¹ Dilavau lolai uvuai au koto loui ata haiveve hau ke homasiava solilu, isito lo kele meliai hauve aeviva. ² Lo Matiu aveve ke kalevalu. Lo ola soliale ata seleavei lo ola soliale Dilavau koto loui lekoveai ata seleavei. Isito lo Dilava nile koto leleve ke loui ata haivege ataea bahata ke evisi huhuige koto keu leleve. ³ Lo ola soliale Dilavau nona vai mahogovalivelu,isito evie solivale kea ke evige koto keu aboele hogolahale ke late. ⁴ Vatau kosiveu evievi solivale kea huhui bavuge kea ola soliale Dilava koto evilivelu kea ke bavuevege kea Kelisou kotou dua ataga ke iva solilu Keliso Dilavati vole late.isito seteneu ata bavuge kea ataga ke iva solilu. ⁵ Katealelu loea lomiga letatavei koto loui ata haive soliva,isito Iesu Kelisou kotola lo loui ata haiveva.Isi loui koseiva kea lailoi Kosive Ige loea lai eseuese late olisi Iesu lovile laa dulugeva. ⁶ Memila voleo Dilavau loui avoe vavi kele ataga atauleba loi.Dilava kela louge Iesu ataga vai loale lailo haivege lai avoele Dilavau ataga ivai luleleai. ⁷ Lailoea aveve toela avale ataea,isito Dilavau au kotou dua vai lailo uvue vaeavai olale ataea atagave ke ivaevei huhuige ataga keu ataele loie solilu. ⁸ Aveve isute ke moeagaea loele loiva,isito aveve keu lo agigei toelatie soliva. ⁹ Ataea vateu tuvu loamei lo kaveva isito Dilava loili uge lo vovo soliva. ¹⁰ Iesu vateutuvu agisi voeleale ke late lo hauve ai vateu tuvu kitae agiva vali bahata Iesu aveve vole dogave vailoi vateu tuvu kitae vale ke late lota hauve dogave ke ai. ¹¹ Vali bahata lo Iesu lovi avale kele ataea olai lo kavei,isege volea ivage lo avale keu Iesu avale ke late lo ava. ¹² Lo lai uveve dua isi ukolikoli mauli agiveve kelu hauai vateu tuvu kitae agieveva. ¹³ Ata voleu bukau kotole loui avoe di evievilega da koto koo loui ata haiveva. Ige lota evievi ke igalilega lo koto ko loui ata haiveva. ¹⁴ Lo luleleige Dilavau lailoi Kosive Iesu isage kobelale ke late aule lailo isage vovole kobekavai.Ige Dilavale lailo ko neni agige lailole Iesu luvita igali toai uii. ¹⁵ Lalaiga lo lovi ou hau ko aii vateu tuvu ko neni bavui tige Dilavau ata ke hoeaseavege abota guliguliai Dilava hoeaseavai ivive letatavai. ¹⁶ Katealu loba lovi koo homasiavalu bele.Loi vava kou okeleava,isito Dilavau vali bahata loo uvu hoeaseavai vai melitiva. ¹⁷ Lo vateu tuvu agivale keu egeai kitae olie solilu.Isito vateu tuvu kele Dilavaule au ataga kitae loamege keule vateu tuvu ke leiviai vali bahata uii tigei. ¹⁸ Katealelu lo vatau valevile aike ivivale ke huhue soliva,Isito lo Otogoe valevile iva solivale ke huhuava, kosealelu lai aike ivivale koeale vesui uesolisi.Isito Otogo vile lai iva solivale keule uii tigei vali bahata kelu ai uvu vai Otogoe vaeava.