¹ जहेमारे जब हम सहन ना सिके, तव एथेन्समे इक्ल्ले छोडनके हम राजी भए, ² और तुमके विश्‍वासमे पक्को करान और अर्ती-उपदेश देन, परमेश्‍वरमे ख्रीष्टको सुसमाचारको सेवक हमर भैया तिमोथीके हम पठाए, ³ ताकि जे कष्टके कारण कोइ ना डगमगबए । तुमके अपनके पता हए, कि जाके ताहिँ हम खाटए हँए । ⁴ काहेकी जब हम तुमरे संग रहँए, तव तुमके कष्ट ना भोगन पणैगो करके हम अग्गुसे काहे रहँए । जा नेहत्य होनके फिर आओ, सो तुमके पता हए । ⁵ जहेमारे मए और जद्धा ना सिक्त परिक्षामे पणेहौ कि करके और हमर परिश्रम व्यर्थ जए हए कि करके डरसे तुमरो विश्‍वास पता पानके मए बिनके पठओ । ⁶ पर ह्बए तिमोथी तुमरे ठिनसे हमरे कहाँ आएके तुमरो विश्‍वास और प्रेमको अच्छाे खबर हमके सुनाइँ । तुम हमके भेटन बहुत इच्छा करके सबदिन प्रेमसे हमरो सम्झना कर्त हौ करके खबर बे दैं । हम फिर तुमके भेटन उतनु चहना कर्त हँए । ⁷ जहेमारे भैया औ, तुमरे विश्‍वासके कारण हमर सारा दु:ख और क्लेशमे तुमरे बारेमे हम सान्ति पाए हँए । ⁸ काहेकी अगर तुम प्रभुमे मजबुत रहौ तव हम जीवित रहँए । ⁹ सब आनन्द जो तुमरे ताहिँ परमेश्‍वरमे हम अनुभव करत हँए बाके ताहिँ और तुमरे ताहिँ हम परमेश्‍वरके धन्यबाद देन सिकंगे का ? ¹⁰ तुमके आमनेसामने भेटके तुमरो विश्‍वासको कमी पुरा करन हेतुसे हम दिनरात जोशके साथ प्रार्थना कर्त हँए । ¹¹ अब हमर परमेश्‍वर और पिता स्वयम और हमर येशू तुमरे ठिन आनके डगर खोलदेमए । ¹² जैसी हम तुमके प्रेम करत हँए उइसी प्रभु तुमके एक दुसरो संग और सब आदमीन संग प्रेममे बढन बारो बनाबए परमेश्‍वर और प्रशस्त भैरहन बारो बनाबए, ¹³ जा हेतु से कि बाको सब सन्तके साथमे हमर प्रभु येशू ख्रीष्टको पुनरागमन होत बा हमर परमेश्‍वर पिताके सामुने तुमरो ह्रदय पवित्र और निष्खोट करके स्थिर करए ।