1
भैया रेव, तुमरे ठिन हमरो आगमन व्यर्थ ना भव तुमके अपनएके पता हए ।
2
हम अग्गुसे फिलिप्पीमे कष्ट भोगे और अपमानित भए करके तुमके पता हए, पर बेढम विरोध होतए होत फिर परमेश्वरको सुसमाचार प्रचार करन हमके परमेश्वरसे साहस मिलो रहए ।
3
काहेकी हमर अर्ति-उपदेश भुल और अशुध्दसे उब्जो ना हए, ना त् जा छलकपटसे भव हए:
4
पर जैसी सुसमाचार हमरे जिम्मामे सुम्पनके ताहिँ परमेश्वर हमके योग्य मानी, उइसी आदमीके खुशी करनके ना हए, पर हमर ह्रदय जाँचन बारो परमेश्वरके खुशी करनके हम बोलत हँए ।
5
तुमके पता हए कि हम कबही खुशी करनकी बात करेनाए, ना हम लालचको बहानमे फसए| जा को साँचि परमेश्वर हए ।
6
ख्रीष्टके प्रेरितके नातासे हम तुमर उपर अधिकार चलान सिक्तहँए । ताहु फिर हम आदमीसे आदर ना ढुणे, ना त् तुमसे ना और कोइसे ।
7
अपन बालकानके स्याहरन बारी- अइया कता तुमरे बीचमे हम कोमल भए ।
8
जहेमारे प्यारसे तुमरो चाहन करे हम परमेश्वरको सुसमाचार इकल्लो ना, पर हमरो ज्यान समेत तुमरे ताहिँ देन तयार रहए, काहेकी तुम ह्मरे ताहिँ इत्तो प्यारे भए रहओ ।
9
काहेकी भैया रेव, हमर कष्ट और मेहेनतको सम्झना तुमके पता हए| तुम कोइके बोझ मत बुकओं करके दिनरात काम करके हम परमेश्वरको सुसमाचार तुमके प्रचार करे ।
10
तुम साँचि हौ, और परमेश्वर फिर, कि तुम विश्वासीनके अग्गु कैसे हमर व्यवहार पवित्र, धार्मिक और निष्खोट रहए ।
11
कहेकी तुमके पता हए, दौवा अपन लौड़ा लौड़ियाके जैसो करके हम तुमके सबए के कैसे अर्ती-उपदेश देताए और साहँस फिर देताए तुमके आदेश दए,
12
जा हेतुसे कि तुमरो चालचलन परमेश्वर योग्य होबए, जौन तुमके बाको अपनो राज्य और महिमामे बुलात् हए ।
13
जहेमारे जाके ताहिँ हम फिर परमेश्वरसे निरन्तरन्यबाद धन्याबद चढात हौ, कि तुम हमसे सुनो वचन, जो नेहत्य परमेश्वरको वचन हए, जो तुमरो आदमीको वचन जैसो ना हए, पर परमेश्वरको वचन जैसो ग्रहण करे, जौन वचन तुमर विश्वासीमे काम कर्त हए ।
14
काहेकी भैया रेव, ख्रीष्टमे यहूदीमे भए परमेश्वरको मण्डलीको अनुकरण करन बारे तुम भए, काहेकी अपन देश- भैयनसे तुम जैसी दु:ख भोगे रहौ । उइसी बे यहूदीनसे दु:ख भोगी रहए ।
15
जेहि यहूदीनके प्रभु येशू ख्रीष्टके और अगमवक्तानके मारे, और हमके फिर बाहिर भजाइँ, और परमेश्वरके बेखुशी बनात हँए, और सब आदमीको बिरोध कर्त हँए ।
16
अन्यजातिनको उध्दार होबए करके बिनके संग बोल्नके हमके बाधा दैं । अइसिया सबदिन बे अपन पापको माना भरत हँए | पर अन्तमे परमेश्वरको क्रोध बिनके उपर पणो हए ।
17
काहेकी भैया रेव, ह्रदयसे ना हए, पर आँखीके सुध तुमरे संग छाेटाे समयके ताहिँ बिछोड भएके मारे, बडाे इच्छासे तुमके आमनेसामने भेट करन उत्सुकतासे हम सल्लहा करे ।
18
काहेकी हम तुमरे कहाँ आन खोजे रहँए- मए पावल बारम्बार आन चाहे- पर शैतान हमके रोकी ।
19
हमर प्रभु येशू जब अए हए, बोबेरा बाके सामने हमरो आशा और आनन्द औ गर्वको मुकुट तुमहि का ना हओ ?
20
नेह्त्य हमरो गौरव और आनन्द तुमहि हओ ।