¹ Ghuye ghatunduko kunya ntani aya mudoropa yendi yamvarerwa, varongwa vendi vamukwamine. ² Liyuvha lya Sabata mbyolya yire, ghuye ghashongo muSinangonge. Vantu vavayingi vamuyuvire ntani vyavatetwire ngudu. Mbyovaghambire ashi, ''Kuninko ghawana virongwa vino?'' ''Ghukonentu munke vamupa?'' ''Vitetukita munke gharuwananga namaghoko ghendi?'' ³ ''kapishi ndje karupinderu, mona Maria wamumati ntani mukurwa Yakopo ntani Yoses ntani Yudasa na Simoni? Vauni vendi vavakadona panderepo pano pakatji ketu? Vavo ghavagarapitire Yesusa. ⁴ Makura Yesusa ava tantere ashi, ''Muporofete ne kundereko lifumadeko, nkwandi mu doropa yendi ya mvarerwa ntani, mukatji kaliro lyendi, mumundi wendi. ⁵ Ghuye kapi avulire kuruwana vyavinene nkwandi kukambeka maghoko ghendi kuvaveli kumwe nakuva verura. ⁶ Ghuye vyamutetukitire ngudu vavo kundereko mapuliro. Mpo ayendire mudi mukunda ashongange. ⁷ Mpo ayitire vantu dimurongo na mbiri nakuvatuma vaviri-vaviri, kumwe nakuvapa unankondo wakutjida mpepo dadidona, ⁸ ntani nakuvarondora kapi vashimbe kehe vino muruyonda rwavo, kundereko vyuma, mboroto, ndjato ntani navimaliva mumaruvya ghavo. ⁹ nkwandi kudwata vicapa ene ngoli nakudwatashi makaranyana maviri. ¹⁰ Mpo avatantelire ashi, nange munangene mundjugho karenu momo, dogoro mpopo ngamutundamo. ¹¹ Nangeshi mpoyili doropa oyo ngayidiro kumu tambura ndimposhi kumutegherera, pakutundamo mu livango, kuku kumuna mbundu da kumpadi denu, vikare ghumbangi kwavo. ¹² Mbyo varupukiremo vakakorangede vantu vakushighure. ¹³ Vatjidire ndemone dadingi, nakuwaveka vaveli maghadi kumwe nakuvaverura. ¹⁴ Hompa Herodesa mukuviyuva vino, kondashi lidina lya Yesusa kwayuvikire shiri unene. Vamwe kwa ghambire, ''Yohanesa muyoyi ana rambuka kuvafe, mbyo ana wana nkondo mumwendi gharuwane vitetu vyavinene ngoli.'' ¹⁵ Vamweya ashi, ''ndje Eliya,'' Shimpe vamwe ashi, ''Ndje muporofete, yira mbovanya vaporofete vaku kakuru.'' ¹⁶ Ene ngoli Herodesa mukuviyuva mpo aghambire, ''Yohanesa ogho natetiro mutwe anakavumbuka kutunda kuvafe.'' ¹⁷ Herodesa kwatumine vakakwate Yohanesa nakamutura mu dorongo, konda ya Herodiyas( Mukada muUnyendi Filipusi) mora ghamukwalire. ¹⁸ Mora Yohanesa kwatantera Herodesa, ''kapi vyapulitira paveta ghukware mukada muUnyoye.'' ¹⁹ Ene ngoli Herodiyas kwakalire na ugara waunene ngudu ntani ghashanine kumudipaya, Ene ngoli kapi ghavivulire, ²⁰ kondashi Herodesa atjilire Yohanesa; ghuye aviyivire ashi ghuye mukaghushiri ntani mupongoki, ntani ghuye kwamu pungulire nawa. Kagarapanga opo kamuteghereranga, nampili ngoweyo ghuye kamuteghereranga nawa. ²¹ Makura liyuva limwe lyaliwa lyatikiremo olyo gha gwanitire Herodesa mpo ghawapayikire murarero kuvakutikwa vendi, vakomanda nava mpititi vamu Galileya. ²² Mona Herodiya wamukadona pamwene aya avadanenepo, makura a vahafita unene vagenda va Herodesa. Hompa mpo aghambire kumukadona, ''Mpure kehevino unashana ame kunivikupa.'' ²³ Ghuye kwakughanine ashi, ''Kehe vino ghumpurame, kunivikupa, dogoro pakatji ka Uhompa wande.'' ²⁴ Mpo gha rupukire aghamba kuvawina, ''Vinke ovyo nikamupra?'' Avaghamba ashi, ''Mutwe wa Yohanesa mukushi.'' ²⁵ Mpopo mukadona avyukirimo nakatantera hompa ashi, ''navishana mpopano'' ''Nashana mutwe wa Yohanesa pa shisha shashipirangi. ²⁶ Nampili ngoli vyagarapitire hompa, kapi avulire kushwena kovyo amurombire mukadona konda ya kukughana kwendi ntani mukonda ya vagenda vendi. ²⁷ Makura hompa mpo atumine lirenga lyendi nakumutantera ghakayite mutwe wa Yohanesa. lirenga mbyolya yendire nakamuteta mutwe mudorongo. ²⁸ Mbyo lyakayitire mutwe pashisha nakughutapa kogho mukadona, mukadona mpo ghaghu tapire kuva wina. ²⁹ Opo vaviyuvire varongwa vendi, mpo vayire nakuyashimba rutu rwendi kumwe nakarutura mumbira. ³⁰ VaApostoli mbyova yendire kwa Yesusa nakamutantera ovyo vakaruwanine novyo vaka shongire. ³¹ Mbyo avatantelire ashi, ''Yendenu panaghumwenu mukashane livango lyalikenu olyo mukavura kapwiyumuka kadidi.'' Mposhi vangi vayiro nakayenda, kapi vawanine ruvede rwa kulya. ³² Mbyo vayendire panaghumwavo muwato kulivango lyalikenu. ³³ Ene ngoli vangi vavamonino opo vatundire palivango lyapo, ntani vangi vavadimbulire, ntani vavo mpovadukire parupadi nkoko kulivango vatambire vamudoropa nadintjeya, kumwe nakatika kumeho yavo. ³⁴ Opo vayatikire paliyenga mpo amonine mbunga yayinene yinapongopo mpo avayuvilire nkenda kondashi vavo kwakalire yira ndjwi dahana muliti. Mpo avarekire kuvashonga vinimnke vyavingi. ³⁵ Opo lyatokire liyuva, varongwa vendi avamupura ashi, ''Weno liyuva linatoko olino livavango lyamupurungwa liyuvanka linatoko. ³⁶ Vatume vayende mumaruha ghashironga namu dimukunda vakakughulire ndya vakalye. ³⁷ Ghuye mpo avalimbulire ashi, ''Vapenu anwe kehe vino valye.'' Vavo avaghamba kwendi ashi, ''Kuvura tuyende tukaghure mboroto musiliveli mafere mafiri tuyavape vayalye ndi?'' ³⁸ Ghuye mbyo avatantelire ashi, ''Mboroto dingapi munakaranado? Yendenu mukakenge.'' Opo vakawanine avaghamba ashi, ''Mboroto ntano ntani Ntjwi mbiri.'' ³⁹ Ghuye mpo avarawire vantu navantje vashungire mutumbunga pamushoni washinamahako. ⁴⁰ Mpo vashungilire mutumbunga twa mafere na dimurongo ro-ntano. ⁴¹ Mpo ashimbire mboroto ntano na Ntjwi mbiri, nakukenga muwiru kumwe nakuditungika ntani mpo gha bamwine mboroto kumwe nakuditapa kuvarongwa vendi vatapere kuvantu. Ghuye nka atapelire Ntjwi mukatji kavo navantjeya. ⁴² Navantjeya valire dogoro kukuta. ⁴³ Mbyo vashimbire ovyo vya bomaghukire ku mboroto, vikumba murongo na mbiri vyakuyura, ntani mugcene-gcene wantjwi. ⁴⁴ Kwakalire vantu mayovi matano ovo valire kudimuntje. ⁴⁵ Mpopo mbyo ghatantelire varongwa vendi varonde muwato vayende musheli, mu Betesayida, oku ghuye nakutuma mbunga nayintjeya vatundepo. ⁴⁶ Opo vatundirepo navantjeya , ghuye ayendi mumandundukumwe nakaraperera. ⁴⁷ Ngurova kokutika wato wavo nagho pakatji kalifuta , ghuye pentjendi pa Urundu. ⁴⁸ Ghuye mpo ghamonine ashi vavo vakalire naghudito nawato wavo, kondashi mpepo kwatundilire nkoko vatambire, opo ghapwire matiku, Mpo ghayendire pawiru ya lifuta, ghashanine kuva pitakana. ⁴⁹ Ene ngoli opo vamumonine nakuyenda pawiru ya lifuta, vaghayalire ashi walye ghuye shirumba-rumba, Mbyo valilire , ⁵⁰ kondashi vamumonine vavo nka vanayorongana. Mpopo mbyo avaghambitire nakuvatantera ashi, ''Karenu naUkoli! Ame uno! Mwasha tjira!'' ⁵¹ Mbyo gharondire naye muwato. Mpepo nayo ayikutura kuyunga. Vyava tetukitire shiri ngudu. ⁵² Kondashi kapi vayivire ashi vinke da tantire dimuntje. Ene ngoli, dimutjima davo dagolire. ⁵³ Opo varutire, mbyo va yire ku livhu lya Genesarete mbyo va sheghikire wato. ⁵⁴ Opo vatundire mushikepa, vantu vamudimbulire kare mpopo, ⁵⁵ mbyovadukire mulidingunuko mukunda namuntjeya kumwe nakuvareka kuyita vaveli nakuvayarera pamate davo, kehe kuno vyuvire oko akalire. ⁵⁶ Kehe kuno opo kangenanga mudi mukunda, ndi doropa, ndi shirongo, vavo kutura vaveli mumavango ghakughulitira. Kwamukandelire avapulitire vakwate kughuhura walirwakani lyendi ghungi wavo vakwatireko vaverukire.