1
IESU Diodana ee kalei tige munana tuvute avoe ililohoi ui meialemei vai ataeau uesite keveo tilu.
2
Tiale keu keveo usege seteneu loale vali ni voti '40' keu uvule seleavai ivage IESU kele dobai o doadoai keu vali ke ni moeagale lovi iesolialelu vagala kitaea kitaealu.
3
Ige seteneu avolu loui avoe, aa Dilavau voo oliluaga vule ko laviage beledi olige iso.
4
Ige IESU laviai avoe bukau nonau loui avoe atabeu lovi ula isi ba kele meliai ulivelu bele.
5
Kateige seteneu solekata vai talae tialeu vata ko neni vai haivulu.
6
Isi loui avoe dale ata ko bahata vai amuge ale kele meli kitae ai ba hau moeaga agi Dilavau louge vata kou di vata hau ko nenia daelete, iale dale vai di olau ata vavuge aule agisi.
7
Iale ale ai kome bokoai vatabisi daa hoeaseavage dale ke bahata amui.
8
Ige IESU laviai avoe bukau kotou loui avoe ai kosive Dilava ke ula hoeaseavai olave ke ula aso.
9
Kateige setene IESU vai Dielusalemae lolu loi tai Diuia dubu kitae benola lavisege seteneu IESU laviai avoe aa Dilavau voo oliluaga kole vitoi doba.
10
Kosealelu bukau kotou loui avoe Dilavaule ba au Anelu hanavege abole aa nimabisi a hoeaseavai.
11
Koto keu tota loui avoe Aneluiale ba aa vatalage aba dobai vulele amiga kavalivelu bele.
12
Ige IESU kotove ibila avolu loui avoe, koto lelevela keu isitota bukau loui avoe laa beu lai kosive meli ke kaoalive.
13
Ige seteneu koto kateale loui IESU seleavaito kalei tilu loui avoe daa aike tai ui to ba tota kuialai avoe loi.
14
Iale seleavale keu vesuge IESU kuialai Galileia vatae tilu, keveo tiale keu munana tuvute keu vuvunele uge au avale nona kea bahata vatava ke nenile tilu.
15
Ige au tai dubuiabele ata haivege abo hoeaseavalu.
16
Vali voleo IESU kuialai tiale Nasaletae au eseu eseaveta uale keve velevalu. Vali bahata bulau loige aule talivelu guliguliagei iale bula kela au tialeu dubue lavisi olai bukau nona dodavei.
17
Kateige abo Aisaia beloveta buka vole vai vavuge eu vai vaveai ivivela lavisi dodavei tilu.
18
Dodavei avoe DILAVAu munana tuvu daele ulu, eu da letatavage dale kotove dua loui hauiabeu ue solivale ke haivei isi au da hanavage dale tiluga aveveabe toela ke loui hanavege abo aveve toela ke kalevai. Au da hanavage nii kelote keale ba niai, au daa hanavage olea uvu ulale uvale keta hoeaseavei.
19
Au daa hanavage dale atalai loui koseai koviveule ba aike laa hoeaseavei isi laa dulugei.
20
Koto ke dodavege vesuge buka vai dubu kosive vele vavui ugulumalu ige ata ke nenia sekiai nimabisi ulu.
21
Ige IESU lavigei avoe da nona dodavege la eviale keu ave velevalu.
22
Koto kateale louge abo kotoudua eviale kelu tetehama isi vikoai loui avoe au keu Dioseba vola keu au olevekateai koto ke valu.
23
Ige IESU abolai loui avoe daa huhuige la koto kosealela dalu loulivelu au haluluviale ata hoeaseavale ata iale ba amiga hoeaseava isi lale tota dalu loui koseai, aa Kabenamu oe aveve vole avale ke late ai vatate kole age lalai uvule huhui kateale huhuaeveva.
24
Isito daa laa lavigei ko evive beloveta ata keule au vatale koto louge vatave ata kea ba kotove evilivelu bele.
25
Dale kele koto vole loui memila vole Ilaidia usege veniu loie solialeu vagala tili isi bata sigisi kateivalela loviu vesulu vata ko adale ige vagala kitau lolu. Kateivale valila Iselaela gobuvuvu moeagaea ulu vata koveo.
26
Isito DILAVAu kela Ilaidia hanava solilu isito vata vole Saidoni keve hanavage tiale Salebeta gobu vole oe ui lovi vavuva.
27
Memila vali kela Iselalaea ata moeagaea hatiti toela lebelasi ke vaevelu isito beloveta Ilaidiau ke kali kalige solilu isito Silia kosive vole Neimeni ke ula hoeaseavalu ige eu doadoalu.
28
IESU koto isute kateale abolai louge dubu uvule abo ke evisi avolu tulu toela aevelu.
29
Isi kobekavai vatalai vai abo ou iae sekatavale vai kavatui.
30
Igeto IESU ata moeaga kea edekaeabe kele velevai tilu.
31
IESU vatava ke kalei Galileia vatae ovole Kabeniamue tialeu keve bulale ata haivelu.
32
Ige abo IESU louale ke evisi tetehamalu, kosealele kotove keu aboele vuvune alu.
33
Ige dubu keu uvue tilogoale malha voleu uale keu baita kekoai toalu.
34
Kekoai loui avoe IESU Nasaleta ata lo kalevei te, au aa koveo loale lo kaveliveluga lolu da huhuage au DILAVAu voo tuvute alau.
35
Ige IESU munana toela ke lavia avoe koto kalei malaha ke kalei lote kateige munana toela keu malaha ke laluvai vai ela vudia bele vata kavai kalei velevai tilu isege malaha keu doa doalu.
36
Ige ata bahataea ke ivai tetehama toela alu, isi vole lavigei avoe e nona vadeula koseale kou malaha kou au uvunele munana toela kolai louge abo kalevai tilu.
37
Iale IESU avale nona keu baita vata ko nenile tilu.
38
IESU kobelai dubu kalevai Saimoni oe tilu, tialeu ivage Saimoni vaeaveu hatiti tetete ke alu ige abo IESU lavialu.
39
Ige IESU tialeu vavavele lavisi hatitive ke kotoeavage hatitiveu vesulu, ige kobelai lovi vaui vavelu.
40
Gutule valiu dobaisege ata moeagaea abo hatitite ke agigei loige IESU igaligalile au ada vai tataeabele vaeavage ke nenia doadoa tievelu.
41
Isi munana toela moeaga ke bedovege abo kekoai loui avoe au Dilavau vo alau, kateai lousege IESU kotoeabe bavulu kosealelu ea vai lelevetige Dilavau ke hanavage ata hoeaseavale ata Keliso kela keu lolu.
42
Vali voleo vau alavasege IESU kobelai ataea uesoliale keveo tilu ige ataea kaoai ivai laviai avoe o kole u tikale.
43
Isito IESU lavigei loui avoe, DILAVAu daa hanavalelu dale oo bahata kele tai ata haivei abo DILAVAu adau vuvuneve valale uveve nona ke loui haivei.
44
Kateai loui haivei tiale Diudea vata ke neni dubuiabele aloloai haivei tilu.