¹ Vayatikire kushelikunya ya lifuta, mulidingonoko mukunda lya Geresenese. ² Opo ghatundire Yesusa muwato, mpopo mbyo ghakwangulire ghatunde pambira murume wampepo dadidona. ³ Murume ghatungire pambira. Kundereko ghumwe kamuvurango kumumanganka, nampili namaghuketanga. ⁴ Ghuye Kavamu kwatanga na kumumanga rwarungi na maghuketanga. Ghuye kaghandemburanga. Kwato ogho ghakaliro naunankondo wakumushayikita. ⁵ Kehe matiku na mwi paMbira na kumandundu, kaliraghananga nakukuteta naghumwendi namawe ghamatwe. ⁶ Opo ghamonine Yesusa kwaghure amudukilire atongamene kumeho yendi. ⁷ Kwalilire naliywi lyakudameka, ''vinke unahoro nikurughanene, Yesusa, mona Karunga wapa wiru-wiru? Nakukandere ove monaKarunga mwene, washa hepeka.'' ⁸ Mora ghuye kaghambanga ashi, ''Rupukamo mwendi anwe mpepo dadidona.'' ⁹ Ava mupura ashi, ''Overe lidina lyoye?'' ghuye avalimburura ashi, ''Lidina lyande ame Lijeni, morwa atwe tuvayingi.'' ¹⁰ Ghuye ghamukanderere rukando-narukando ghasha vatjidamo mumudingunuko mukunda. ¹¹ Mpopo utanga waVinguru vya lyeliliro paNdundu, ¹² ntani ava mukanderere ashi, ''Tutume muvinguru, mposhi tungenemo. ¹³ Makura ghava pulitiri; Mpepo dadidona ghadirupuka nakungena muvinguru, ntani vyadukire vighurumukire mulifuta, ntani mafere maviri ghavinguru vya minanganine. ¹⁴ Ovo valitiro vinguru ava duka vakatante evi vya shorokiro mudoropa na kusheli kunya ya doropa ntani kuruha rwashirongo, ntani vantu ava rupuka vakakenge ovyo vyashorokiro. ¹⁵ Kutundapo mbyo va yendire kwaYesusa ava mono murume ogho ghakaliro nampepo dadidona , ogho ghakaliro nandemone, murume omo mwakaliro Lijeni, ghashungiliro, ana dwata nawa ghuye opo anavyukiri mughuntu wendi nawa-nawa. Makura aviva tjilita. ¹⁶ Ovo vamonino ovyo vyashorokiliro kogho ghakaliro nampepo dadidona ava tantere vyakuhamena kuvinguru mwamunene. ¹⁷ Makura ava kandere ghatundemo mulidingonokomukunda lyavo. ¹⁸ Opo gharondire muwato, murume wampepo dadidona ghamukandere ashi ndi akare naye. ¹⁹ Ene ngoli Yesusa ghamushwenekire, ene ngoli ghamutantelire ashi, ''Yenda kumundi ghoye nakuvantu voye ghuvatantere ovyo ghanakuruwanene Karunga, ntani weni omo ana kufere nkenda.'' ²⁰ Makura kokayenda nakatameka kukorangenda kuvitetu ovyo ghamu ruwanine Yesusa makura vantunavantje vyavatetwire. ²¹ Opo Yesusa ghaya taghurukirenka rwakukwamako kusheli kunya yawato, kwakalireko mbunga yina mudingurulikida, opo ghakalire kuntere ya lifuta. ²² Makura ghumwe wava mpititi wa Sinangonge walidina Yayirusi aya, ntani opo ghamonine awere kumpadi dendi. ²³ Mpo ghamu kandelire nka waro, nakughamba ashi, '' Monande wamukamali ana dohoroka.'' Nakukanderere iya ghuya mukambeke lighoko lyoye pendi, mposhi walye kwakuyuva hasha ghaparuke.'' ²⁴ Mpo vayendire kumwe naye ntani nambunga vamukwame oku nakukutindayika pepi naye. ²⁵ Kwakalirepo mukadi ogho ghakaliro kushidira, mwaka ro-mbiri. ²⁶ Kwahepire ghunene kuvapangi vavangi opo ghamanine kufuta vininke vyendi navintje ovyo ghakalire navyo, hana ngoli kuyauvako hasha ghavikara mwamudona ghunene. ²⁷ Opo ghayuvire vyaku hamena kwa Yesusa, mpo ngoli ayendire mumbunga nakukakwata kulirwakani. ²⁸ Mpo aghambire ashi, ''nangeshi nikwate tupu kuvyuma vyendi, kuniveruka.'' ²⁹ Opo ghamukwatire, honde mbyoya shaghekire kupita, ntani ghakuyuvire murutu rwendi ashi anaveruka kughuvera wendi. ³⁰ Yesusa mpopo aya dimburura ashi, nkondo dinamutundu. mbyo gha pirukire mumbunga nakughamba, '' ³¹ Are anagumo vyuma vyande?'' Varongwa vendi avaghamba kwendi ashi, ''Ghuna mono mbunga omo vanakukupatilikida koye, ghughambe ashi are ana gumo?'' ³² Ene ngoli Yesusa akenge mumbnga amone ogho aviruwanino. ³³ Mukamali, ayivire ashi vinke vyamushorokeliro, ghoma ntani nakukankama. Mbyo ayire awere kumeho yendi nakumutantera ghushiri naghuntje. ³⁴ Ghamu tantere ashi, ''Monande wamukamali, lipuliro lyoye linakuverura. Yenda mu mpora ntani veruka ku ghuvera ghoye.'' ³⁵ Ndahokwera mukughamba, vantu vamwe vakutunda kuvampititi vamu Sinangonge vayire, nakughamba ashi, ''Monoye wamukamali anadohoroka. Mora vinkenka munakuyoronganitira mushongi?'' ³⁶ Ene ngoli opo ghaviyuvire Yesusa mbudi oyo vaghambire, mbyo atantelire mpititi waSinangonge, ''vyasha mutjilita. Karenu nalipuro.'' ³⁷ Ghuye kapi ghapulitilire kehe ghuno ghamukwame nkwandi Peturusi, Yakopo na Yohanesa, mukurwa Yakopo. ³⁸ Ghava yendi mumundi wampititi ghumwe wamuSinangonge, ntani ghamonine vantu nakuyotera ngudu; vavo kwa lilire nakukwenaghuka. ³⁹ Opo angenine mundjugho, aghamba kwavo. ''Vinke muna garapere ntani nevi muna kulilira? Mwanuke kuna rara tupu turo kapi anafu.'' ⁴⁰ Ava mushepe. Mpo avatulire navantje pandje ntani ghashimbi vashe na vawina vamwanuke nava vakaliro naye vayende kumwe nkoko akalire mwanuke. ⁴¹ Mpo gha ghupire lighoko lyamwanuke nakumutantera ashi, ''Talitha, koum!'' ovyo vatoroka ashi, " Mwanuke wamukadona, ame nakukutantero, rambuka.'' ⁴² Mpopo mwanuke wamukadona gharambuka nakuvareka ayende( kondashi ghuye kwakalire namwaka murongo ghumwe nambiri). Vavo mpopo vakalire nashitetu, naruhafo shiri rwarunene. ⁴³ Ghuye kwa vivashweghenine unene ashi kwato muntu ogho ghaviyivo. Ntani ghava tantere vamupeko vimwe alye.