¹ Lo luleleige lailoeale vata koveo vateu tuvu kitae agievei vovoge Dilavaule Otogou vavate dogave ke lai loamege lailole uii tigei. ² Katealelu lai aike Otogou vavate agilivelu huhuai olale Dilavau vava ke lailoamei. ³ Lai ogona dogave katulivelu olavale kelate, lai olale vavau doga lai agisi Otogoe tai. ⁴ Lai vata koveo uale kele aveve isuteale lailolai loigei, ige lailole ke Isule kekohamai Lo ola solilu lai vatau vavaketa kobekavalivelu.Isito lo olale lai Otogou vavata kobekavai, ige voele vavate keule uesolisege giboai soneale vavate keule ukolikoliai ugei. ⁵ Dilava kela lailolai vavau dogave ke otovelu iale lailole ke agisi. Lo huhuige Dilava kela auu Munanau tuvu lailoameale keule au vavau doga lai loamei. ⁶ Katealelu loo vali bahata ke huhuai meliai ueviva.Lailoea vatau vavau lailoele uge lai huhuige laiba Kosive luvita Otogoe ulivelu bele. ⁷ Lai aike Kosive iva solilu, isito lailole ke huhuai lailoi evievile melitavai Vaoeba ivaevei. ⁸ Katealeluga loo meliai olavale vatau vavate ke kalevai Otogoe tai vavau doga agievei Kosive luvita igalitoai uii. ⁹ katealelu vata koveo isoho Otogoe lo Kosiveu ola ko lo aleu kitaeai ulu, ige lo olai Kosiveu olake ula lo agigei. ¹⁰ Lo huhuige lailoeale bahata Kelisou vavale leleisege aule lailoi aveve lai vatae ui avaleke igaligaliai kaoai keneni iva aii lailo vaevei.Ige au ale ke vasege dau dale vai voele o mauli amigalu huhua. ¹¹ Katealelu lo Dilava vabuiavai melitavai ata haiveva,Dilavau lo avale ko bahata dibalu. ¹² Lo koto kele olae savalu lai nile lomiga letatavalivelu.Isito lo olale la haivegei, lo avale keneni loui laa haivelivelu ata volea laeo loi abobiga letatavage lo avale nona ke loui lavigeve.Ata kea lai nile duave Isito uvuiabe keu toelalu. ¹³ Ata kea huhuige loea ata tilogote ataea, lo Dilava hau avale kelega abo lolai koto kateale loueviva.Isito loea tilogo solilu,isito loea hau kelega laa dulugeva. ¹⁴ Kelisou au ola lailoameale kelega lo lovive ke aeviva.Lo huhuige ata igali Keliso keu ata bahata Kelaigau voeleige lailoi aveve toelalu lai vovivale keu vesulu. ¹⁵ Kelisou ata bahatalai voeleale kelu olale ata bahata kea olave ula a evigei. ¹⁶ Katealelu lo ataea Aveve keula ivai huhuai kosealu isoho keu atakava,isito lo Ekalesia oliale kele huhui ke kalevalu. ¹⁷ Kosealelu ata vadeu Kelisoti igali toage Kelisoule uveve dogave vai vavuge memila avale keule vesui,isege aveve dogaveule loi avoele uii. ¹⁸ Lai memila Dilava vileo oge volela ulu Isito Dilavau Iesu Kelisoele lailo agigelu Ige lai kakoluvuiabe olievelu.Isi au loviu hau lailoamelu olale lai ata haivege abota Dilavau kakoluvu olisi. ¹⁹ Lo ata haivei loui kosealu,Iesu Keliso kelega Dilavau olale ata bahata keali kakolovuai.Keu olae solilu ataea kalau toela ibilave vavelivelu,isito keu olale lo kotove loui ata haivege abo aboili kakoluvuai. ²⁰ Dilavau loo hanavege lo Iesu Keliso koto loui ata haiveva,Dilava kela au koto vai loamege lo lalai louva Iesu Keliso ivile loo laa lavigei loui koseai la avale toela kekalevai lailoi Mama kitae Dilava ke luvita kakolovuave. ²¹ Iesu Keliso avevebe toela aa solilu isito Mama Dilavau lailo toela vai Iesu Keliso vilele vaeavage uisoliale kele,lailole avoluvita igali toai Dilavau nile lilikate olisi uii.