लिउ ९
1
खोकि तिवाला सिक्यासुङ, "हुतुङ ङा खिराङ्ला सिउइ, द्ये लानि वतुप् नाङ्ला लालाकि कन्ज्यककि ग्याल्खाप् ङार तानि लेबु थोङु सिना तङ्ला श्येप् छ्या मेङेउइ।
2
,ङिमा टुगि तिङ्ला पत्रुस, याकुब ताङ युहन्नाला दाक्पु तानि टिनि ला थेन्बु चिकि खाला गाल्सुङ। ति तिङ्ला तिवि दङ्ला खोकि ङो राङ्साला ग्युर्सुङ।
3
खोकि माज्या तिवा आला ठाछ्यालि च्युङ्सुङ, आला कार्मु च्युङ्सुङ, दजो कार्मु च्युङ्सुङ कि जाम्बुलिङ्ला सिकिसाङ तिजो कार्मु जो मुथुबु नक्।
4
तितिङ्ला एलिया ताङ मोशा खो तिवि चाला थोङ्सुङ। तिविकि येसु तानि ताम किइ वतुप् नक्।
5
पत्रुसकि खालेन क्यानि येसुला सिक्यासुङ,"लोबेन, ङेराङ्ला द्ये देतुप्ला लेमु वे। तिकि किसाला, ङेराङ द्वे देतुप् दासा सुम् जेः चिक् खोला, चिक् मोसाला ताङ चिक् एलियाला ।"
6
(तिकि काङ् सिक्यासुङ सिनि छ्या माङे, चिला सिसिन जिवा क्यावु नक्।)
7
मुसुप लेम्नि तिवाला उप्सुङ। तजोला मुसुप् नेसुर् वोरुचिक लेसुङ,"दि ङे ङिङ्ज्येबु पुज्युङ हिन्, दिकि सिक्याबु ताम ङेन्।"
8
श्यारि तिविकि दाक्पि फारछुर ल्हासुङ, तिविकि तिवा तानि येसु सिना ज्येन् सुलाङ माथोङ।
9
खोतिवा ला नेसुर मालिमला हुङिन वसिन् मि पुज्युङ श्येप नेसुर् सेन्बु मालाबु साक सुलाङ काङ मासिसा सिनि का बिन्सुङ।
10
तिकि किसाला, ति काच्ये तिवा तिवि दाक्पु तानि राङ ज्याक्सुङ, हिन्सिनाङ तिविकि सिक्यासुङ "श्येप नेसुर् सेन् लाङु" दिकि तेन्दक् काङ हिन् सिनि तिविकि दाक्पि पार्ला टो क्यासुङ।
11
तिविकि खोला टिसुङ "क्ष्योने तिविकि चिला एलियाराङ तङ्ला हुङ्गोक्यु सिक्याबु हिन् ?"
12
खोकि तिाला सिक्यासुङ,"हुतुङ्ला तेरिक् ताम्ला लेमु ज्वप् एलियाराङ तङ्ला हुङ गोक्यु। मि पुज्युङ्कि आला दुक्पा खुर्गोक्यु, तेरिककि पार्ला ङेप्च्ये किउइ सिनि चिला टिबु वे?"
13
ङा खिराङ्ला दि सिउइ, एलिया लेम्निङ् सिदु वै, सुङ्ला तिकि कला टिबु दगेराङ तिविकि एलियाला काङ सेम लासुङ तिराङ क्यासुङ्।"
14
खो लोप्टा तिवि चाला लेसुङ, खोकि तिवि ठाटुला गेर्पु मि जोम्बु थोङ्सुङ, क्ष्योने तिवि तिवा तानि खालेन किइ वतुप् नक्।
15
तिविकि खोला थोङ्सुङ, तेरिक् छक्पा मि याम्छेन लानि तेरिक खोला गङ्बा श्यप् सिनि छ्यानि गाल्सुङ।
16
खोकि दाक्पि लोप्टा तिवाला टिसुङ,"खिरेकि तिवा तानि काङि खालेन किइ वे ?"
17
छक्पा नाङ्ने मेराकि खोला खालेन बिन्सुङ,"लोबेन्, ङेकि खोकि दाङ्ला ङे पुज्युङ खबिन्। तिला ताम कि मिजिबु ह्रेन्डि रेकुप् वे,
18
ह्रेन्डकि दिला जिम्ग्यु, देप्क्यु, खाला च्येमेक् देन्ग्यु, जुबु कास्से क्यानि सा थाप्क्यु । ङेकि खोकि लोप्टा तिवाला दि थेन सिनि गङ्बा श्युबिन् हिन्सिनाङ तिविकि थेन माथु ।"
19
खोकि तिवाला खालेन क्यासुङ्, "रेत्पा मेतुप् गिपा तिवा, चो तिज्येसाक ङा खिराङ तानि देगोबु हिन्? नाम्साक ङा खिरे दुक्पा सेम्ला लाङ्गुप्जा? तिल ङे चाला टि श्यक।"
20
तिविकि ति पुज्युङ् पेजाला खोकि चाला टिलेसुङ। तजोला ति ह्रेन्डि थुकि येसुला थोङ्सुङ, ति ह्रेन्डि थुकि ति पुज्युङ पेजाला कास्से क्यानि रुक चिसुङ। ति पुज्युङ् पेजा साला डिल्नि खाला च्येमेक तेन्सुङ।
21
येसुकि तिकि पापा तिला टिसुङ,"दिनक् च्युङु ति चो गाल्सुङ?" पापिकि सिक्यासुङ,"पेजा नेसुर् राङ हिन्।
22
दिकि तिला पार्चिङ मे नाङ्ला, पार्चिङ छ्यि नाङ्ला क्युर्नि सेतुप् छोलिन वै। हुतुङ ख्यारेकि काङ कि थुसिन ङेरे खाला च्याम्बा क्यानि दाल्जा किटो कि ।"
23
येसुकि तिला सिक्यासुङ,"हुतुङ् खो किथुसिन' मोवा किरुप् तिवाला तेरिक कि थुक्यु।"
24
श्यारि ति आङि पापा कारे क्यानि सिक्यासुङ, " ङा मोवा किउइ! ङे मोवा मेतुप्ला दाल्जा किसा।"
25
तजोला येसुकि जोम्बु मि खोकि छ्यला छ्यानि हुङिन वतुप् खोकि थोङ्सुङ्, खोकि ति मेचेङि थुला कारे क्यानि सिक्यासुङ,"ख्योरुङ् फाक्पा ताङ मिक मोथोङु थु ङा का तेर्क्यु ति नेसुर् थेनि ग्युक् तेमे नाम्लाङ दिला माश्युग्।"
26
दि कारे क्यानि जिवा लाङ्दे क्यानि जिङ्बाल ग्याप्सुङ तेमे थेनि गाल्सुङ। ति पुज्युङ् पेजा श्येप् दगे थोङिनक्। तिकि किसाला, मेरा आलाकि सिक्यासुङ,"ति श्यिसुङ।"
27
येसुकि ति पुज्युङ् पेजाला लाक्पा थनि जिम्नि लाङ्सुङ तेमे ति पुज्युङ् पेजा टाङि लासुङ।
28
येशु नाङ्ला श्युसिमा लोप्टा तिविकि सुङ मेसाला खोला टिसुङ"ङेरेकि दिला च्युक क्यानि देन माथु?
29
खोकि तिवाला सिक्यासुङ, "दिनक् ताम तिवाला मोपार मेता देन मुथुउइ।"
30
खो तिवा त्येसुर् गाल्सिमा गालिल नेसुर क्यानि गाल्सुङ्। खो तिवा केनि वे सिनि सिकिसाङ छ्या मेङेसित् सिनि खो कि नावा क्यासुङ,
31
चिला सिसिन खोकि दाक्पि लोप्टा तिवाला लोबिन् वतुप नक्। खोकि तिवाला सिक्यासुङ्, "मि पुज्युङ मितिवि लाक्पाला तेर्क्यु तेमे तिविकि खोला सेक्यु। तिला सेसिमा तिकि ङिमा सुम्गि छेमु ति लोङ्या सेन्बु लाङु।"
32
तिजोला तिविकि ति सिक्याबु नाम ति हाक माको, खोला ट्येप् तिङ जिवा क्यासुङ।
33
तेमे तिवा कर्फनहुमला लेमख्योल। खो खाङ्बाला वतुप ठक्ला खोकि तिवाला टिसुङ, "खिरेकि लाम्ला काङ टो क्याबु ?"
34
तिवा तेरिक ताम मक्याबा देसुङ। चिला सिसिन तिविकि "सु तेरिक् सिना गेर्पु हिन्" सिनि सिटि क्याबु नक्।
35
खो देसिमा मेरा च्युप्ङिला का ताङ्नि खोकि तिवाला सिरुप् ज्युसुङ, "हुतुङ लाला मि तङ्ला हुङु छोल्सिन् ति तेरिक् सिना तिङ्मा ताङ यक्पु हुङ गोक्यु।"
36
खोकि पिजा टिक्पे चिक्ला लानि तिविकि पार्ला ज्याक्शुङ। खोकि तिला लाक्पाला लानि तिवाला सिक्यासुङ,
37
"सिकि दिनक् पेजाला ङे मिन्ला सिनि दाक्पि सेम्ला लाङ्ग्वु, तिकि सेम्ला ङालाङ् लाङ्ग्वु, सिकि ङाला सेम्ला लिङु तिकि ङाला क्याजिक मिन्, ङाला तोङ्गुप् लाङ सेम्ला लिङ्ग्वु।"
38
युहन्नाकि खोलाङ सिक्यासुङ, "लोबेन्, लालाकि खोकि मिन्ला ह्रेन्डि तिवा श्योरिन् वतुप् ति ङेरेकि थोङ्सुङ तेमे ङेरेकि तिला क्योरिन्, चिला सिसिन तिकि ङेराङ्ला तिङ मङ्यगुउइ।"
39
तेशुकि सिक्यासुङ, "तिला माक्योर, चिला सिसिन सिकिसाङ ङे मिन्ला ङार् वतुप् लाका क्यानि श्यारि ङे कला चिन्दिङ मेलेवा ताम सि मुथुउइ।
40
सु ङेरे खाला मेत्, ति ङेर्ति हिन्।
41
खिराङ चावाकि हिन्दुप्कि किसाला सिकि खिराङ्ला छ्युचिक् बिन्सिनाङ हुतुङ ङा सिउइ तिकि दाक्पि छ्याक्तक मोतोङुउइ।
42
ङाला मोवा कितुप् दि टिक्पे मि तिवा मेरा चिक्ला नार्तु ग्याग जितुप् सिना या, तिला ज्यिङ्बाला गेर्पु लाकुर दो टानि ग्याम्छोला क्युरु लेमु च्युङु।
43
हुतुङ ख्यरे लाक्पिकि ख्योरुङ्ला नार्तु ग्याक जिसिन तिला तुम्नि क्युर्। लाक्पा ङि खुर्नि नाम्लाङ मिसिन्बु मे ङ्यालवाला ड्वब् सिना लाक्पा चिक मेता राङ देवाचेन्ला ड्व्प लेमु च्युङु।
44
"ङ्याल्वा ला ति बु तिवा ताङ मे तिवाङ नाम्ला मिश्यिउइ ।"
45
हुतुङ ख्यरे काङ्बिकि ख्योरुङ्ला नार्तु ग्याक्जिसिन् तिला तुम्नि क्युर् । काङ्वा ङि खुर्नि ङ्याल्वाला ड्वप् सिना काङ्बा मेता राङ मिजिला श्युगु लेमु हिन्।
46
ङ्याल्वा ला ति बु तिवा ताङ मे तिवाङ नाम्लाङ मिश्यिउइ ।"
47
हुतुङ ख्यरे मिगिकि ख्योरुङ्ला नार्तु ग्याक् ज्यिसिन्, दिला थेनि क्युर्,। ङिकार मिक् खुर्नि ङ्याल्वाला ड्वप् सिना मिक् चिक् क्याजिक खुर्नि कन्ज्यककि ग्याल्खाप्ला श्युगु लेमु च्युङुउइ।
48
त्ये दि बु तिवा मिश्यिउइ मे दिङ नाम्लाङ मिश्यिउइ।
49
चोला सिसिन मेकि तेरिक्ला छाटक्पा जेउइ।
50
छा लेमु हिन्, हुतुङ छेकि दाक्पि छाटक्पा ट ताङ्सिन् तिला लोङ् ङ्या चुक क्यानि छाटक्पा ज्वप्जा ? दाक्पु दाक्पुला छा ज्यक तेमे दाक्पि पार्ला सेम् सेङेला देत्।