito DILAVA igalila ataea toela uliava.
22
Kateai lousege IESU huhuiabe ke ivai lavigei loui avoe, vadeuluga laa huhui toela kateale huhuiva.
23
IESU loui avoe, dale koto vadeu loui malaha ko laviai, au dale loui koseai ai toela daa vesuiavalu bela loui koseai kobelai ai ama lekoloai vai te.
24
Isito kalege dale hatitite ke hoeaseavai ige lale kele luleleige aveve toela ketaga vesuiavale keu vuvuneu daele ulu kateai louito malaha ke laviai avoe kobelai ai ama lekoloai vai ai oe tee.
25
Kateai lousege malaha keu solekale kobelai vudiabele au ama lekoloai vai au oe tilu, tai au oe DILAVA hoeaseavalu.
26
Ige ata bahataea ke ivai tetehamai vabuai DILAVA hoeaseavai loui avoe aveve volela lai ave ko ivalu.
27
IESU kateaito kalei tialeu takesi agivale malaha vole ivalu ivivela Livai keu takesi agivale ou uvue ugulumai usege IESU lavia loui avoe daa lovai lo.
28
Ige livai kobelai au hau kalevei IESU lovai avoti tilu.
29
Vali voleo Livai IESUlu lovi vole bosi alu isi toage kakoluvuiabea takesi agivale ke nenia loige, kakoluiabea moeagaea lolu aboili lovi ke ilivelu isi aboili lovi ievelu.
30
Ige Balisese ata isi Diuia basuale nona loui haivevale ata keta loi IESU mohoho kelai loui avoe vadeuluga la takesi agivale atau toela keali lovi iva.
31
Kateai louge IESU lavigei avoe medikoloea ba ata dua ke kaogei lolivelu bele isito ata hatitite kelau kaogei lolu, hoeaseavelivelu.
32
Iale dau loale kou atau dualai loie solilu isito atau toela kelai ga daa lolu.
33
IESU kateige basuale nona loui haivei oivale ke lavige avoe Dioni mohoho keale valini igaligali ke lovi ilivelu bele isito guliguli ulave ige Balisesele keta kelate ava, isito ai mohoho kea kate solilu.
34
Ige IESU lavigei avoe la huhuige voo voleu vaa vole meialemege kakoluvuia beale lovi isi, bela kalevai ba abole lovi isi sisilai.
35
Isito vali voleo atau toelaeale loi vo ke kavage kakoluvuiabeale avolu uvuai lovi i kalevai.
36
Kateaaito donau nona vole loui lavigelu loui lavigelu loui avoe atabeu ba ogona dogave ivi vai ogona mamiveta badimulivelu bele, aule kateige ogona mamive keule ogona dogave ke tavale sisiai toelai bukiai lavui.
37
Kelate atabeu ba uaini dogave vai ovou vate badimuale mamive kele lehosivalivelu bele aule kateigaule ovou vate mamive keule eai savai bukiage uaini eule lavui vesuai.
38
Isito atabeu uaini dogavai ovou vate dogave kele lehosivage au ba dikohovolivelu bele.
39
Isito atabeu vali bahata uaini mami ke iluaga aule uaini dogave kelu olasolisi isito eu huhuige uaini mami keu avoele koealu.