¹ अखमिरि रोटिको त्यूहार ढिगै आएगओ रहए । जासे निस्तार त्यूहार काहत हए । ² मुख पुजारि और शास्त्री बाके कइसे मारै कहिके सल्लाहा करत रहए, पर बेआदमीनसे डरात रहए । ³ बाह्र जनी मैसे यहुदा इस्करियोत के भितर शैतान घुसगओ । ⁴ येशूके बिनके हात मे कैसे पकणबामए कहिके मुख पुजारि और कप्तानके ठिन जाएके बा सल्लाहा करी । ⁵ बे खुशी भैय, और बाके रुपैया देन कबुल करी । ⁶ बा सहमत हुइगओ, और भिण ना भओ बेरामे बाके पकणन मौका ढुणन लागो । ⁷ अखमिरी रोटीको त्युहारको दीन रहए जौनदीनसे निस्तारको थुमा (बकरा) बलीदान चणांन पणंत रहए । ⁸ बा पत्रुस और युहन्नाके अइसे कहिके पठाइ, ”जाएके हमर ताहि निस्तार त्युहारको भोज (खानु) तयार करौ, ⁹ बे बासे कही, ”हम जा भोज (खानु) कहाँ तयार करएँ ? ¹⁰ बा उनसे कहि, "सुनओ , जब तुम शहेर मे घुसओ, पानीको घल्ल बोकन बलो एक जनी आदमीसे मिलैगो । बा जौन घरमे घुसैगो हुँव तक बाके पिच्छु लगियो। ¹¹ तब तुम बा घरको आदमीसे कहियो, ’गुरु तुमसे पुछत है , मै अपन चेलन सँग निस्तार त्युहारको भोज खान बारो कोठा काहँ पर हए ?' ¹² बा तुमके उपर तल्लामे सजोसजाओ भओ बणो कोठा दिखाबैगो, और हुँवए तयार करीओ । ¹³ अइसिए बे गैए और बा कहो हानिपाइगए , और बे निस्तार त्युहार भोजको खानु तयारि करी । ¹⁴ और जब समय आओ, बा प्रेरितनके सँग भोजन करन बैठो। ¹⁵ बा उनसे कहि, "मै दुःख भोगनसे अग्गु जा निस्तार त्युहारको भोजन तुमर सँग खान बणो इच्छा करो रहओ । ¹⁶ काहेकि मै तुमसे काहत हौ , परमेश्वरके राज्यमे जा पुरो ना होन तक मै जा भोज फिर ना खामङ्गो ।" ¹⁷ तव येशू कटोरा लैइ,और जब बा धन्या बाद चढाएके बा कही,”जा लेबओ ,और तुम आपस मे बँटओ । ¹⁸ काहेकि मै तुमसे काहत हौ, परमेश्वरको राज नाआन तक अब मै अङ्गुरको रस ना पिमङ्गो।" ¹⁹ और बा रोटी लै, और धन्या बाद चढएके बाके तोडी और उनके अइसो कहिके दै , तुमर ताहि दौ भव जा मिर शरीर है ।मिर यादमै जा करीओ। ²⁰ अइसी कहिके खाएके बा कटोरा लईऔर कही, ”जा कटोरा तुमर ताहि बाहो भव मिर खुनमे भओ नयाँ करार हए । ²¹ पर ध्यान देबओ । मोके धोका देन बारो जहे टेबुलमे हए । ²² काहेकि आदमीको लौणात कहो भओ समयमे जान पणत हए । पर बा आदमीके धिक्कार हए जौनसे बाके विश्‍वासघात होबएगो ।" ²³ और बिन मैसे कौन अइसे करैगो बे अपनए प्रश्‍न करन लागे । ²⁴ अब बे मैसे सबसे बणों कौन हए कहिके बिनके बिचमे बाद बिवाद होन लागो । ²⁵ बा बिनसे कहि,अन्या जातिक राजा उनके उपर प्रभुत्व करत हए, और बिनके उपर अधिकार चलानबारेनसे आदरको अगुवा कहत हए । ²⁶ पर तुम मे अइसो ना होबौ । तुम मैसे जैन बणो है, बा सबसे छोटो बनए और सबसे जरुरि बात काहए कहेसे बा सेबा करन जैसो होबए । ²⁷ काहेकि बणो कैन है ? खानु खान बैठन बारो कि सेवा करन बारो ? का खनु खान बैठन बारो नाहए ? पर मै त तुमर बिचमे एक जनी सेवा करन बारो जैसो हव । ²⁸ पर मिर परिक्षामे मोके साथ देन बारे तुमहीं हौ । ²⁹ जैसे मिर पिता मोके एक राज्या दै हए ,मए फिर तुमके दे हौ । ³⁰ ताकि मिर राज्यामे तुम मिर टेबुलमे खाबैगे और पिबैगे, और इस्स्रयलके बाह्रए कुल मए न्याय करके सिंहासनमे बैठैगे । ³¹ सिमोन, हे सिमोन देख शैतान तुमके गेहुं हानि निखारन बारो अनुमती मागी हए ताकि बा तुमके अपने हातमे करसकए । ³² पर मै तिर विषवास ना डगमगाए कहिके तिर ताहि प्रार्थना करो, और तुम फिर घुमके तिर भैयान के स्थिर करीए । ³³ तव पत्रुस बा से कहि, "हे प्रभु मै तिर सँग झेल खानामे और मृत्यु तक जान तयार हौ ।" ³⁴ तव बा कहि , "पत्रुस, मै तोसे कहत हौ, तए मोके ना चिनत है, कहिके तिन चोटि अस्विकार ना करन तक, आज मुर्गा ना बासैगो ।" ³⁵ येशु बिनसे कहि,जब मै तुमके थैलि और झोलि और जुता बिना पठाओ रहओ, का तुमके कोइ चिजको कमी भओ ? बे कहि ना भओ । ³⁶ बा हकि,पर अब जौनके थैलि हौ ,बा बाके बोकए, उइसी झोला फिर बोकए । और जौनक सँग तरवार ना हौ,और बा अपनो लत्ता कपडा बेचके तरवार लेबए । ³⁷ काहेकि मै तुमसे काहत हौ, बा अपराधी सँग गिनैगो, कहिके मिर बारेमे जो अगमवाणी लिखि हए बा पुरो होनए हए । हाँ मिर बारेमे लिखो बात पुरा हुइ रहो हौ। ³⁸ तब चेला कहीँ,’ हे प्रभु देख, हियं दुई तरवार हौ। "और बा कहि, इतका होएसे पुग जएहै ।" ³⁹ बाहेर निकरके रोज दि हानि डंगामे गओ।और बके चेला फिर पच्छु-पच्छु लागे । ⁴⁰ बा ठाँउमे पुगके बा उनसे कहि , "तुम प्रार्थना करे राहबओ, और परिक्षामे मत पणौ ।" ⁴¹ बा बिनसे प्रायःतिस मिटर दुर जाएके घुटो टेकके प्रार्थना करि । ⁴² "हे पिता, तिर इच्छा हए कहेसे, जा कटोरा मिर ठिनसे हटाए दे । पर मेरि इच्छा नाए, पर तिर इच्छा पुरि होबए ।" ⁴³ तव स्वर्गसे एक दुत बाके बल देन बाके ठिन दिखाइ पणो । ⁴⁴ गजब सँकष्टमे पणके आग्रह पुर्वक बा प्रार्थना करन लागो, और बक पसिना खुनको बुदा बुदा हानी जमिनमे गिरत रहै। ⁴⁵ जब बा प्रार्थनासे उठके चेला ठिन आतपेति, बा बिनके शोकके कारण निधानो देखि । ⁴⁶ और बा उनसे पुछी, तुम काहे निधाए रहेहौ ? उठौ और परिक्षामे ना पणन ताहि प्रार्थाना करौ ।" ⁴⁷ देखओ बा मसकतय मसकत एक भिण हुंवा आएगइ । बाह्र चेला मैसे एक जनी यहुदा कहिन बारो अग्गु अग्गु आओ । बा येशूके चुमन, बाके ठिन आओ । ⁴⁸ पर येशु बासे कहि, यहुदा का तय आदमीक पुत्रके चुम्बनसे विशवा घात करन चाहत है ?" ⁴⁹ तव बक झौने झौनेमे भए जो होत रहए ,ब देखि , बे कहि, "प्रभु का हम तरवरा चलामै ? " ⁵⁰ बे मैसे एक आदमि प्रधान पुजारिक नोकरके मारी,और बक दहिना कान काटदै । ⁵¹ पर येशु कहि, " हुइगओ ,"अब अइसो मत करओ ।"और बक आदमिक कान छुइके, बा बाके अच्छो कर दै। ⁵² और बाके बिरुद्धमे आए भए मुख पुजारि, मन्दीरके कप्तान और धर्म गुरुसे बा कहि," का तुम डँकुके विरुद्धमे आए हानि तरवार और लठ्ठी लैके आए हौ ? ⁵³ मै रोज दिन मन्दीरमे तुमर सँग रहौ, तुम मिर बिरुद्धमे हात ना उठाए । पर अब तुमर समत है,और अन्धकारको शक्ति जहे है ।" ⁵⁴ बे येशुके पकणके लैगै, और बाके प्रधान पुजारिके घरमे लाई । पर पत्रुस दुरसे बाके पिछु पिछु लागो । ⁵⁵ हंवा आगनके बिचमे आगि पजारके आदमी जमा हुइके बैठे रहै ।पत्रुस फिर उनके बिचमे बैठो । ⁵⁶ एक नेकर्नि आगिके उजियारेमे बाके बैठो देखके अच्छेसे देखी, और कहि, "जा आदमि फिर बिनके सँग रहै ।" ⁵⁷ पर पत्रुस अएसो कहिके इन्कार करी , ए नारि, मै बाके ना चिनत हौ ।" ⁵⁸ थोरि देर पिच्छु दुसरो बाके देख्के कहि ,तए फिर बेहि मैसे कोइ एक हौ । तव पत्रुस जवफ दै,”ए आदमी, मै ना हौ ।" ⁵⁹ लगभग घण्टा पिच्छु और एक जनी जोर दैके अइसो कहि, "निहात्य जा आदमी बहेके सँग रहै, काहेकि जा फिर गालीलीए है ।" ⁶⁰ पर पत्रुस कहि, ए आदमी, तुम का काहतमै हौ ,मै ना जानत हौ ।" बा मस्कतै मस्कत मुर्गा बास्दै । ⁶¹ और प्रभु घुमके पत्रुसके देखी । आज " मुर्गा बासनसे अग्गु तए मोके तीन चोटी इन्कार करहए । कहीके प्रभुको कहो भौ बचन याद भौ । " ⁶² और बा बाहीर निकरके धर धरउटी रोन लागो । ⁶³ तव येशुके पक्रके आदमी बाके खिसबांइ और पिटिं । ⁶⁴ बाकी आंखीमे पट्टीसे लपेटके बासे पुछी, तोके मारन बारो कौन हए ? "ले अगमवाणी कहा ! ⁶⁵ बे बा के बिरुद्धमे घृनापूर्ण बात कही और बाके उपर ईश्‍वार -निन्‍दाको आरोप लगाइ । ⁶⁶ उज्यारो होतए जमा भए ,जनतनके धर्म गुरु, मुखीय पुजारी और शास्त्री दोने बाके अपन महासभामे लै गै। ⁶⁷ और कही,” तए ख्रीष्ट है कहेसे हमके बता ।" बा उनसे कही, मै बतै हौ कहेसे फिर तुम ना पतियए हौ । ⁶⁸ मै प्रश्‍न करङ्गो कहेसे, फिर तुम जवाफ ना देहौ । ⁶⁹ पर आदमीको पुत्र परमेश्वरको शक्तीको दहिना घेन बैठैगो । ⁷⁰ तव बे सब कही, तव का तै परमेश्वरको पुत्र हौ ?" बा बिनके उत्तर दै, तुमही काहत हौ । " ⁷¹ बे कही," हमके अब और का शाक्षीको आबश्यक्ता है का ? कहेकी हम बहेके मुहसे सुन लै ।"