¹ Akabitisha abafundiwa twelovu pamupene akabapa amaka agha bulaghili ubwakufumya imbepo imbibi sona nukuposha imbungo. ² Akabatuma pakuya pakufumusha ubunyafyale bwa Chala nukuposha ababine. ³ akayugha kukwabo ukuti, ''Mutakeghe nachimo pabulendo bwinyu--- mutakeghe ingomo, pamu ichikwama, pamu ichakulya, pamu indalama, sona nokunyamula ifyakufwala ifwingi. ⁴ Inyumba yiyo mwingila, mwikale mulamula mupaka mukabwele. ⁵ Koshi kuko batabapokelela, linga mukufumamwo mukaya kala, mubakung'undile ulufumbi mutulundi twinyu lulo lushimikisho lwakulimbana nabo.'' ⁶ Po bakanyambana nukubuka mutwaya twoshi, ukutangalasha amashu nukuposha koshi kula. ⁷ Po u Helod u malafyale akapulika ifya fyoshi fifyo fikachitikagha, amahala ghakamushilila papo bakayughagha ukuti u Yohani ashuka kubufwe, ⁸ sona bamu bakatingi u Eliya abonekela, pamu pakendelela ukuti mukunguluka ubakale ashuka. ⁹ U Helodi akati, ''Ngaputula umutu wa Yohani. Wiwini yuyo ngupulika ifindu isa ifi?'' Po akaghela ukuti amuteshe. ¹⁰ Mwo abafundiwa wanyokela, bakamubula fyoshi fifyo babomba. Po akabegha boshi nukubuka nabo kubuyo bwa pabene mukaya kako kakitishiwanga Betisayida. ¹¹ Lole mwo ichilundilo chapulika ishi, Bakamukongesha. Akabambilila nukubabula ifya bunyafyale bwa Chala, sona akabaposha babo bakalondagha ukuposhiwa. ¹² Po ishiku ilyabumalilo likaba ukuti lyaya pakukwana, bala twelovu bakisa kukwake nukuti, ''Chibweshe ichilundilo ukuti bangaya mutwaya twakushundulila na mulubafu lwachisu ukuti baye balonde ubuyo bwakughona ni chakulya, papo tuli kubuyo bwapatwibene.'' ¹³ Lole akayugha kukwabo akati, ''Mubape fimo ifyakulya balye.'' Bakati, ''Tutanafyo fyingi ukupululila ifibama fayivi niswi shibili---lole pala tungabukanukuya pakughula ichakulya ichabandu boshi aba." ¹⁴ (Pakaba abalisha fayivi sawuzande.) Akati kubafundiwa wake, ''Bikashe pase mufighaba fifite pachighaba chilichoshi.'' ¹⁵ Po bakabomba ifi, nukubabula abandu ukwikala pase. ¹⁶ Akegha ifibama fayivi niswi shibili, akaketa kumwanya, akafisaya nukufimenyula mutunandinandi, nukubapa abafundiwa ukuti bachipe ichilundilo. ¹⁷ Boshi bakalya nukwikuta, fyo fikashala fikanyamuliwa ifidudunga twelovu ifyakumenyuka menyuka. ¹⁸ Kakisa akabalilo kako u Yesu akiputagha mwene, abafundiwa bakaba nawe. Akabalalusha ukuti, ''Ka ichilundilo chikuti ne wini?'' ¹⁹ Bakamula ukuti, ''Yohani u mwosho. Lole bamu bakuti Eliya, bamu bakuti we yumo mwa bakunguluka abakale ushukite.'' ²⁰ Po akati kukwabo, ''Lole umwe mukuti une ne wini?'' U Peteli akamula, ''We Kilisitu wa Chala.'' ²¹ Lole akabasokesha nukubalaghilisha ukuti manye muyughe kuyumo, ²² ukuti, ''U Mwana wa Mundu abaghile ukutamiwa mufindu ifyingi nukukaniwa nabosongo nabamanyi ndaghilo nabasimbi akwisa ukughoghiwa po pishiku ilya butatu takashuke kubwufwe.'' ²³ Po akayugha kukwabo boshi, ''Linga yumo akulonda ukwisa ku une, abaghile ikane mwene nukunyamula ichipinjika ishiku lyoshi nukungonga une. ²⁴ Weshi yuyo akusunga ubwumi bwake aukya pakughutagha, lole yuyo akupokiwa ubwumi bwake chifukwa cha une akuya pakubusunga. ²⁵ Chingaba chisa chiki chicho umundu apeghiwe ichisu choshi chapase, lole apotwe ukukaba ubwumi bwake? ²⁶ Yuyo akukoshiwa isoni nune namashu ghangu, kukwake u Mwana wa Mundu akuya ukukoshiwa isoni nawe linga akwisa nulughindiko lwake nulughindiko lwa Tata nulwa bandumi abelu. ²⁷ Lole ngubabusha umwe ubwanaloli, pali bamu babo bimite panu tabakaghonjepo ubufwe mwo batateshishe ubunyafyale bwa Chala. ²⁸ Pamashiku eyiti mwo u Yesu ayugha amashu agha, akamwegha u Peteli nu Yohani nu Yakobo nukubuka nabo pamwnya pighamba pakwiputa. ²⁹ Mwo akwiputa, akabonekele ka cheni chake kakachenja, sona imyenda yake yikaboneka miswepu ngani. ³⁰ Tesha, abandu babili bakayughagha nawe, u Mose nu Eliya, ³¹ Bakaboneka mulughindiko, bakayughagha nawe ifyakufumamwo, nisha bumalilo bwake mu Yelusalemu. ³² Po u Peteli nababo akaaba nabo bakapitila ngani, lole mwo balamusha, bakaketa ubukulu bwake sona abandu babili bakimilila nawe. ³³ Po mwo bakufumako kwa Yesu, u Peteli akayugha kukwake, ''Songo chingaba chisa ukuti twikalaghe kunokuno. Isagha tusenge ifitembe fitatu, chimo chako, chimo cha Mose, sona chimo cha Eliya.''(Atakamanyagha fifyo akayughagha.) ³⁴ Po mwo akali akuyugha ifi, ibingu likisa nukubakupikila, bakisa baba nubwogha mo bingila mwibingu. ³⁵ Ishu likafuma mubingu ukuyugha ukuti, ''Uyu Mwana wane, yuyo imutumite; mumupulikilaghe.'' ³⁶ Mwo ishu lyayughiwa, u Yesu akayiwa ukuyti ali mwene. Bakabukilisha ukuba myee sona batakamubusha nayumo mumashiku ghala pafyoshi fifyo bakafitesha. ³⁷ Po ishiku ilinine, mwo bika ukufuma pamwanya pighamba, ichilundilo ichikulu chikakomana nawe. ³⁸ Tesha, umundu ukufuma muchilundilo akukolela, akayugha ukuti, ''Mumanyishi ngusuma ukuti umukole umwana wangu, pakuti weyo mwana wangu yumuyuwene. ³⁹ Mwatesha, imbepo shikumubombesha papo napapo akalila ngani; fikumupangisha ukutetema ukuti akwandagha ukufumya amatotofulu kumulomo. Fikaba fipala ukuti fimuleke sona fikamukomania ingani. ⁴⁰ Ingabasuma abafundiwa wako ukuti bafifumyemo, lole batakabomba.'' ⁴¹ U Yesu akamula nukuyugha ukuti, ''Mwebashita lwitiko sona nuluko lwakushita ukwinong'ona, imbe numwe mupaka lighi sona nukumubika pamwanya pinyu? Sagha numwana wako kuno.'' ⁴² Mwo umulumyana akwisa, imbepo imbibi shikamuwisha pase nukumutetemya nubukali ngani. Lole u Yesu akayikemela imbepo imbibi nukumuposha umulumyana, nukumupa u wise wake. ⁴³ Po boshi bakaswigha ubukulu bwa Chala. Po mwo boshi bali pakushigha nafyoshi fifyo akabombagha, akayugha kubafundiwa wake, ⁴⁴ ''Mweghe amashu agha ghingile ingani mufyufyo fyinyu: U Mwana wa Mundu tapelekiwe mutukono twa kubalughu.'' ⁴⁵ Lole batakapulika nachimo fifyo akayughagha. Chikafifiwa kubabo, po batakamanyagha iching'anamulo chake, po lole bakaba nilyogha ukubushikisha ifya mashu agha. ⁴⁶ Po ukutatikana kukanda pabene ifyakuti wiwini takabe wi songo. ⁴⁷ Lole u Yesu, akamanyagha fifyo bakinong'onagha mundumbula shabo, akegha akamwana akanandi ngani nukukanyamula mutukono twake ⁴⁸ nukuyugha kukwabo ukuti, ''yuyo akwambilila umwana uyu mungamu yungu, akunyambilila une; sona yuyo akunyambilila une, akwambilila yuyo andumite une. Pakuti yuyo mukeke ngani ukukinda mweboshi weyo wisongo.'' ⁴⁹ U Yohani akmula, ''Malafyale, tukatesha yumo akufumya imbepo imbibi mlungamu po tukamulesha, papo atakaba pamupene nutwe.'' ⁵⁰ ''Mutakamukanishe,'' U Yesuakayugha, ''Papo yuyo akususania numwe weyo winu.'' ⁵¹ Mwo amashiku ghapalamila ukuti bamweghe, akaketa icheni chakechake ukuya ku Yelusalemu. ⁵² Akatuma ubandumi pandashi pake, po bakabuka nukwingila mutwaya twa Samaliya ukumuyanisha fyoshi ifyake. ⁵³ Lole abandu bakula batakamwambilila papo akaketa icheni chake ukuya ku Yelusalemu. ⁵⁴ Mwo abafundiwa bake u Yakobo nu Yohani batesha ifi, bakayugha ukuti, ''Malafyale, ukulonda utwe tulaghile umulilo ukuti wike pase ukufuma kumwanya nukubanangania?'' ⁵⁵ Lole akasanusha nukubakemela, ⁵⁶ po bakabuka mutwaya utunine. ⁵⁷ Mwo bakwenda musila, yuymo akayugha kukwake, ''Tingukomgaghe koshi kuko ukuya.'' ⁵⁸ U Yesu akamula ukuti, ''Abokambe bali nimbako, nifiyuni fyamumwanya fili nififumbo, lole u Mwana wa Mundu atanako nakumo ukwakuti angaghonekapo umutu wake.'' ⁵⁹ Po akati kumunine, ''Ngongaghe une.'' Lole akati, ''Malafyale leke inje ishile u tata wangu.'' ⁶⁰ Lole akati kukewake, ''Baleke abafwe bashilane benebene. Lole kwa uwe, buka nukufumusha kuwutali nukukusha ifya bunyafyale bwa Chala.'' ⁶¹ Po yumo akayugha ukuti, ''Tingukongaghe, Malafyale, lole leketashi inje indaghe boshi kukaya.'' ⁶² U Yesu akamwamula akati, ''Nayumo yuyo angabika akakono kake pikasunukuketa kunyuma kubunyafyale bwa Chala.''