¹ Mumayuva ogho, kwakalireko nka likurumbunga, ntani vavo kapi vhakalire nandya dakulya. Yesusa ayita varongwa vendi avatantere, ² Ame nakara nankenda kumbunga kondashi vanakara kumwe name mayuva matatu vahana kulya. ³ Nange nivatuma kumandi ghavo vahana kulya, kuvura vapwilire mundjira. Vamwe mukatji kavo kunatundu ghure.'' ⁴ Varongwa vendi avamulimburura, ''Kuni oko tuwana mboroto dakugwanekerera mulivango lyamburundu lino tukutite vantu vano?'' ⁵ Ghuye avapura, ''Dimuntje dingapi munakara nado?'' Ava limburura, ''Ntambiri.'' ⁶ Ghatantere Mbunga yishungire palivu. Mpo ghaghupire dimuntje ntambiri, apandura, ntani adibamaghura. Aditape kuvarongwa vendi vaditure kumeho yavo ano vavo avaditapere mumbunga. ⁷ Vavo vakalire nantjwi dadisheshu dadididi, ano opo amanine kutapa mpandu kukwavo atantere varongwa vatapere navyonka waro. ⁸ Valire vakutire, ntani vapongayikiro ovyo vyahupaliroko vyakubamauka, vikumba vyavinene ntambiri. ⁹ Kawakalirepo vantu vakutika kaumayovi mane. makura avatumu vayende. ¹⁰ Shirugho ntjosho mpo gharondire muwato navarongwa vendi, makura avayendi kulidingonoko mukaunda wa Dalimanuta. ¹¹ Makura vaFaliseyi avarupuka nakutameka kukukanana naye. Avashana shiyivhito shamuliwiru, vamusheteke. ¹² Ghakukumwida munda yampepo yendi nakughamba, '' Morwanke runakushanena ruvaro rwantani shiyivhito? Ghushiri nakumutantera kundereko shiyivhito osho ngavarupa ruvaro runo rwantantani.'' ¹³ Makura avashuvu arondo muwato shimpe nakuyenda musheli munya. ¹⁴ Mpopanya varongwa vakuvuramine kukushimbirako mboroto. Kapi vakalire namuntje damboroto dakupitakana payimwe muwato. ¹⁵ Ghuye avarawire, mukughamba ''Takamitenu ntani nomenenu vifulito vyavaFaliseyi navifulito vyaHerodesa. ¹⁶ Varongwa avakupurayere vavene na vavene, ''Mukonda mbyovi tunapiri mboroto.'' ¹⁷ Yesusa avidimbwilire vino ntani ghuye avatantelire, ''Vinke munakuku nungawira vyakuhamena kupira mboroto? Nani kapi munavikwata lighano? Anwenka kapi munakuviyuvha ndi? Nani ndamwakarera nadimutjima dakuditopa? ¹⁸ Anwe mwakara namantjo, anwe kapi mwamonanga? mwakara namatwi kapi mwayuvanga? kapi mwavurukanga? ¹⁹ Opo nabamwine dimuntje damboroto ntano mukatji kamayovi matano, vikumba vingashi vyayuliro vyaruhupwa vyamboroto dakubamaghuka evi vapongayikire. ''Avamutantere murongo navivili.'' ²⁰ Ano opo natetawire dimuntje ntano nambiri mukatji kamayovi mane, vikumba vingashi vyayuliro vyamboroto dakubamaghuka evi vapongayikire?'' Vavo avalimburura, ''vitano navivili.'' ²¹ Aghamba, ''Kapi shimpe munakuvikwata lighano?'' ²² Vavo kwayire kuBetesayida vantu vamo kwayitilire Yesusa mukafumu wamutwilu avakushenge kwa Yesusa ghamukwate. ²³ Yesusa akwata kulighoko lyamutwiku amushapwite, nakumurupwita pandje yamukunda. Opo amutipilire kumantjo ghendi akambeke maghoko ghendi papendi, amupura, ''Ghuna kumona vintu ndi?'' ²⁴ Ghuye akankunka aghamba, ''Ame kuna kumona vantu vakufana yira vitondo vyakuyenda.'' ²⁵ Makura ghuye amu kambeke maghoko ghendi kumantjo, ano mukafumu mpo apahulire mantjo ghendi, kumona kwendi akumahuka, amono vininke navintje nawa-nawa. ²⁶ Yesusa amutumu kumundi wendi nakumutantera ashi, ''Nakungenashi mudoropa.'' ²⁷ Yesusa kwayendire navarongwa vendi mudimukunda da Kesareya Filipu. Mundjira a pura varongwa vendi, ''Vantu omo vantwenyanga ashi ame re?'' ²⁸ Vavo avalimburura avaghamba, ''Yohanesa muyoyi.'' Vamwe kughamba, Eliya ntani vamwe ''Umwe wava porofete.'' ²⁹ Ghuye avapura, ''Ene ngoli anwe are mwantwenyanga ashi ame are?'' Peturusi aghamba kukwendi, ''Ove Kristusi.'' ³⁰ Yesusa avarondora mukupira kukavitantera kehe ghuno vyakuhamena kukwendi. ³¹ Uye atameke kuvashonga ashi monamuntu ndje tupu kuhepa vininke vyavingi, ntani ghuye ngavamushwena kumutambura vakurona nava Pristeli vavanene, novalirongi vamatjangwa, ntani ngavamudipagha, ano kuruku yamayuvha matatu ngavumbuka. ³² Ghuye aghamba mbudi oyo yakenine. Makura Peturusi amughupu amutware pampenge atameke kumu tughumukira. ³³ Ano Yesusa apiruka akenge varongwa vendi atughumukire Peturusi ntani aghamba, ''Kara kuruku yande Satana! kondashi ove kapi ghuna kutura maghano ghoye kwevi vya Karunga, ene ngoli kuvininke vya vantu.'' ³⁴ Makura ghuye mpo gha yitire mbunga yiponge kumwe navarongwa vendi, avatantere, ''Nange kehe ghuno anashana kunkwame ame, uye ana hepa kukudina mwene, adamune shikurushe shendi, ankwame ame. ³⁵ Mbyovoshi ogho ngashano kupopera monyo wendi, nga ghukombanita ene ngoli, ogho ngakombanito monyo wendi mukonda yande nambudi yayiwa ndje ngaghuparuro. ³⁶ Vinke ngavi kwafa mumwendi vyokuweka Udjuni naghuntje ene ngoli kakombanita monyo wendi? ³⁷ Vinke muntu avura kutapa muku shintitako monyo wendi? ³⁸ Kehe ghuno amfango ntjoni nankango dande moruno ruvaro rwarusshonda nandjo, mona muntu naye ngava kamufita ntjoni apa ngaya mughuyerere wavashe nova Engeli vakupongoka.''