¹ Mwo fyabombiwa ifi, u Malafyale akasala sevenite abangi, po akabatuma babili babili ku kaya kalikoshi na mubuyo bubwu akaba ukuti ndiabukemo. ² Akayugha kukwabo, ''Ifyakwinula fwingi, lole abakwinula bobo banandi. Po lole mubushe u Malafyale wa mwinulo ukuti atume abakwinula ukuti binule ifyakwinula fyake. ³ Bukagha musila yinu. Tesha, ngubatuma isa bonang'oshi mukati mufinyamana. ⁴ Mutakanyamulaghe ichikwama cha ndalama, pamu ichikwama cha pabulendo, sona nifilato, po sona mutakamulamuke nayumo musila. ⁵ Inyumba yoshi yiyo mwingilamo, ichabwandilo mutingi, 'Ulutengono lube munyumba iyi!' ⁶ Linga umundu wa lutengano alimo mulamula, ulutengano lwunu tiluwe papake, lole pala nalumo, mukwisa ukunyoka nalo. ⁷ Mubeshe munyumba yilayila, mulyange nukung'wa fifyo bakubapa, Pakuti uwambombo enelile fifyo akulipiliwa. Manyi mwendaghemwendaghe ukufuma pa nyumba iyi ukuya payinine. ⁸ Akaya koshi kako mwingila, pala babapokelela, chicho babasenganishishe ⁹ muposhe ababine babo bali palapala. Muyughe kukwabo, 'Ubunyafyale bwa Chala buli papipi numwe.' ¹⁰ Pala mwingila mukaya inga batabapokelela, mubuke mutusila nukuti, ¹¹ 'Nulufumbi bubu ulwa mukaya kinyu lolukakatile kufilundi fyitu tubakung'undile umwe! Lole mumanye ichi: ubunyafyale bwa kumwanya bwapalamila.' ¹² Nguyugha ku umwe ukuti pishiku lila tikukabe akisa ku Sodomu ukulusha akaya kala. ¹³ Mukoshi kumwe, Kolazini! Mukoshi kumwe, Betisayida! Pala imbombo ishisa shisho shikabombiwa mwa umwe shabombiwa Tayile namu Sidomu ngali bapindukite kale, nukwikala mu hunila na mumoto. ¹⁴ Lole tifikabepo akisa ngani ku Tayile na ku Sidomu pabulongi ukulusha umwe. ¹⁵ Uwe, Kapenamu, ukwinong'ona ukuti tijukwershiwe kumwanya? Hagha, tiukishiwe ukufika pachisu pase. ¹⁶ Yuyo akupulika ku umwe akupulika kukwangu, sona yuyo akukana umwe akukana une, po yuyo akukana une akukana yuyo akanduma une.'' ¹⁷ Bala sevenite bakanyokela nulusekelo, bakatingi, ''Malafyale, nimbembepo imbibi shope shalambagha kukwitu mungamu yako.'' ¹⁸ U Yesu akayugha kukwabo, ''Namuketeleshagha u Satana akaba ukufuma kumwanya isa kamesha. ¹⁹ Tesha, nabapa amaka aghakukanya pa njoka nukalisha, napamaka ghoshi aghabalughu, sona nachimo chicho ndichikabafulashe musila yoshi. ²⁰ Po mutakaghobokaghe naichi chene, pakuti imbepo shikulamba kukwinyu, lole muhoboke ngani pakuti ingamu shinu shilembiwe kumwanya.'' ²¹ Po pakabalilo kala akahoboka ngani mwa mbepo mwikemo nukuti, ''Ngukupala uwe, Tata, Malafyale wa kumwanya na pase, papo ukabafifa ifindu ifi aba mahala nababo bakupulikisha nukufifumbula kubabo batamanyishiwe, isa utubana utunandi. Inga, Tata, po chikaba chakuhobosha pamaso pako. ²² "Ifindu fyoshi fyapeghiwa kukwangu ukufuma kwa Tata, sona nayumo yuyo ashimenye ukuti u Mwana wiwini lole u Tata mwene, sona po nayumo yuyo amenye ukuti u Tata wiwini lole u Mwana nababo u Mwana abasala ukuti abavumbulile.'' ²³ Po akaisa ang'anamukila kubafundiwa bake nukuyugha umwakwimama ukuti, ''Basayiwa babo bakutesha ifindu fifyo mukutesha. ²⁴ Nguyugha ku umwe, abakunguluka abingi nabo Malafyale bakanyonywa fifyo umwe mukufitesha, sona batakafitesha, nukuti bapulike ifindu fifyo mukupulika, po batakafipulika.'' ²⁵ Tesha, yuyo ashimenye ngani indaghilo akimilila ukuti amughele, nukuti, ''Mumanyishi, ningapangaki ukuti ibwagheubumi bwabwila nabwila?'' ²⁶ U Yesu akayugha kukwake, ''Mundaghilo musimbiweki? ukubelengagha buleghe?'' ²⁷ Akamula nukuyugha ukuti, ''Umughane u Malafyale u Chala wako nindumbula yako yoshi, nu muzimu wako woshi, namaka ghako ghoshi, ninyinong'ono shako shoshi, po numupalamani wako isa wimwene.'' ²⁸ U Yesu akati kukwake, ''Wamula akisa. bomba shishi, po ndiwise wikale.'' ²⁹ Lole umwene, ukunynywa ukwilongela mwene, akati kwa Yesu, ''Umupalamani wangu wiwini?'' ³⁰ U Yesu akamwamula nukuti, ''Umundu yumo akafumagha ku Yelusalemu ukuya ku Yeliko. Akakoliwa nabalughu, bakamupoka ifindu fwake, nukumukoma, bakamuleka ashala panandi ukufwa. ³¹ Mwalusako u muputi yumo akenda kusila yilayila, po bwo amutesha akenda kulubafu. ³² Musila yilayila, umu Levi wepe, akati afika pabuyo bulabula nukumutesha, akenda kulubafu. ³³ Lole umusamaliya yumo, bwo ali pabulendo, akafika po akaba. mwo amutesha ichisa chikamukola. ³⁴ Akafika papipi nawe nukumupinya ifilonda fyake, nukumukupulila amafuta nu bwala bwa mafilu. Akamwikasha pachima chake nukwisa nawe ku nyumba ya balendo, nukumupwelelela. ³⁵ Pishiku ilingi akafumya utukopala tubili, nukubapa babo bakapokelela abalendo, po akati, 'mumupwelele, sona chichoshi chicho mwabombesha, pala nisa tingabanyoshekeshe.' ³⁶ Pa boshi batatu ukwinong'ona ukuti wiwini yuyo akaba mupalamani wa yuyo akakoliwanabalughu? ³⁷ Akati, ''Yuyo akamupelela ichisa.'' U Yesu akati kukwake, ''Buka uyubombe isa shishisho.'' ³⁸ Po mwo akwenda, akingila mukaya kamo, po umukolo yumo ingamu yake Malita akamupokelela munyumba yake. ³⁹ Akaba numuzuna u Maliya , yuyo akikala mufilundi fwa Malafyale nukupulikisha amashu. ⁴⁰ Lole u Malita akatangwanika nukupiya ichakulya. Akisa kwa Yesu nukuti, ''Malafyale, utakumbashikisha ukuti ubamwitu andekile ngupiya nimwene? Po apa mubushe anyafwe.'' ⁴¹ Po u Malafyale akamula nukuyugha kukwake, ''Malita, Malita, ukupasha nukutangwanika nifindu ifyingi, ⁴² lole chokashe ichakulondiwa. U Maliya aslite ichindu ichisa ngani, chicho chitangapokiwa kukwake.''