1
Aa ba kosi avave kelai koto isute loulivelu bele isito saiale ai mamalu louale kelate abolai lavigege isi ai lalavuele ale kelate atau doga kele kateale late aso.
2
Isi keate kosive ketale katea a ai aialu avale kelate abolai aso isi duluge dua aso isi keate dogave kelai ai amakinilu ale kelate ai hoeaseavei huhui dua abolai age.
3
Isi gobuvu olisi abouvu uvale keta hoeaseavege.
4
Isito gobu vole esete vavivute keale eseabeale vavivuia beale ke hoasevei kosealelu keu memila su ese au vavivu ke dulugelu ialelu esevea vavivuiabeale ke dulgei ige DILAVAule ke ivai abolai sisilai.
5
Isito isoho keate voleu velaveu voeleage keu gobu olisi uale keule valile vavile au uvu vai DILAVA vavui imiliagei.
6
Isito gobu vole keu isoho a ola ke ai aveve toela ai oivale keu aveveve keu voeleale kelate.
7
Iale da koto louale ko loui gobuvu ke haive ige kea aveve dua ula agei ataea nile ige ataea aboele toelabe ivalivelu bele.
8
Isito ata oleu neniai au ou ata vave solivale keu au evievile dobai keva otiva lavisi vaeatie solisito.
9
Momai keate dogavea gobuvu oliale ke Dubu hau vavelive isito gobuvuia loi abobiga oliale ke agigegabo dubule hauai lahaniabeu siti '60' late isi vela igaliale. Isito vela moeaga ale keu ba loi ke alivelu bele.
10
Gobu vadeu au ese neniavei deiaea loige agisi au oe otovui, Ekalesia isule uge dulugei ata moeaga duluge uda avale letatavage dubu hau ai. Ekalesia isi ata bahata keale keu avale ke ivage keu gobu dua.
11
Isito momai keate dogavea gobuvu oliale ke makage abo Dubu hau aevelive. Kosealelu keale Dubule hauaito velavu dogave lohomeluaga Kelisou hau ke kalevai.
12
Isi kele abo memila KELISOu lovi alivelu ale ke momaeavai.
13
Gobuvu keale u ulai, oi igali galila vaeatai voleali sisilai kotou toela loui ata volea avale ke loui vole haivegei loui ugei.
14
Iale da olale gobuvu dogave kea velavuia ese koui valivelu abo ese nalievei u dua ai katealelu lailolai louvale kea kele sekiai ui. Lailolai koto toela louvale ke kalevai.
15
Kosealelu gobuvu volea kuva dua ke kalevai setene lovaevelu isi kuvau toelala tievelu.
16
Iale da olale olevileo ekalesi gobu olisi uale ke huhugei neniavege abo udua ai valivelu isu vai ekalesia evievi ataele vaeavalivelu bele.
17
Eloda olea ata nimabigei hau dua ale ke ibilaeabe dua vave. Isi olea kotou dua loui ata haivevale keta ibila dua vavege.
18
Kosealelu Bukau kotou loui avoe ovoea lovi isi lovialivelu asege momai bavui ue vegelive isege abo lovi isi hauavei ige Bukau voleu loui avoe loviavale keale abo loviu ibila agisi.
19
Isoho ata vole igaliu loi Elodau vavale koto vole louge ke evivale isito ata abutita igalita loi nona ke igali louge evisi ke kaoaso.
20
Ige Eloda keu aveve toela age vai talivelu ekalesia minale vaeavai au badeu ale ke loui daiage ata kea evisege Elodau niabele matiai ui. Ige valivelu volea ke ivai matia vabuai abota ba ke alivelu bele.
21
Iale da a laviage eviso da alu louale koto ke loui ata bahata ke haivege abo evisi babuai sekiai ui. Abota kelate ai loi ataea nile leleisi uva ai kakolo voleu aveve toela vole age momai toelave ke mahogovalive isito au avale toela ke avoele lou. Kosealelu au vali baita DILAVA IESU KELISO isi Anenluiabe tuvute kea nile loviava.
22
Aba kosiu lovi aveve kole ata vole letatavai ai ada vai tatavele vaeavalive isi ata volea aveve toela age ata aboili ke alive, isito vali baita amiga huhuai aveve dua ula age.
23
Isi a vali moeaga hatitiavale ke eula ilive isito uaini eseieve lehosivai ige keu ai uvu hoeaseavai.
24
Ata volea aveve toela age ataea ke ivalu isege volea abo toelate ke mahogovalu iale ke vaoe DILAVAule ke loui daiage ataeale ke ivai.
25
Ige aveve dua kta kelate ata volea aveve dua ke age ata volea ke ivai lulelealu isege volea abo aveve dua ke mahogovalu la ke vaoe DILAVAule ke loui daiage ataeale ke ivai.