¹ Dilava au loviu hau loameale kelu lole loui laa lavigei loui koseai Mama Dilavau laa huhuige la hoeaseveale kelu labea kalevalive. ² Bukau kotole Dilavau loui avoe laa da toiavale kele da olai ave vali kole la dulugei, la agigei da kele nona vole louge evige.Aike vali kole la Dilavau koto evige aule la agigei. ³ Lo olae savalu Dilavau haule aveve toela age, ataea ke ivai homasiai guliguli kalevai. ⁴ Isito lo olale hauve kele aveve dua age ataea ke ivai huhuige loea Dilavau hau avale esea katealele aveve toela vadeu loele louge lo kele vateu tuvu agisi ke huhue solisito kele meliava ⁵ Ataea lo kavei lo agigei dibulae otovei lo agisi toelatigeva.Lo vagalata lovi kitae aevei nava savava. ⁶ Lo loi uvu vai ata kevaveale kele loi tuvu keu vesuge lo aveve dua ke ai Dilava lulele koto loui ata haivei hoeaseavageva. ⁷ Ige kele ataea lo ivege loea Kosive hau avale esea, Dilava Munana tuvu lo melitige lo kotove leleve ke ulale lo nonai ata lavigei Ige loi aveve keu meliai. ⁸ Ata volea lolai koto dua loui lo hoeseaveva isege ata volea lo evaseavei lolai kotou toela loui avoe la kea ata seleavei oiva. Isito lo abolai louvale keu kotou dua ula lo louva. ⁹ Ata volea loi avevele lulele savalu, isege volea loi aveve bahata kele lulele aevelu,avoe keale isoho vovoi isege lola Koea ueviva. ¹⁰ Abo lo agigei toelatigevale kele lo uvuaeviva,isito lo vali bahata sisilaeviva. Loea hau moeagate olie savalu,isito lo ata moeaga agigei haivege ea Otogou kototele hau moeagate olievelu vatau vabeu loele ue solilu. Isito lo Otogou valevile moeaga agisi kelu sisilave. ¹¹ Kolinito ataea loi kotobe lalai mahogova solilu. Isito loi uvule uale koto kenenila lo ke bahata loui la lavigeva. ¹² Lo lalai uvu dua kebe bavuge solilu, isito lala lolai uvu bavuva. ¹³ La loi ese late olila age, loi uvu bahata laele uale ke late lata lai uvu bahata loameve, ige lai igali olisi. ¹⁴ La bea momai evie solivale atakeali igali toavale aveve dua avale keali ba igali toalivelu bele aveve toela avale keali, ke late atagauba vaviti igali toalivelu bele. ¹⁵ Kelisou ba Seteneti igali toalivelu bele ou uvu igalialivelu bele,ke late evievi ataea ba evie solivale ataeali igali toalivelu bele. ¹⁶ Dilava ekalesia keale oleveo kateai seleivale silava hoeaseavale keali igali toai.Keu katesolilu kosealelu ukolikoli Dilava keu lailola keu. Da koto louale kele Dilava memila koto vole loulu, loui avoe dale di ataea minale ui Dilavaeabe olisege ea di ata olievei. ¹⁷ Katealelu Kosiveu bukau kotole tota loui avoe aveve toela avale kea aveveabe kelate aa kalevave, kalevei ogeta teve aboili uii aveveabe toela ke late aeviva. Kelu ogeta ogeta uge da loi laa agigei. ¹⁸ .dale lai Mama olige laeale di ese olive, Kosive vuvunete dala di koto ko louva kelu toela kalevave laea daeleala.