¹ Da olale evievi ata volea kosi kitae volele hauaito ibilave agie solivale kea kotoeabe evisi hoeaseavegei. Oloivaga evievi soliale kea DILAVAu ivi vai toelatisi kotoveta vai toelativa. ² Ige isoho evievi ataea eve lovi ulavale ibilave agiesolisito iale naoeabe keta evievie ata voleala kea iale momai kelai lougelive, agisi toelatigelive hoeaseave dua age kea abota evievi ata voleala kea abolai uvu igalile hauave. ³ Bolou Timoti laviai avoe meliai da louale ke loui ata haive ata volea lailoi kosi kitae IESU KELISO koto lova solilu isi lai haivevale nona kota evie solisi abo sele nonate loui ata vole haivege keu toelalu. ⁴ Ata kea abobiga letatavegeito lulele solilu abole vali baita volelai koto lou kavai volea maina ai vole agigei toelatigei. ⁵ Ige uvuiabe kea toelalelu loui abole vali baita volelai tuvuai nona leleve loulivelu bele isito abole vole lavigei koseai lai tai ata haivei kele moni kitae agisi iale ata kateale ke gogonige abo ale kelate alive. ⁶ Kosealelu lai DILAVAu lovi avale kele ba moni kitae agilivelu bele isito au vadeuave lai loameale keu nenivela keu lai kelu sisilage duave. ⁷ Lailoi aia vea lailo kougevale kela lai haubeta agisi loie solilu iale tota lai vovoi haubeta agisi tie solilu abatau uvue. ⁸ Katealelu lai lovita ogonata agige keu nenivela keu voleta huhu moeagai amiga vai toelativa. ⁹ Isito olea hau moeaga agiale keale seteneu seleavege abole sobakivele kolovai. Abo vavau ola ke age huhuiabe keule agigei kuvau toelale tai. ¹⁰ Moni keu kalau toela ke nenia umukavelale dobalau ke alu isi ata ke agisi uvule otovege uvu kitaele uevelu moni huhuaive. ¹¹ Isito au DILAVAu atalu loui aveve toela ke gogonia isi ui aveve duale at hoeaseavegei isi meliai uge atalai olai dulugei haive dua aso abolai tuvualive. ¹² Abo giluai viliviliai vole leivigeale kelate ai ukolikoli mauli vaso. Ukolikoli valivelu ale kele DILAVAu alu toige. A ekalesia moeaga kea minale kobelai IESU haulu laviale ke loui ata haive. ¹³ DILAVA igalila vale vile ko neni ai uveveabe keta vaveale isi IESU KELISOu Botiasi Bailate vudile lavisi bavuiava solisito au evievi nona louale kea nile da isuta alu louge eviso. ¹⁴ Kotove evisi lovai ai aveve ke neniavai amigata hoeaseavasege lai loi kosi kitae IESU KELISOu keu kuialai loi. ¹⁵ DILAVAu valive ni louale kele kuialai loi DILAVA keu vuvunete kosi kitae keu kosi kitae kea kosi kitae iale keule ata bahata ke nimabigei naligei. ¹⁶ DILAVA keu vali bahata uvale DILAVA keu ataga kitaele ualelu atabeu ba vavaveo talivelu bele. Atabeu memila ke ivasolilu isi ivalivelu ale keu toloalu vuvuneve keu vali bahata uva iale lai vali bahata ivive loui hoeaseavagei keu nona lelevela keu. ¹⁷ Iale hau moeagate ke lavigei kosea lai hau vesuale ke momai lai uvu vai kele vaeavai huhu moeaga kalevave. Lale ke huhuai hanivavai lamiga letatavai kosea da nenive isito lai uvu vai DILAVA vavue kela hau ke lamege la agisi sisilava ¹⁸ Kovu moeagate ke lavigei kosea lai hau moeagale ke vole agisi ata volea hau abolai ue soliale ke vave. Ilivelu DILAVAu aveve lele kitaeave. ¹⁹ Abo kateai ata ouai vaveale kele DILAVAu eue abolai hau vaite, duave otoveale ke agisi uveve dua agisi ui. ²⁰ Timoti DILAVAu au lovi vai amuale ke vatala dua ai, kotou toela baiveu ue soliale ke evilive kosealelu ata volea seleai loui avoe koto kou lulele kotola kou. ²¹ Isi koto ke vai kele abo evievi vai kalevatulu, isito da a lavialu koto keu koto leleve olie solilu. Di kotou lele kateai ulu, isito da olale DILAVAu vali bahata la huhugei la hoeaseavei.