1
Vali vole bulale IESU au mohohoali tilu, tai konevu volele daiai tisege mohoholea vagalai tai kone dakoai ginohai haumai isi tievelu.
2
Isege Balisese ata kea ke ivai IESU laviai avoe lavadeulu bulau lo vusai ko alu.
3
Ige IESU lavigei avoe, lale bukau uvule Deividiu au mohoho eali vagalai ale ke dodave solilu?
4
Deividiu dubu uvue tai beledi tuvute ke vai iale keta lale dodave solilu. Dubu nikovai uvale ke ulaeale beledi ke igei isito vali kela Deividiu basuale ke vusai tai beledi ke isi agisi au aboili tiale ke vavege abotai ilu.
5
Koto kateale louito kotoea kele loui avoe atau ese keu bulau kosive, iale aule vadeu louge abole keai.
6
Bula volele IESU tota dubue tilu, tialeu ata haivesege malaha voleu adave vaite keu keukaleta loaleu uva dubu uvue.
7
Isege Diuia basuavale nona loui haivevale kea isi Balisese ata kea loevealea IESU nimabisi uva, au bulale atake hoeaseavage abo IESU vai kotal vaeavai.
8
Ige IESU memila huhuiabe ke valu, isi malaha le ke laviai avoe kobelai lavi loi minale ige eu kobelai lavilu uvuiabe kele.
9
Ige IESU dubu kosi kitae ke belagei avoe, au lailoi basuale ke uvule vadeu loulu, lai lole bulale vadeu ai, au aveve dua ai? bela aveve toela ai? ata agisi duatigei? bela agigei toela tigei?
10
Abo koto solisi uge, IESU malaha ada toelate ke laviai avoe ai ada toelave ke katu, ige eu au ada katuge adaveu doadoalu.
11
Ige dubu kosive kea ke ivai avolu tuvu toela alu, isi vole lavigei olale IESU kavalivelu kuva kaoiva.
12
Vali voleo IESU talau visoe guliguli lu tiale guliguliai DILAVA laviavaga.
13
Ivaga vau alavage au mohoho tuelo '12' ke letatavegei loui avoe laea dii abositolo lalaea.
14
Kea iviabeala koea Saimoni isito IESU ivihalela Bita ige kove Enidulu ige Dieimisi ige Dioni ige Bilibi ige Batolomiu.
15
Ige Matiu, ige Tomasi, ige Dieimisi Alobiasi vove, ige Saimoni keu Seloti ata.
16
Ige Dieimisi vo Diudasi, ige Dieimisi vo isi Diudasi Isikaliot kela IESU lu haialu.
17
IESU aboili tala kalevai loevealea loho voleo daialu isege mohohove moeagaea daiai avoe loevelu. Ige ata moeagaea IESU koto evilivelu loevelu abo oo kalevaive loevelu, kevolea Diudia vatae loevelu isege vole oo kitae Dielusalemae loevelu, isege volea davala vavae oo abutita, Taea ta Saidoni kele loevelu.
18
Loevealea olai IESU ivage au haluluviabe kele hoeaseavei isege volea munana toelau aboele uvale keta lohomegei loevelu ige IESU keneni hoeaseavelu ige kea doadoalu.
19
Ige ata volea IESU vuvune ke ivai olai abota IESU vatalai vuvuneve agisi doadoai.
20
IESU au abositolo ke ivei abolai loui avoe hau moeaga sitea, sisilave, DILAVAu otogo keu laelela keu.
21
Vagalavale ataea sisilave vaoe lai gogo keule haniai ui, alioivalea, sisilave lale ba vaoe koele hamave.
22
Di hau avale esea ataeale base lalai ola savai, lai koto bokoai laa agisi toelatisi. Lalai loui koseai laea ata toela lalaea kosealelu laea di hau ataea kateige sisilave.
23
Vali kateivalela kobekavai sisilave kosealelu lai ibila kitau otogoe ulu lale ba agive, memila ataeabea kateai beloveta agisi toela tigelu iale ataeale ba la agigei toelatigei isito sisilave.
24
Isito hau moeagatea, laa nohovu laa vatau sisila aito otogou haube agie savalu.
25
Isi laa lovi ige lai gogou haniavale, la nohovu laleba vaoe vagalave, isi aike koele hamavale la nohovu laleba vaoe aliokavave.
26
Atae kotou dua loui la hoeaseveale la nohovu kosealelu, memila vavivuia be sele nona kateale loui sele beloveta hoeaseavelu.
27
Isito di koto evivalea da la lavigevege evive ata vadeuia la agisi toela tige kelai olave vai duative isi lalai tuvuavale keta hoeaseaveve.
28
Isi lalai kotou toela loui la agigei toelativale kelai DILAVA laviave.
29
Ata vadeu lai monole kavage laviagau vaki voletale kavai. Ige ata vadeu lai dabau ogona vage lougau lai setita vai.
30
Ata vadeu lai hau vadeulu olai louge olave ke vai vavuve isi ata vadeu lai hau agige momai au vai kuialalive ke loui kosealive kovai tai tota vailo.
31
La olage ataea la hoeaseavalivelu age lata ata ke hoeaseaveve.
32
Isito ata olea lalai isiviai la hoeaseavege ke ulalai isiviagelive lale kateige DILAVAule oleve kateai la hoeaseavei. La luleleige atau toelaeale aveve kateai abo kakoluvute ke ulalai olava hau vavegei.
33
Isito olea laele kalau dua avale ke ulaele aveve dua age DILAVAule oleve kateai la hoeaseavei la huhuige atau toela keale kateai abo atate ulale aveve dua agei.
34
Isoho ata voleu lae loi lai moni vole agisi tige momai avoele valivelu huhualive atau toelaeale kateale huhuai, lale kateige DILAVAule ba la hoeaseavalivelu bele.
35
Momai aveve toela kateale aevevale isito lalai tuvuivale ke hoeaseavave isi agisi duatige abolai aveve dua ave. Lai monita agige loui kosealive loi moni ibila loame keta loui lavigelive. Lale abolai duage lai mama otogoe uale keule ibila kitae lamegei ige lale eseve olive. Kosive aveveu kosealu keule atau toela ke hoeaseavei huhuiabe toela keta vesuiavai.
37
Momai volea aveve toela loui kaoai oaelive isi loui kosealive, kea atau toelaea lale volea toela kaosolige DILAVAule avota lai toela kaoalivelu bele. Isi momai ataea toela ale ke huhuagelive lale kateige DILAVAule avota lai toela ke huhualivelu bele isito aule totoai.
38
Lale ogonale isi monile isi DILAVAu nona ko loui vole haivei tige DILAVAuleavota hau moeaga aule lamei la dulugelu ige latale hau moeagate olive ige haule laele koboai ui, aa IESU hau age IESU amulu.
39
IESU nona kateale louge vesuge tota donau nona vole loui lavigei avoe malaa ni kelote keu ba malaha vole ni kelote ke meialemei avoti talivelu bele abole avoti abatale lavui.
40
Eseu esea koto keu ba tisaeabe, koto ke leivialivelu bele isito eseu ese keale kotove ke kaoai melialoho abole kosive late olievei.
41
La olai lai kakolo nile loeu dobale ke vai sito la kateisege loe kitaeu lai nile ulu.
42
Lai nile loe kitaeu uale kele lale oleve kateai lai kakoluvulai loui koseai loige lo ai nile loe eseieveu uale ke vai. Momai lai kakoluvu seleavei kateigei isito au luta ai nile loe kitaeu uale ke vai to ba vaoe ai kakolou nile loe eseieve ke vai kavatu.
43
Idiu dua keu baialuaga ba bai toela ke otovelivelu bele isege idiu toela keu ba baiu dua alivelu bele.
44
Idi bahata baiale ke la huhualu ugule ba a madileni kalivelu bele isi la ba gobavule vulutu bai kalivelu bele.
45
Atau dua keu uvule huhui dua keu ualelu aule kotou dua ke lougei, isito atau toela keu uvule huhui huhui toelau uvuvele uale keule nonau toela ke loui oigei.
46
La vadeuluga dalu loui koseiva, loi kitae isito da louale ke evie savalu kateige keu toelalu.
47
Isito olea daeo loi di koto evisi avale ata kea aveveabeu koselu.
48
Ata voleu ou dua kouvale ke late aule abata lovoi hade agisi emeu dua ale vuleu adale kobovele au o koui usege hanunu loige oo keu ba kobehovolivelu belel, kosealelu keu au o kou dua alelu meliai lavisi ulu.
49
Isito ata voleu di koto evisi to asoliale keu ou toela goneu adale kouale ke late. Keu neniai abata lovoi hade agisi neniai eme solilu ialelu hanunu loige o keu solekata kobehovoi vata kavai bokoai lavulu.